YEHOSUA 8 - Embimbiliya - Bíblia Sagrada em Umbundu

¹ Yehova wa popia la Yehosua, hati, Ku ka kuate usumba, ku ka yokoke. Kuenda lalume vosi vakuavita. Katuka, lamanela ko Hai. Tala, nda eca peka liove osoma ya Hai, lomanu vaye, limbo liaye, lofeka yaye.

² Linga la Hai losoma yaco ndeci wa lingile la Yeriko losoma yaco. Te lika okuti ovikuata viaco lolongombe, vi pundi vi lingi viene. Lavekeli vonutula konyima yimbo.

³ Oco Yehosua wa katuka kumue lalume vosi vakuavita ha va lamanela ko Hai. Yehosua wa nola akui atatu kolohũlũkai vialume, va pama vakuotõi, yu wa va tuma uteke.

⁴ Wa va handeleka hati, Tali, vu ka lavekela imbo, konyima yimbo vonutula. Ko ka endi ocipãla limbo, puãi hanekeli vosi.

⁵ Ame lomanu vosi va kasi lame tu ama kimbo. Kuenje eci va tu tundila, ndokonjanja yina yatete, oco tu tila kovaso avo.

⁶ Va tu landula, toke tu va kokela ocipãla limbo, momo va laika oku popia vati, Va kasi loku tu tila, ndonjanja yatete. Oco tu tila kovaso avo.

⁷ Oco ene apa wa lavekeleli, vu tundapo, ha vu kuati imbo, momo Yehova Suku yene o li eca peka liene.

⁸ Eci vu kuata imbo liaco, li yoku londalu ndondaka ya Yehova. Tali, ndo ci handeleki.

⁹ Oco Yehosua wa va tuma, kuenje va enda oku lavekela vonutula. Va kala pokati ka Betele la Hai, kutakelo wa Hai. Yehosua puãi uteke waco wa lale pokati komanu.

¹⁰ Yehosua wa pasuka omele ociteketeke. Wa tenda omanu, kuenje eye kumue lakulu va Isareli va lamanela ko Hai, kovaso yomanu.

¹¹ Alume vosi vakuavita, vana va kala laye, va lamana, yu vamako, kuenje veya ocipepi limbo. Va tunga ocilombo ko Norte ya Hai. Pokati kavo la Hai pa kala ocimbota.

¹² Wa enda lolohũlũkai vitãlo vialume, yu wa va kapa oku lavekela pokati ka Betele la Hai, kutakelo wimbo.

¹³ Oco va kapa olohoka viosi viomanu ko Norte yimbo, kuenda vakuakulavekela va kala kutundilo wimbo. Uteke waco Yehosua wa lala vocimbota.

¹⁴ Eci Soma ya Hai a ci mõla, oco alume va Hai va yayulako, yu va katuka ociteketeke, kuenje va tundila oku liyaka la va Isareli. Soma kumue lomanu vaye vosi va enda oko va limbile onumbi, oku panda ketapi. Eye puãi ka kũlĩhile okuti wa lavekelua vonutula konyima yimbo.

¹⁵ Yehosua la va Isareli vosi va lilingisa ndava va yuliwa kovaso avo, kuenje va tila lonjila yovekalasoko.

¹⁶ Omanu vosi va kala vimbo va liongoluila pamosi ha va va landula. Oco va landula Yehosua, toke imbo va li sia kupãla.

¹⁷ Vo Hai lovo Betele ka mua sialele ulume ka katukilile va Isareli. Imbo va li sia upolokoso, kuenje va landula va Isareli.

¹⁸ Yehova wa popia la Yehosua, hati, Ilika ko Hai lonjelia yi kasi peka liove, momo ndi li eca peka liove. Oco Yehosua was ilika kimbo lonjelia ya kala peka liaye.

¹⁹ Ava va lavekelele vonutula va tundamo lombili. Eci Yehosua olola eka liaye, haico va lupuka, va iñila vimbo, va li kuata. Va yayulako kuenje va imba imbo ondalu.

²⁰ Alume va Hai eci va vanja konyima yavo, va mõla, kuenje ota, imbo lia vata evonge, owisi waco u londa kilu. Oco ka va kaile vali longusu yoku tilila konele eyi pamue konele oyo. Omanu va tililile vekalasoko, va pongolokelamo ava va va landula.

²¹ Yehosua la va Isareli vosi, eci va limbuka okuti ava va lavekelele va kuata imbo kuenda evonge limbo lia kala loku londa, oco va ñualapo kuenje va ipa alume va Hai.

²² Vakuavo va va tundila vimbo. Kuenje va Hai va kala pokati ka va Isareli, ava koku ava koku. Va va kundula, kuenje lomue va supisapo, lomue wa puluka.

²³ Soma ya Hai puãi vo kuata lomuenyo, yu vo tuala ku Yehosua.

²⁴ Eci va Isareli va mala oku ipaila vusenge olonungi viosi via Hai, vana va va landuile vakalasoko, leci vosi va fa lomela wosipata toke va kunduka, oco va Isareli vosi va tiukila ko Hai, va li kundula lomela wosipata.

²⁵ Oco vosi va ipaiwa eteke liaco, alume lakãi va tẽla ekui lavivali kolohũlũkai, ndokuti omanu vosi va Hai.

²⁶ Yehosua ka tiuwile konyima eka liaye lina a ilikile lalio onjelia, toke a kundula pe olonungi viosi via Hai.

²⁷ Puãi olongombe lovikuata vimbo liaco, va Isareli va vi punda ha vi lingi viavo, ndondaka Yehova a handelekele Yehosua.

²⁸ Oco Yehosua wa yoka Hai, wa li linga elunda otembo ka yi pui, wa li linga epile toke etaili lilo.

²⁹ Soma ya Hai wo nyoñamisa vuti toke koñolosi. Pokuiñila kuekumbi, Yehosua wa tuma oku tulula ocivimbi caye vuti. Va ci takumuila kombundi yimbo kuenje va ci lundika ondunda yinene yovawe. Haiko yi li toke etaili lilo.

³⁰ Oco Yehosua wa tungila Yehova Suku ya Isareli utala komunda Evale,

³¹ ndeci Mose, ukuenje wa Yehova, a handelekele va Isareli, ndomo ca sonehiwa velivulu liovihandeleko via Mose. Utala waco wovawe ka a songelue, ana lomue wa oluila ocivela ha a pasi. Va lumbilako Yehova ovilumba vioku pia elisi lovilumba viombembua.

³² Kovawe aco kovaso a va Isareli Yehosua wa sonehako ovihandeleko vina Mose a sonehele.

³³ Va Isareli vosi, ci kale ovingendeleyi, ci kale olonyitilue, kumue lakulu vavo lavakesongo lolonganji viavo, va talama nele la nele yocikasa, kovaso ya va Lewi, ovitunda vakuakuambata ocikasa covisila via Yehova. Onepa yimue yavo ya lisuñama lomunda Gerisimi, lonepa yikuavo ya lisuñama lomunda Evale, ndeci Mose, ukuenje wa Yehova, a handelekele kefetikilo, okuti va sumuluise va Isareli.

³⁴ Noke wa tanga olondaka viosi viovihandeleko, evi viasumuluho levi viasiñalo, ndeci cosi ca sonehiwa velivulu liovihandeleko.

³⁵ Kolondaka viosi Mose a handelekele, layimue ya sialako okuti Yehosua ka yi tangelele ohongele yosi ya Isareli, lakãi, lomãla, lovingendeleyi via tunga pokati kavo.