YEREMIYA 10 - Embimbiliya - Bíblia Sagrada em Umbundu

¹ Anjo ya Isareli, yeva ondaka Yehova a popia love.

² Ca popia Yehova ceci, hati, Ku ka lilongise ovituwa violofeka. Ku ka salukile ovilimbu viokilu ndomo olofeka vi vi salukaila.

³ Momo ovituwa via vakualofeka viesanda. Omunu o timbula uti wovusenge, kuenje ukuavo u songa londiaviti yaye.

⁴ Vo posuisa lopalata lulu; vo kolisa lolombambo via valeliwa lomalatelo okuti ko lisengi.

⁵ Oviteka viavo via soka ndoviñumañuma vioku vinga olonjila vepia. Ka vi popi, ka vi endi te oku ambatiwa. Ko ka vi kuateli usumba. Ka vi tẽla oku linga cimue, ndaño cĩvi, ndaño ciwa.

⁶ A Yehova, lomue wa lisoka love. Ove vunene kuenda onduko yove ya kemãla lunene.

⁷ A Soma yolofeka, helie ka ku sumbila? Wa sesamẽla esumbilo momo pokati kolonoño viosi violofeka, kuenda vovoviali avio osi, ka muli umue wa lisoka love.

⁸ Vosi yavo va wulua haivo ovitende. Okulongisa kuoviteka viavo kua kola nduti.

⁹ Via lañiwa lopalata yoko Tarsisi kuenda ulu woku Ufasi. Vi tungiwa lomesele kuenda utẽli wulu. Onoloti kuenda ohusu ovio uwalo wavio. Viosi vi tungiwa lolomesele.

¹⁰ Puãi Yehova eye Suku yocili, haeye Suku yomuenyo, haeye Soma ka pui. Ongongo yi lulumila onyeño yaye kuenje olofeka ka vi tẽla oku pandekisa lonyeño yaye.

¹¹ Popi lavo hoti, Olosuku vina ka via sowile ilu losi vi taka kilu lieve kuenda vemi lilu.

¹² Eye wa sovola osi lunene waye, haeye wa seveta oluali lolondunge viaye, kuenje wa yala ilu luloño waye.

¹³ Eci o popia, kilu ku yevala onjuela yetande. O londisa ombundu tunde kasulilo okilu lieve. O sovuila ombela ociliakulo, kuenje upa ofela volosila viaye.

¹⁴ Omunu wosi wa linga eveke, ka kuete olondunge. Wosi ukuakutela ulu o kutisiwila osõi oviteka a tunga momo oviteka viaye viesanda, vokati kavio ka mu li omuenyo.

¹⁵ Evi olosuku viesanda, upange welimbi; nda vi setekiwa vi nyolẽha.

¹⁶ Suku ya Yakoba puãi ka lisokele lavio momo eye usovoli wovina viosi, kuenda Isareli eye epata liocipiñalo caye. Onduko yaye Yehova Ukualohoka.

¹⁷ Ove wa tunga vombonge ya ñualiwa, ongolola ovikuata viove oco o tundemo.

¹⁸ Momo ca popia Yehova ceci, hati, Tala, cilo nakumũla olonungi viofeka, ndi va kangisa toke va ci limbuka.

¹⁹ Ngongo yange we! Nda valuiwa! Epute liange li linga usumba. Puãi nda linga siti, Ocili, eyi ohali yange kuenje ca sesamẽla oku pandikisa layo.

²⁰ Ombalaka yange ya nyõlẽha, ovikolo viayo viosi via tepa. Omãla vange va sandoka kuenie kaveko. Ka ku li vali omunu o tunga vali ombalaka yange loku nyañumũla olonanga viaco.

²¹ Momo ovangombo va vulua, ka va pula pula ku Yehova; oco va pumba oku sumuluĩsua kuenje oviunda viavo viosi via sandoka.

²² Ondaka ya sapuiwa yeyi: Tala, ciya! Onjuvungo ya tunda ko Norte! Vo veya ha va lingisa ovaimbo a Yuda alunda kuenda avungu olombulu.

²³ A Yehova, ndi ci okuti okuenda kuomunu ka ku kasi povaka aye muele. Omunu enda ka tẽla eye muẽle oku suñamisa okuenda kuaye.

²⁴ A Yehova, njambule, puãi ndeci ca sokapo, halonyeñoko sanga o nyola enene.

²⁵ Sukumũila onyeño yove kolofeka ka via ku kũlĩhũe, kuenda komanu ka va tukola onduko yove. Momo va lia Yakoba, vo lia muẽle pe, vo sulisa. Va nyõla ocitumãlo caye cosi.