YEHOSUA 5 - Embimbiliya - Bíblia Sagrada em Umbundu

¹ Olosoma viosi via va Amori vana va kala kutakelo wa Yordão, lolosoma viosi via va Kanana va lisungue lokalunga, eci vai yeva ndomo Yehova a takatisilile ovava a Yordão kovaso a va Isareli toke tua yoka, oco ka va kaile vali lutõi, ovitima viavo via soyela va Isareli.

² Koloneke viaco, Yehova wa popia la Yehosua, hati, Lipangela olomoko viovawe, seva vali va Isareli onjanja yavali.

³ Yehosua yu wa lipangela olomoko viovawe, kuenje wa sevela va Isareli komunda ya Haraloti.

⁴ Eci ca kokisa Yehosua oku va seva, ceci: Omanu vosi va tundile kEgito, alume vaco, ndokuti alume vosi vakuavita, va fila vonjila yovekalasoko kovaso yokutunda kuavo kEgito.

⁵ Omanu vosi va tundile kEgito, va sevelue evamba. Puãi omanu vosi va citilua vekalasoko vonjila yoku tunda kEgito, ka va seviwile.

⁶ Momo va Isareli vosi va enda akui akuãla kanyamo vekalasoko, toke omanu vosi, alume vakuavita vana va tundile kEgito, va taka, momo ka va yevelele kondaka ya Yehova. Yehova wa lisinga lavo okuti ka va muisa ofeka yina Yehova a lisilile lolosekulu viavo oku tu yiha, haiyo ofeka yi tumoha asenjele lowiki.

⁷ Puãi wa piñainyapo omala vavo. Ava ovo Yehosua a seva momo ka va seviwile, ka va seviwile vonjila.

⁸ Eci va mala oku seva omanu vosi, oco va kala vocilombo toke va kaya.

⁹ Yehova wa popia la Yehosua, hati, Etaili ndo tiñululi ocilemo cesepu li Egito. Oco ocitumalo caco va ci tukula vati, Giligali, ca lomboloka Tiñulula, toke etaili lilo.

¹⁰ Va Isareli va kala vocilombo ko Giligali. Va lia o Pascoa koñolosi, keteke liekui lakuãla liosai, vatapi a Yeriko.

¹¹ Hela lia kuama ko Pascoa, eteke liaco hailio, va lia kovaima ofeka, lakende ka a kuete etumbisa, lolukango.

¹² Eci va lia kovaima ofeka, hẽla liaco mana ya imuha. Unyamo waco va lia kepako liofeka ya Kanana.

¹³ Eci Yehosua a kala ocipepi la yeriko, wa petula ovaso, wa vanja, kuenje ota, ulume umue o tãi kovaso aye, losipata peka, wa yi somolamo. Yehosua wamela kokuaye, kuenje wa popia laye hati, Ove hẽ, wuwetu, ale o tiamela kovanyali vetu?

¹⁴ Eye hati, Hacoko, ame kesongo kolohoka via Yehova. Ndeya kaliye. Yehosua wa tuvika ocipala caye posi, wo fendela, yu wa popia laye hati, Cime cange o popia nye lukuenje waye?

¹⁵ Kesongo kolohoka via Yehova wa popia la Yehosua, hati, Lula olohaku kolomãi viove, momo apa o tãi pa kola. Kuenje Yehosua wa ci linga.