YEREMIYA 1 - Embimbiliya - Bíblia Sagrada em Umbundu

¹ Olondaka via Yeremiya, omõla a Hilikiya, umue pokati kovitunda via kala va Anatote vofeka ya Benjamini.

² Ondaka ya Yehova yeya kokuaye voloneke via Yosiya, omõla a Amone, osoma ya Yuda, kunyamo wokuviala kuaye wekuĩ latatu.

³ Yeyaiya vali voloneke via Yehoyakimi, omõla a Yosiya, osoma ya Yuda, toke kesulilo liunyamo wekuĩ lamosi wa Sedekiya, omõla a Yosiya, osoma ya Yuda, toke va Yerusalãi va kuatiwa olohuate kosãi yatãlo.

⁴ Oco ondaka ya Yehova yeya kokuange yiti,

⁵ Osimbu sia ku vungile vimo nda ku kũliha, osimbu kua citiwile nda ku kolisa, kuenje nda ku tukuila oku linga uprofeto wolofeka.

⁶ Oco nda linga siti, A Ñala Yehova, ame hameko, okupopia si ci tẽla momo ndimõla.

⁷ Puãi Yehova wa popia lame hati, Ku ka popie huti, Ame ndimõla, momo wenda kuava vosi hu tuma, kuenda cosi hu sapuila o popia.

⁸ Ku ka va kuatele ohele momo ame ñasi love oku ku kuatisa. Oco ca popia Yehova.

⁹ Oco Yehova walũla eka liaye yu wa ndamba komẽla. Yehova wa popia lame hati, Tala, nda kapa olondaka viange vomẽla wove.

¹⁰ Tala, etali nda ku tukuila olofeka kuenda ovosoma, okuti o tukũla loku teya, o nyõla loku leñula, o tunga loku kũla.

¹¹ Ondaka ya Yehova yeya vali kokuange, yiti, A Yeremiya, o lete nye? Oco nda linga siti, Ndete ocanja cutata.

¹² Oco Yehova wa popia lame hati, Wa ci mõla muẽle momo ame ndi tata tata ondaka yange loku yi linga.

¹³ Oco ondaka ya Yehova yeya vali kokuange yiti, O lete nye? Oco nda linga siti, Ndete ombia yi feloka, ya imba ovaso ko Sul.

¹⁴ Oco Yehova wa popia lame hati, Civi ci tunda ko Norte ci sambukila kolonungi viosi viofeka.

¹⁵ Momo Yehova hati, Tala, mañinya apata osi ovosoma oko Norte kuenje eya. Osoma losoma yi tumbika ocalo cayo polombundi viosi viapandavelo a Yerusalãi kuenda kovaso yovimbaka viaco viosi via ñualapo, kuenda kovaso yovaimbo osi a Yuda.

¹⁶ Kuenje ndi va tetuluila oku va pisila evĩho liavo liosi. Momo va nokoka, yu va lumbila olosuku vikuavo insensu, kuenje va fendela evi via tungiwa lovaka avo.

¹⁷ Oco ove, iña pimo, votoka, popia lavo ovina ame hu sapuila. Ku ka va yokokele sanga ame hu yokokisila kovaso avo.

¹⁸ Momo etali nda ku malẽhĩsila ofeka yosi kuenda olosoma via Yuda lolombuale viaco kuenda ovitunda viaco lomanu vofeka, okuti o linga ndimbo lia kolisua, pamue ndongunji yutale, pamue ndovimbaka viosipi.

¹⁹ Va yaka love puãi ka va ku yuli, momo ame ñasi love oku ku silamẽla. Oco ca popia Yehova.