YEHOSUA 24 - Embimbiliya - Bíblia Sagrada em Umbundu

¹ Yehosua wongoluila ko Sekeme apata osi a va Isareli, yu wa kovonga akulu va va Isareli, lasongui vavo, lolonganji viavo la vakesongo vavo. Kuenje va liongoluila kovaso a Suku.

² Yehosua wa popia lomanu vosi, hati, Ca popia Yehova, Suku ya Isareli, ceci, hati, Kosiãhulu olosekulu viene Tera, isia ya Avirahama la Nahore, via tungile kesinya liolui, kuenje via vumbaile olosuku vikuavo.

³ Ndopa sekulu yene Avirahama sinya olio liolui. Ndo songuila loku u ñualisa ofeka yosi ya Kanana. Nda luisa ombuto yaye kuenje nda wiha Isake.

⁴ Isake nda wiha Yakoba la Esau. Esau nda wiha omunda ya Seire ha yi lingi yaye. Puãi Yakoba kumue lomala vaye va lokila kEgito.

⁵ Nda tuma Mose la Arone, kuenda nda yambula Egito lovikomo nda linga vokati kalio, noke nda wupimo.

⁶ Ndopa olosekulu viene vEgito, kuenje weyi kokalunga. Va Egito va landula olosekulu viene lakalu lavakuakuendela kotuvalu, toke ko Kalunga Kakusuka.

⁷ Eci va vilikiya ku Yehova, eye wa kapa owelema pokati kene la va Egito. Wa volumuila okalunga, yu ka va tuvika. Ovaso ene a mõla eci nda linga la Egito. Kuenje wa kali vekalasoko osimbu yalua.

⁸ Ndo tuali kofeka ya va Amori va tunga kesinya lia Yordão. Va yaka lene, kuenje nda va eca peka liene. Ofeka yavo ya linga yene, kuenje nda va kunduila kovaso ene.

⁹ Oco Balaka, omõla a Cipora, Soma ya Moavi, wa katuka yu wa liyaka la va Isareli. Wa tuma oku vilikiya Baliame, omõla Beore, ho siñali.

¹⁰ Puãi sia tavele oku yeva Baliame, oco eye wo sumuluisi kuenje ndo popeli peka liaye.

¹¹ Wa yoki Yordão, yu weyi ko Yeriko. Omanu va Yeriko va liyaka lene, ndaño va Amori, la va Perisi, la va Kanana, la va Hiti, la va Girigasi, la va Hiwi, la va Yevusi. Kuenje nda va eca peka liene.

¹² Nda livangisa kovaso ene alimbondue, hao a tundisa kovaso ene olosoma vivali via va Amori, halosipata yoveko pamue lohonji yove.

¹³ Nda wihi ofeka yina ka wa limili. Wa tumali vovaimbo ana ka wa tungili. Wa li koviumbo viayuva lokoviumbo violiveira vina ka wa tuikili.

¹⁴ Oco cilo sumbi Yehova. U vumbi lutima wosi locili. Tundisi olosuku vina via vumbile olosekulu viene kesinya liolui lo kEgito. Kuenje vumbi Yehova.

¹⁵ Nda wa soki hoti, Oku vumba Yehova civi, oco noli etaili u vu yongola oku vumba, nda olosuku via vumbile olosekulu viene kesinya liolui, nda olosuku via va Amori vana wa tungi vofeka yavo. Puãi ame kumue lonjo yange, tu vumba Yehova.

¹⁶ Oco omanu va kumbulula vati, Ocisimilo coku yanduluka Yehova ha tu vumbi olosuku vikuavo, ci kale ocipãla letu.

¹⁷ Momo Yehova Suku yetu, eye wa tu upa kofeka yEgito, konjo yupika, etu kumue lolosekulu vietu. Haeye wa lingila ovilimbu evi vinene kovaso etu. Wa tu lava vonjila yosi tua endela, lopokati komanu vosi tua pita.

¹⁸ Kuenda Yehova wa tundisa omanu vosi kovaso etu, la va Amori vana va tungile vofeka. Oco letuvo tu yongola oku vumba Yehova. Momo eye Suku yetu.

¹⁹ Yehosua wa popia lomanu, hati, Ko tẽla oku vumba Yehova. Momo eye Suku o kola, haeye Suku ukuesepa. Ka ecela olongole viene, ndaño akandu ene.

²⁰ Nda vu yanduluka Yehova loku vumba olosuku viñi, oco eye ndaño wo lingi ciwa, o laika oku ñualapo ho lingi civi, toke vu puapo.

²¹ Omanu va popia la Yehosua vati, Hacoko, etu tu yongola oku vumba Yehova.

²² Yehosua wa popia lomanu hati, Ene muẽle vulombangi viokuti wa noli Yehova oku u vumba. Va popia vati, Etu muẽle tulombangi.

²³ Eye hati, Oco tundisi olosuku viñi vi kasi pokati kene. Tiamisi ovitima viene ku Yehova, Suku ya Isareli.

²⁴ Omanu va popia la Yehosua vati, Yehova Suku yetu, eye tu vumba, londaka yaye oyo tu pokola.

²⁵ Oco eteke liaco, ko Sekeme, Yehosua wa lisila lomanu, kuenje wa va iha ovisila lovihandeleko.

²⁶ Yehosua wa soneha olondaka viaco velivulu liovihandeleko via Suku. Wa nyañula ewe linene, wa li sembika vemehi liocinendele pocitumãlo ci kola ca Yehova.

²⁷ Yehosua wa popia lomanu vosi, hati, Ewe lilo lia linga ombangi yetu. Momo lia yeva olondaka viosi Yehova a popia letu, lio lingili ombangi, sanga vu likala Suku yene.

²⁸ Oco Yehosua wa sandula omanu, yu va enda omunu omunu kocipiñalo caye.

²⁹ Kovaso yovina evi, oco Yehosua, omõla a Nune, ukuenje wa Yehova, wa fa. Wa tela ocita lekui kanyamo.

³⁰ Vo kenda volongave viocipiñalo caye, ko Timinata Sera, volomunda via Efarimi, ko Norte yomunda Gasi.

³¹ Va Isareli va vumba Yehova oloneke viosi via Yehosua, loloneke viosi viakulu vokotembo ya Yehosua, vana va kulihile upange wosi Yehova a lingile Isareli.

³² Akepa a Yosefe, ana va Isareli va tundile lao kEgito, va a kenda ko Sekeme, vusenge Yakoba a landele locita colombongo komala va Hamore, isia ya Sekeme. Usenge waco wa linga ocipiñalo ca va Yosefe.

³³ Eleasara, omõla a Arone, wa fa. Vo kenda ko Givea, kimbo liomõlaye Finehase, lina va wihile kolomunda via Efarimi.