YEHOSUA 7 - Embimbiliya - Bíblia Sagrada em Umbundu

¹ Puãi va Isareli va lueya kondaka yovina via siñaliwa, momo Akani, omõla a Karimi, omõla a Savidi, omõla a Sera, wokepata lia Yuda, wa kuata kovina via siñaliwa, kuenje onyeño ya Yehova ya wengukila va Isareli.

² Yehosua wa tuma alume, va tunda ko Yeriko ha va endi ko Hai, yi lisungue la Betavene, kutundilo wa Betele, yu wa popia lavo hati, Kuendi, kũlĩhisi ofeka. Oco alume va enda kuenje va kũlĩhisa Hai.

³ Va tiuka ku Yehosua, yu va popia laye vati, Omanu ka va ka ende vosi, puãi ku ende ño olohũlũkai vivali pamue olohũlũkai vitatu vialume ha va yuli Hai. Ku ka kavise ño omanu vosi oku lamanelako, momo va Hai ka va luile.

⁴ Oco ca soka olohũlũkai vitatu vialume va lamanelako. Kuenje va tila kovaso alume va Hai.

⁵ Alume va Hai va ipapo ca soka akui atatu lepandu kalume. Va va lupuisa tunde kombundi toke ko Sevari. Va va ipãila vociloka. Oco ovitima viomanu via yenguluka, via linga ndovava.

⁶ Yehosua wa tola uwalo waye, wa tuvika ocipala caye posi kovaso yocikasa ca Yehova, toke koñolosi, eye kumue lakulu va Isareli. Va litaila eve kovitue viavo.

⁷ Yehosua wa popia hati, Avoyo we, a Yehova Suku! Nye wa yokisila omanu ava Yordão, hu tu eci peka lia va Amori loku tu takisa? Nda tua sanjukilile ño oku tumala sinya olio lia Yordão, nda hĩse.

⁸ A Yehova, mopia nye? Momo va Isareli va imba onyima ovanyali vavo, va tila.

⁹ Momo va Kanana lava vosi va tunga vofeka va laika oku ci yeva, kuenje va tu ñuala ocingonja loku kungula onduko yetu kilu lieve. Onduko yove yinene, lacimue hẽ o yi lingila?

¹⁰ Yehova wa popia la Yehosua, hati, Votoka, nye wa tuvikila ndoto ocipala cove posi?

¹¹ Va Isareli va linga ekandu. Ocili muẽle, ocisila cange nda va handelekele, va vi lueya. Ocili va kuata kovina via siñaliwa, kuenda va iva, va limbika, yu va vi yombeka muẽle pokati kovikuata viavo.

¹² Oco va Isareli ka va tela oku tamalala lovanyali vavo, puãi vaimba onyima ovanyali vavo, momo esiñalo lia va veta, Si kala vali lene, te nda vu nyola ovina via siñaliwa vi kasi pokati kene.

¹³ Votoka, yelisa omanu, popia huti, Liyelisili eteke lia hẽla. Momo ca popia Yehova Suku ya Isareli, ceci, hati, A va Isareli, pokati kene pali cimue ca siñaliwa. Ko tela oku tamalala lovanyali vene, te nda vu tundisa pokati kene eci ca siñaliwa.

¹⁴ Hela omele wiyi ndapata ene. Epata Yehova a tukula liya imo limo. Imo Yehova a tukula liya onjo lonjo. Onjo Yehova a tukula yiya omunu omunu.

¹⁵ Kuenje u o sangiwa leci ca siñaliwa o yokiwa londalu, eye kumue leci cosi a kuete. Momo wa lueyela ocisila ca Yehova kuenda wa linga ekutisasõi kIsareli.

¹⁶ Oco Yehosua wa pasuka omele ociteketeke. Wamisako va Isareli, epata lepata, Kuenje epata lia Yuda, olio lia tukuiwa.

¹⁷ Wamisako ovaimo a Yuda, kuenje wa tukula imo lia va Sera. Wamisako imo lia va Sera, omunu, lomunu, kuenje Savidi eye wa tukuiwa.

¹⁸ Wamisako onjo yaye, omunu lomunu, kuenje Akani, omõla a Karimi, omõla a Savidi, omõla a Sera, wokepata lia Yuda, eye wa tukuiwa.

¹⁹ Yehosua wa popia la akani, hati, Amolange, muisa Yehova Suku ya Isareli ulamba. Litavela kokuaye. Kaliye sapuileko eci wa linga. Ku ka ci ndimbike.

²⁰ Akani wa kumbulula Yehosua, hati, Ocili nda lingila Yehova Suku ya Isareli ekandu. Nda ci linga ndomo:

²¹ Eci nda muila pokati kovikuata okapote kamue ka posoka koko Sinare, lovita vivali violosiekele viopalata, kuenda ocinimbu cimue culu ci pesala akui atalo kolosiekele, oco nda vi livela, yu nda vi nyañulapo. Tala, via vembikilua posi vokati kombalaka yange. Opalata yi li kosi yaco.

²² Oco Yehosua wa tuma olomunga, yu via lupukila kombalaka. Kuenje tala ovikuata viaco via vembikilua vombalaka yaye. Opalata ya kala kosi yaco.

²³ Va vi upa vokati kombalaka, yu va vi nena ku Yehosua ku va Isareli vosi, kuenje va vi tulila kovaso a Yehova.

²⁴ Yehosua kumue la va Isareli vosi, va kuata Akani omõla a Sera, lopalata yaco, lokapote, locinimbu culu, lomala vaye valume, lomala vaye vakãi, lolongombe viaye, lovimbulu viaye, lolomeme viaye, lombalaka yaye, leci cosi a kala laco. Va enda lavio kocimbota ca Akore.

²⁵ Yehosua hati, Wa tu talisila nye ohali? Etaili Yehova o ku talisavo ohali. Kuenje va Isareli vo sosola lovawe. Vava yoka londalu, va va sosola lovawe.

²⁶ Va lundika ondunda yinene yovawe, haiko yi kasi toke etaili lilo. Kuenje Yehova wa liweka konyeño yaye ya tokota. Oco toke etaili lilo ocitumãlo caco va ci tukola vati, Ocimbota ca Akore.