YEHOSUA 9 - Embimbiliya - Bíblia Sagrada em Umbundu

¹ Eci va yeva ovina viaco, oco olosoma viosi viokesinya lilo lia Yordão, vina via kala vofeka yolomunda, lovatapi, lokonele yokalunga kanene toke ocipepi la Levanone, va Hiti la va Amori, va Kanana la va Perisi, va Hiwi la va Yevusi,

² vosi va liongoluila pamosi lutima umuamue, ha va liyaki la Yehosua kuenda va Isareli.

³ Puãi eci olonungi via Giveone via yeva ndomo Yehosua a linga la Yeriko la Hai,

⁴ oco va linga etutu. Va katuka lolohuta. Vambata olonjeke via kuka kovimbulu viavo, lovipa viovinyu via kuka, haivio via toka toka kuenda via kutaiwa.

⁵ Kolomãi va walako olohaku via kuka haivio via papaikua, luwalo wokatimba avo wa kuka. Akende osi ohuta yavo a kukuta, kuenda eya ohume.

⁶ Va enda ku Yehosua, kocilombo coko Giligali. Va popia la Yehosua kuenda lalume va Isareli, vati, Tua tunda kofeka yocipãla. Oco cilo lisili letu ocisila.

⁷ Alume va Isareli va popia la va Hiwi vaco, vati, Mbi wa tungi pokati ketu, oco hẽ tu lisila ndati lene ocisila?

⁸ Va popia la Yehosua, vati, Etu tuakuenje vove, Yehosua wa popia lavo hati, Ene velie? Kuenda wa tundi pi?

⁹ Va popia laye vati, Akuenje vove va tunda kofeka yi pãla calua. Veyilila onduko ya Yehova Suku yove, momo tua yeva oluhimo luaye, leci cosi a linga vEgito,

¹⁰ leci cosi a linga lolosoma vivali via va Amori, via kala kesinya lia Yordão, Sihoni, Soma ya Hesibone, la Oge, Soma ya Basiane wa kala kAsitarote.

¹¹ Akulu vetu lavakuafeka yetu vosi va popia letu vati, Ambati olohuta viovonjila. Kuendi, ka ñualeheli lavo, popi lavo hoti, Tuakuenje vene. Cilo lisili letu ocisila.

¹² Ekende lietu eli lia tokotele eci tua pongiya ohuta kolonjo vietu, eteke tua tunda oku iya kokuene. Puãi kaliye, tali, lia kukuta kuã, kuenda lieya ohume.

¹³ Ovipa evi viovinyu, tua vi yukisa tupu viokaliye. Puãi tali, via toka toka. Uwalo wetu u lolohaku vietu via pua lungende wa lepa calua.

¹⁴ Alume va Isareli va lia kolohuta viavo, kuenje ka va pulile vali Yehova.

¹⁵ Yehosua wa linala lavo, wa lisila lavo ocisila coku va kalisa lomuenyo. Akulu vohongele lavovo va lisila lavo ocisila.

¹⁶ Eci va lisila lavo ocisila, kovaso yoloneke vitatu, va Isareli va yeva okuti ovo va lisungue lavo, kuenda va tunga pokati kavo.

¹⁷ Va Isareli va katuka, kuenje keteke liatatu va pitila kovaimbo avo. Ovaimbo avo ya: Giveone la Kefira la Berote la Kiriyata Yeari.

¹⁸ Va Isareli ka va va ipaile, momo akulu vohongele va lisilile lavo vonduko va Yehova, Suku ya Isareli. Oco ohongele yosi ya ñuñuila akulu.

¹⁹ Puãi akulu vosi va popia lohongele yosi, vati, Tua lisila lavo vonduko ya Yehova Suku ya Isareli, oco cilo ka tu tẽla oku va lamba.

²⁰ Eci tu linga lavo, ceci: Tu va kalisa lomuenyo, sanga onyeño yi tu wila omo tua lisila lavo ocisila.

²¹ Akulu va popia lavo vati, Va kale lomuenyo. Oco va linga atiañi volohũi lavakuakutapela ohongele yosi ovava, ndomo akulu va va ci popele.

²² Yehosua wa va kovonga, wa popia lavo hati, Nye wa tu limbikili, hoti, Tu kasi muẽle kupãla lene, osimbu wa tungi pokati ketu?

²³ Cilo wa siñaliwi. Kokuene ka ku kambi oku tunda apika, latiañi volohui lavakuakutapela onjo ya Suku yange ovava.

²⁴ Va kumbulula Yehosua, vati, Akuenje vove va va sapuila ndomo Yehova Suku yove a handelekele ukuenje waye Mose oku wihi ofeka yosi loku kundula kovaso ene olonungi viosi viofeka. Oco tuo yokokeli cimue, tua kuata ohele yovimuenyo vietu, kuenje tua linga ocina eci.

²⁵ Kuenje tala, tu kasi peka liove. Linga letu ndeci wa sima kuenda ndeci ca ku sungulukila.

²⁶ Oco a linga lavo, yu wa va popela peka lia va Isareli, kuenje ka va va ipaile.

²⁷ Eteke liaco Yehosua wa va lingisa atiañi volohui lavakuakutapela ohongele lutala wa Yehova ovava, toke etaili lilo, vocitumãlo cina a laika oku nola.