YEHOSUA 4 - Embimbiliya - Bíblia Sagrada em Umbundu

¹ Eci omanu vosi va puako oku yoka Yordão, Yehova wa popia la Yehosua hati,

² Noli pomanu alume ekui lavavali, kepata lepata ku tunda ulume.

³ Va sapuila huti, Nyañuli ovawe ekui la avali vokati ka Yordão, pana ovitunda vi tai sĩu, a ambati, ka a tulili oku vu ka lalela uteke ulo.

⁴ Oco Yehosua wa kovonga alume ekui lavavali vana a nola pu va Isareli, kepata lepata ulume.

⁵ Yehosua wa popia lavo hati, Piti kovaso yocikasa ca Yehova Suku yene, vokati ka Yordão. Omunu lomunu a tikule ewe, a li ambate pocitai, ndokuti epata ewe, epata ewe, ndapata a va Isareli.

⁶ Oco eci ci lingi ondimbukiso pokati kene okuti koloneke viyako, eci omala vene vo puli, vati, Ovawe a o lomboloki ndati?—

⁷ oco vu va kumbulula hoti, Ovava a Yordão a kotokelele kovaso yocikasa covisila via Yehova. Eci ca yoka Yordão, oco ovava a Yordão a kotuiwile. Ovawe a, ku va Isareli a linga ndonjivaluko oloneke ka vi pui.

⁸ Va Isareli va linga ndomo Yehosua a va sapuila. Va tikula ovawe ekui la avali vokati ka Yordão, ndeci Yehova a popele la Yehosua, okuti epata ewe, epata ewe, ndapata a va Isareli. Va a ambata, kuenje va a tulila apa va lala.

⁹ Yehosua wongekavo ovawe ekui la avali vokati ka Yordão, apa pa talamele olomai viovitunda, vina viambata ocikasa covisila. Haiko a kasi, toke etaili lilo.

¹⁰ Momo ovitunda vina viambata ocikasa via talama vokati ka Yordão, toke cosi Yehova a tumile Yehosua oku sapuila omanu ca malusuka, kuenda ca lingiwa ndeci cosi Mose a sapuila Yehosua. Kuenje omanu va yayulako, ya va yoka.

¹¹ Eci omanu vosi va puako oku yoka, oco ocikasa ca Yehova ca yokavo kumue lovitunda, kovaso omanu.

¹² Va Ruvene, la va Gadi, lonepa yepata lia Manase, va maleha yu va pita kovaso ya va Isareli, ndeci Mose a va ci popele.

¹³ Alume va soka akui akuãla kolohũlũkãi va malehela ovita, va pita kovaso a Yehova ha va yakela katapi a Yeriko.

¹⁴ Eteke liaco Yehova wa kemainyaila Yehosua kovaso a Isareli yosi, kuenje vo sumbila ndeci va sumbilile Mose oloneke viosi viomuenyo waye.

¹⁵ Yehova wa popia la Yehosua hati,

¹⁶ Sapuila ovitunda via ambata ocikasa covisila, okuti va tunde ko Yordão.

¹⁷ Oco Yehosua wa sapuila ovitunda, hati, Tundi vo Yordão.

¹⁸ Eci ovitunda vina viambata ocikasa covisila via Yehova via tunda vokati ka Yordão, leci olomai viovitunda via liata kongongo, oco ovava a Yordão a litiukamo, kuenje a samohaila kovingeingei vialuo viosi, ndomo a kala ale.

¹⁹ Omanu va tunda vo Yordão keteke liekui kosãi yatete, kuenje va tunga ocilombo ko Giligali, kongave ya Yeriko, yokutundilo.

²⁰ Ovawe ekui la avali, ana vopile vo Yordão, Yehosua wa ongeka ondunda vo Giligali.

²¹ Wa popia la va Isareli, hati, Eci koloneke viyako omala vene vo puli vati, Ovawe a a lomboloka nye?—

²² oco vu lomboluila omala vene, hoti, Isareli wa yoka olui lulo Yordão posi ya kukuta.

²³ Momo Yehova Suku yetu wa takatisa ovava a Yordão kovaso ene, toke wa yoki, ndeci Yehova Suku yene a lingile ko Kalunga Kakusuka, kana a takatisilile kovaso etu toke tua yoka.

²⁴ Oco omanu vosi vokilu lieve va limbuke okuti eka lia Yehova lia pama, lene ho sumbi Yehova Suku yene oloneke ka vi pui.