YEHOSUA 23 - Embimbiliya - Bíblia Sagrada em Umbundu

¹ Oloneke vialua via pitapo, tunde apa Yehova a muisa Isareli ombembua kovanyali vaye vosi vo ñuala. Cilo Yehosua wa kuka haeye ekongo.

² Oco Yehosua wa kovonga va Isareli vosi, lakulu vavo lasongui vavo, lolonganji viavo, lavakesongo vavo. Wa popia lavo hati, Kaliye ame nda kuka, kuenda nda linga ekongo.

³ Wa moli cosi Yehova Suku yene o lingili lolofeka evi viosi, momo Yehova Suku yene, eye wo yakeliko.

⁴ Olofeka evi via supapo kumue lolofeka viosi nda kundula ale, tunde ko Yordão toke kokalunga kanene kutakelo, tala, ndo vĩhĩ locela ha vi lingi ocipiñalo capata ene.

⁵ Yehova Suku yene o va lupuisa kuenda o va tundisa kovaso ene. Ofeka yavo yi linga yene, ndeci Yehova Suku yene o ci popeli.

⁶ Oco kolisiko muele oku lava loku linga cosi ca sonehiwa velivulu liovihandeleko via Mose, oco ko ka pambukimo ha wendi kondio pamue kepĩli.

⁷ Ko ka litengi lolofeka evi via supa ndeti pokati kene. Ko ka tukuli olonduko violosuku viavio, ndaño oku lisinga lavio. Ko ka vi vumbi ndaño oku vi fendela.

⁸ Puãi kakateli Yehova Suku yene, ndeci wa lingi toke etaili lilo.

⁹ Momo Yehova wa tundisa kovaso ene olofeka vinene, haivio via pama. Puãi ene, toke etaili lilo, lomue wa tẽla oku litamalala lene.

¹⁰ Omunu umuamue pokati kene o lundula ohulũkãi yomanu, momo Yehova Suku yene, eye u yakeliko, ndeci o ci popeli.

¹¹ Oco lilavi lutate, ho soli Yehova Suku yene.

¹² Nda vu naleli konyima loku litokeka locisupe colofeka via supa ndeti pokati kene, kuenda nda vu likuelela, ho li tengi lavo, lovo ha va litengi lene,

¹³ oco ci kulihi muẽle okuti Yehova Suku yene ka kuatako vali oku tundisa olofeka evi kovaso ene. Puãi viu lingili ndulivi kuenda ndonjanjo, ndoluhava volomati viene kuenda ndolosongo vovaso ene, toke vu kunguki vofeka yilo yiwa, yina ya wihi Yehova Suku yene.

¹⁴ Kaliye nda wila vonjila yomanu vosi vokilu lieve. Ene vosi wa kulihi vovitima viene lovolonulo viene, okuti polondaka viosi viwa Yehova Suku yene o popeleli, layimue ya kambapo. Viosi muele vio suisiluipo. Layimue ya kambapo.

^15-16 Ndeci olondaka viosi viwa vina Yehova Suku yene o popeleli vio telisilui, haico Yehova a laika oku vu suisilapo ovina viosi vivi, toke o kunduli vofeka yilo yiwa ya wihi Yehova Suku yene, kuenda nda wendi loku vumba olosuku vikuavo ho vi fendela, oco onyeño ya yehova yu wengukili kuenje vu kunguka lombili vofeka yiwa yina eye a wĩhĩ.