YEHOSUA 3 - Embimbiliya - Bíblia Sagrada em Umbundu

¹ Yehosua wa pasuka omele ociteketeke, wa tunda ko Sitimi, eye kumue la va Isareli vosi. Va pitila ko Yordão, oko va lale osimbu ka va yokile handi.

² Kovaso yoloneke vitatu, vakesongo va ñuala vocilombo.

³ Va sapuila omanu vati, Eci vu mõla ocikasa covisila via Yehova Suku yene okuti ovitunda va Lewi va cambata, oco apa vu kasi vu tundapo, ho ci kuama.

⁴ Pokati kene laco pa kale ekangalo lia soka olohulukãi vivali kovikeya. Ko ka cami ocipepi oco vu mole onjila wendi layo, momo onjila yaco ka wa la yi piti.

⁵ Yehosua wa popia lomanu hati, Liyelisi, momo hẽla Yehova o linga ovikomo pokati kene.

⁶ Yehosua wa popia lovitunda, hati, Yeluli ocikasa covisila, piti kovaso yomanu. Oco va yelula ocikasa covisila, yu va pita kovaso yomanu.

⁷ Yehova wa popia la Yehosua hati, Etaili ndi fetika oku ku kemainyaila kovaso a Isareli yosi, oco va limbuke okuti ndeci nda kala la Mose, haico ñala love.

⁸ Sapuila ovitunda viambata ocikasa covisila huti, Eci vu pitila kocingeingei covava a Yordão, talami vo Yordão.

⁹ Yehosua wa popia la va Isareli, hati, Enjui kulo, ndo yeveleli olondaka via Yehova Suku yene.

¹⁰ Yehosua hati, Vu laika oku limbuka okuti Suku Ukuamuenyo o kasi pokati kene, kuenje ka pumbi oku tundisa kovaso ene va Kanana, la va Hiti, la va Hiwi, la va Perisi, la va Girigasi, la va Amori, la va Yevusi. Vu ci limbuka ndomo:

¹¹ Ota, ocikasa covisila via Ñala yilu lieve liosi ci pita kovaso yene vo Yordão.

¹² Kaliye noli alume ekui lavavali vokapata a Isareli, kepata lepata ku tunda ulume.

¹³ Tuli olomai viovitunda vina viambata ocikasa ca Yehova, Ñala yilu lieve liosi, vi liatela vovava a Yordão, oco ovava a Yordão a kotuiwa, ovava a tunda konano a talama, a linga ondunda.

¹⁴ Oco omanu va tunda kolombalaka viavo ha va yoka Yordão, kuenda ovitunda viambata ocikasa covisila va pita kovaso yomanu.

¹⁵ Eci ava vambata ocikasa va pitila ko Yordão, leci olomai viovitunda vina viambata ocikasa via yava vovava okocingeingei, momo otembo yosi yoku ungula olui Yordão lu samohaila kovingeingei vialuo viosi,

¹⁶ oco ovava a tunda konano a talama, a linga ondunda, konano muẽle, kimbo lia Adama hailio li lisungue la Saretana. Kuenda ovava akuavo ana a lokila kokalunga koketapi, haiko okalunga komongua, a tepako pese! Kuenje omanu va yokila apa pa lisuñama la Yeriko.

¹⁷ Ovitunda vina viambata ocikasa covisila via Yehova, via talama siũ posi ya kukuta vokati ka Yordão, osimbu va Isareli vosi va yokila posi ya kukuta, toke omanu vosi va puako oku yoka Yordão.