YEHOSUA 22 - Embimbiliya - Bíblia Sagrada em Umbundu

¹ Oco Yehosua wa kovonga va Ruvene la va Gadi lonepa yepata lia Manase.

² Wa popia lavo hati, Wa lingi cosi Mose ukuenje wa Yehova o sapuili. Wa pokoli kondaka yange kueci cosi ndo sapuili.

³ Oloneke evi viosi, toke etaili lilo, vakuene ka wa va silipo, puãi wa lavi ocikundi cocihandeleko ca Yehova Suku yene.

⁴ Cilo Yehova Suku yene wa muisa vakuene epuyuko, ndeci a va likuminyile. Oco tiukili, kuendi kolombalaka viene, vofeka wa tambuli, yina Mose ukuenje wa Yehova a wĩhĩ kesinya lia Yordão.

⁵ Cinene kuatiko oku linga lutate olondaka lovihandeleko vina Mose ukuenje wa Yehova o handelekeli, ho soli Yehova Suku yene, loku endela volonjila viaye viosi, loku lava ovihandeleko viaye, loku u kakatela, loku u vumba lutima wene wosi lomuenyo wene wosi.

⁶ Oco Yehosua wa va sumuluisa, yu wa va eca. Kuenje va enda kolombalaka viavo.

⁷ Onepa yimue yepata lia Manase, Mose wa yihile ocipiñalo ko Basiane. Puãi onepa yikuavo, Yehosua wa yiha ocipiñalo kumue lavangandiavo kesinya lilo lia Yordão, kutakelo. Eci Yehosua a va eca ha va endi kolombalaka viavo, wa va sumuluisa.

⁸ Wa popia lavo hati, Tiukili kolombalaka viene lukuasi walua, loviunda vialua, lopalata lulu losipi lutale luwalo walua. Litepeli lavakuene ovikuata wa pundi kovanyali vene.

⁹ Va Ruvene la va Gadi lonepa yepata lia Manase va tiukila, va litepa la va Isareli ko Silo, vofeka ya Kanana, ha va endi kofeka ya Gileada, kofeka yavo muẽle, yina va tambuile, ndeci ca handelekele Yehova lomela wa Mose.

¹⁰ Eci va pitila konele ya Yordão, vofeka ya Kanana, va Ruvene la va Gadi lonepa yepata lia Manase va tunga utala ocipepi la Yordão, Utala waco unene, oku u vanja u tunguisa ovaso.

¹¹ Va Isareli va yeva vati, Tali, va Ruvene la va Gadi lonepa yepata lia Manase va tunga utala kongave yofeka ya Kanana, ocipepi la Yordão, konele yi tiamela ku va Isareli.

¹² Eci va Isareli va ci yeva, oco va Isareli vosi va liongoluila ko Silo, ha va katuka oku yaka lavo.

¹³ Va Isareli va tuma Finehase, omola ocitunda Eleasara, ku va Ruvene loku va Gadi lokonepa yepata lia Manase, vofeka ya Gileada.

¹⁴ Vo tuma kumue lekui liolombuale. Epata lepata lia va Isareli lia tuma ombuale yalio, haeye ukulu wepata, pokati kolohũlũkãi viomanu va Isareli.

¹⁵ Veya ku va Ruvene lo ku va Gadi lokonepa yepata lia Manase, vofeka ya Gileada, kuenje va popia lavo, vati,

¹⁶ Ca popia ohongele yosi ya Yehova ceci, Ongole eyi wa lueyeli layo Suku ya Isareli, ya lomboloka ndati? Nye wa pambukili koku kuama Yehova etaili, yu wa litungili utala, ho ñualelapo Yehova etaili?

¹⁷ Ekandu lioko Peore lia kala nga liaño? Lopo etaili lilo ka tua lipuile kondaka yaco, ndaño efengi lia vetele ohongele ya Yehova.

¹⁸ Kuenje ene cilo vu yongola oku pambuka koku kuama Yehova? Etaili nda vu ñualelapo Yehova, hẽla eye o temela va Isareli vosi.

¹⁹ Nda ofeka yene ya viha, yokili vofeka ya Yehova, muna muli ombalaka ya Yehova, oco vu tunge pokati ketu. Puãi ko ka ñualelipo Yehova pamue oku tu ñualelapo etu, loku litungila utala wiñi, loku siapo utala wa Yehova Suku yetu.

²⁰ Akani, omõla a Sera, ka lingile hẽ ekandu oku lamba kovina via siñaliwa, yu onyeño ya wila va Isareli vosi? Heyeko lika wa nyolehela ekandu liaye.

²¹ Oco va Ruvene la va Gadi lonepa yepata lia Manase va kumbulula, va popia lakulu volohũlũkãi viomanu va Isareli, vati,

²² Yehova Suku Ukuonene, Yehova Suku Ukuonene, eye o ci kuenda Isareli o ci kulihavo. Nda tua ci lingila oku ñualelapo Yehova, pamue oku lueyela, oco etaili ku ka tu popele.

²³ Nda tua tunga utala ha tu pambuka koku kuama Yehova, pamue nda tua ci lingila oku lumbilako ovilumba vioku pia elisi, lovilumba violomema, lovilumba viombembua, oco muẽle Yehova a ci fetuluinye.

²⁴ Hacoko, puãi tua ci linga omo tua kala lohele, tuti, Sanga kovaso yoloneke omala vene va popia lomala vetu, vati, Vu likuetele nye la Yehova Suku ya Isareli?

²⁵ Ene a va Ruvene, lene a va Gadi, pokati ketu lene Yehova wa kapapo olui Yordão ndongave. Lacimue vu likuetele la Yehova. Nda oco omala vene va laika oku liwekisa omala vetu oku fendela Yehova.

²⁶ Oco tua popia tuti, Tu litungili utala umue, hawoku lumbilako ovilumba vioku pia elisi pamue ovilumba vikuavo;

²⁷ puãi u linga utala wuvangi pokati ketu lene, lopokati kovitumbulukila vi tu kuai, okuti tuakuakuvumba kovaso ya Yehova lovilumba vietu vioku pia elisi lovilumba vikuavo, lovilumba viombembua. Oco kovaso yoloneke, omala vene ka va ka popie lomala vetu vati, Lacimue vu likuetele la Yehova.

²⁸ Oco tua popia tuti, Kovaso yoloneke nda va popia ndoco letu pamue lava va tu kuai, oco etu nda tu popia tuti, Tali ocisetahãi cutala wa Yehova, cina olosekulu vietu via pangele, hacoku lumbilako ovilumba vioku pia elisi, pamue ovilumba vikuavo, te lika oku linga nduvangi pokati ketu lene.

²⁹ Ka tua simile ale oku ñualelapo Yehova, loku pambuka koku kuama Yehova, etaili, ha tu tungi utala wovilumba vioku pia elisi, lovilumba violomema, lovilumba vikuavo, woku vandeka vali kutala wa Yehova Suku yetu, una o kasi kovaso yombalaka yaye.

³⁰ Ocitunda Finehase kumue lolombuale viohongele, haivo akulu volohulũkãi via va Isareli, vana va kala laye, eci va yeva olondaka via popia va Ruvene la va Gadi la va Manase, oco va ci sola calua.

³¹ Finehase, omõla ocitunda Eleasara, wa popia la va Ruvene la va Gadi la va Manase, hati, Etaili tua limbuka okuti Yehova o kasi pokati ketu, momo ka wa lingilili Yehova ongole eyi. Kaliye wa popeli va Isareli peka lia Yehova.

³² Oco Finehase, omõla ocitunda Eleasara, kumue lolombuale, va litepa la va Ruvene, la va Gadi vofeka ya Gileada, kuenje va tiukila kofeka ya Kanana, ku va Isareli, yu va va tualela ondaka.

³³ Ondaka yaco ya sanjuisa va Isareli. Kuenje va Isareli va sivaya Suku. Ka va tukowaile vali oku va katuila ovita, ha va nyoli ofeka muna mua tunga va Ruvene la va Gadi.

³⁴ Va Ruvene la va Gadi va luka utala, vati, Uvangi. Vati, Momo pokati ketu wa linga nduvangi wokuti Yehova eye Suku.