YEREMIYA 11 - Embimbiliya - Bíblia Sagrada em Umbundu

^1-2 Ondaka ya Yehova yeya ku Yeremiya yiti, Yeva olondaka viocisila eci, kuenje popia la va Yuda lolonungi via Yerusalãi.

³ Popia lavo huti, Ca popia Yehova, Suku ya Isareli, ceci, hati, Omunu a siñalĩwe nda ka sumbila olondaka viocisila

⁴ cina nda lisila la vakukululu vene keteke nda vopa vofeka ye Egito, haimo vofolono yutale. Kotembo yaco nda popia lavo siti, Tavi kondaka yange, lingi cosi ndu sapuili, oco vu linga omanu vange kuenda ame ndinga Suku yene,

⁵ okuti nelisa ohuminyo nda likuminya la vakukululu vene yoku va ĩha ofeka ya siata owiki lasenjele. Ci fetike etali.— Oco nda kumbulula, siti, A Yehova, ci lingiwe.

⁶ Yehova wa popia lame hati, Sapuila olondaka evi viosi vovaimbo a Yuda kuenda volokololo via Yerusalãi, huti, Yevi olondaka viocisila eci loku vi linga.

⁷ Momo nda lungula vakukululu vene tunde eteke nda vopa vofeka ye Egito toke etali lilo. Nda likapela muẽle oku va lungula. Nda lingainga siti, Tavi kondaka yange.

⁸ Haimo ka va tavele, ka va mbonguilile ovatui avo. Puãi vosi va enda enda, omunu omunu lumbinde wutima waye ũvi. Oco nda linga lavo ndolondaka viosi viocisila eci, cina nda lisilile lavo, okuti nda va vi linga, puãi ka va vi lingile.

⁹ Yehova wa popia vali lame hati, Va Yuda lolonungi via Yerusalãi va ñualelapo.

¹⁰ Va tiukila kolohole via vakukululu vavo, vana ka va tavele oku yeva olondaka viange, kuenje va tiamẽla kolosuku vikuavo oku vi vumba. Epata lia Isareli leli lia Yuda va nyõla ocisila cange nda lisila la vakukululu vavo.

¹¹ Oco, ca popia Yehova ceci, hati, Tala, ndi va muisa eci cĩvi, okuti ka va tẽla oku ci puluka, kuenje ndaño va mbilikiya si va yevi.

¹² Oco ovaimbo a Yuda lolonungi via Yerusalãi va ka vilikiya kolosuku vina va vi timãhãila insensu, puãi ka vi va popela veteke liohali yavo.

¹³ Momo, a Yuda, oku tenda olosuku viene via soka lovaimbo ene, loku tenda ovotala wa tungi hã-o a kutisa osõi, hã-o ovotala oku timĩhĩla Baale insensu, a soka lolokololo via Yerusalãi.

¹⁴ Oco omanu ava, ku ka va likutililile, ku ka va lilile pamue oku va lombela, momo si va yevi eci va mbilikiyila vohali yavo.

¹⁵ Omo Wangewasoliwa wa lingainga ovina via viha cilo hẽ o sesamela ndati oku iñila vonjo yange? Olohuminyo lositu ya lumbiwa he, vi imũla onima yolohole viove? Ovina evi hẽ viu ku popela?

¹⁶ Yehova wa ku lukile hati, Vuliveira utalala, wa posoka, wimaima epako liwa, puãi, lonjuela yekungukungu lia lua, eye u timiha ondalu kuenje ovianja viawo vi pia.

¹⁷ Yehova Ukualohoka, u wa ku tuika, wa ku tukuila eci cĩvi, omo epata lia Isareli leli lia Yuda a linga cĩvi eci a ñokela onyeño poku timĩhĩla Baale insensu.

¹⁸ Yehova wa ci ñulĩhĩsisa, kuenje nda ci kũlĩha; oco noke ove wa ndekisa ovilinga viavo vĩvi.

¹⁹ Puãi ame nda kala ndomõla omeme wonjuka, wa tualiwa kepondelo. Sia ci kũlĩhĩle okuti va numbika ongombo vati, Tu nyõli uti lepako liawo. Tu wupa vofeka ya vakuamuenyo okuti onduko yaye ka yi ivalukiwa vali.

²⁰ A Yehova Ukualohoka, ove o tetolola lesunga haive o setaika utima kuenda olondunge. Linga mole ndeci o va fetuluinya, momo nda ku sapuila ondaka yange.

^21-22 Oco, ondaka ya Yehova Ukualohoka yoku tukula omanu va Anatote va sanda omuenyo wove, vati, Ku ka imbe owanji vonduko ya Yehova sanga o fa lovaka etu,— ondaka ya Yehova Ukualohoka yoku va tukula yeyi, hati, Tala, ndi va yambula. Akuenje vavo va fa losipata, kuenda omãla vavo valume lava vakãi va fa lonjala.

²³ Pokati kavo lomue o sialapo. Momo va Anatote ndi va nenẽla cĩvi vunyamo weyambulo liavo.