YEHOSUA 6 - Embimbiliya - Bíblia Sagrada em Umbundu

¹ Yeriko puãi ya liyikila sito va Isareli posamua lovokati. Lomue wa tunda, lomue wa iñila.

² Yehova wa popia la Yehosua, hati, Tala, nda eca Yeriko peka liove, losoma, yaco lalume vaco va pama vakuotõi.

³ Ene vosi walume vakuavita, ñuali imbo. Ñualiko lumosi. Eci oco vu linga oloneke epandu.

⁴ Ovitunda epanduvali vi ambate anguena epanduvali olombinga viovitupi, kuenje vi pite kovaso yocikasa. Keteke liepanduvali ñuali imbo olonjanja epanduvali, kuenda ovitunda vi sike anguena.

⁵ Eci va sika ombinga yocitupi, kuenda eci vu yeva ocileñi cenguena, oco omanu vosi va kaluke londaka yalua. Ocimbaka cimbo ci leñuha, kuenje omunu omunu, puosi a suñama haipo a lamanela.

⁶ Oco Yehosua, omõla a Nune, wa kovonga ovitunda, wa popia lavo hati, Yeluli ocikasa covisila. Ovitunda epanduvali viambate anguena epanduvali olombinga viovitupi, kuenje vi pite kovaso yocikasa ca Yehova.

⁷ Wa popia lomanu hati, Kuendi, ñuali imbo, kuenda alume va maleha va pite kovaso yocikasa ca Yehova.

⁸ Eci Yehosua a popia lomanu, oco ovitunda epanduvali vina viambata anguena epanduvali olombinga viovitupi kovaso a Yehova, via fetika oku enda, yu via sika anguena. Ocikasa covisila via Yehova ca va kuama.

⁹ Alume va maleha va pita kovaso yovitunda via sika anguena. Owiñi wosi wa kuama vonyima yocikasa, osimbu ovitunda via kala loku enda loku sika anguena.

¹⁰ Yehosua wa handelekele omanu, hati, Ko ka kaluki, ondaka yene ka yi ka yevale, vomela wene ka mu ka tunde yimue ondaka toke eteke ndu tumili siti, Kaluki. Oco vu kaluka noke.

¹¹ Oco ocikasa ca Yehova ca ñuala imbo, ca ñualako lumosi. Noke va tiukila kocilombo kuenje va lala vocilombo.

¹² Yehosua wa pasuka omele ociteketeke, kuenje ovitunda via yelula ocikasa ca Yehova.

¹³ Ovitunda epanduvali vina viambata anguena epanduvali olombinga viovitupi, via pita kovaso yocikasa ca Yehova, via enda loku sika anguena. Alume va maleha va pita kovaso yavo, kuenje owiñi wosi wa kuama vonyima yocikasa ca Yehova, osimbu ovitunda via kala loku enda loku sika anguena.

¹⁴ Keteke liavali, va ñuala imbo lumosi, kuenje va tiukila kocilombo. Haico va linga oloneke epandu.

¹⁵ Keteke liepanduvali, va pasuka omele kongula. Va ñuala imbo ndeci va lingainga ale, va ñualako olonjanja epanduvali. Te lika okuti keteke liaco va ñuala imbo olonjanja epanduvali.

¹⁶ Oco konjanja yepanduvali, eci ovitunda via sika anguena, Yehosua wa popia lomanu, hati, Kaluki, momo Yehova wa wihi imbo.

¹⁷ Imbo liaco la cosi ci kasimo, ca siñaliwa ku Yehova. Te lika Rahava ocipuepue, eye o kala lomuenyo la vosi va kasi laye vonjo, momo wa vundisile olomunga tua tumile.

¹⁸ Puãi ene liuviki kocina cosi ca siñaliwa, sanga eci vu kuata kocina caco ca siñaliwa, vu kokela esiñalo ocilombo ca Isareli ho ci tatamisa.

¹⁹ Puãi opalata yosi lulu, lovikuata viosipi lutale, vi kola ku Yehova, vi kapiwe vovokuasi a Yehova.

²⁰ Oco omanu va kaluka. Olombeta via totãla. Eci omanu va yeva ocileñi columbeta, oco omanu va kaluka londaka ya lua, kuenje ocimbaka ca leñuha lukutu! Oco omanu va iñila vimbo, omunu omunu puosi a suñama haipo a lamanela, kuenje va kuata imbo.

²¹ Cosi ca kala vimbo, va ci kundula pe lomela wosipata, ci kale ulume lukãi, ci kale omõla lekongo, longombe lomeme locimbulu.

²² Yehosua wa popia lalume vavali, vana va ka kulĩhĩsile ofeka, hati, Iñili vonjo yocipuepue, upimo ukãi waco lava vosi va kasi laye, ndeci wa lisilili laye.

²³ Amalehe vaco, olondavululi, va iñila, yu vopamo Rahava la isiaye, la inaye, la vamanjaye, la vosi vangandiaye. Vopamo vosi vakuepata liaye, yu va va tumalisa posamua yocilombo ca Isareli.

²⁴ Imbo va li yoka londalu leci cosi ca kalamo. Te lika opalata lulu, lovikuata viosipi levi viutale, va vi kapa vovokuasi onjo ya Yehova.

²⁵ Puãi Rahava, ocipuepue, locikumba ca isiaye, lava vosi va kala laye, Yehosua wa popela omuenyo wavo. Eye wa tunga pokati ka va Isareli, toke etaili lilo, momo wa vundisile olomunga vina Yehosua a tumile oku kũlĩhisa Yeriko.

²⁶ Yehosua wa va kundika ocikundi yu wa lisinga hati, Wosi o katuka ha tumbulula imbo eli lia Yeriko a siñaliwe kovaso a Yehova. Poku seveta ociseveto calio, o peselapo omuenyo womolaye uveli. Poku sembika olombundi vialio, o peselapo omuenyo wa kuasula kuaye.

²⁷ Oco Yehova wa kala kumue la Yehosua, kuenje oluhimo luaye lua yevala vofeka yosi.