YEHOSUA 20 - Embimbiliya - Bíblia Sagrada em Umbundu

¹ Yehova wa popia la Yehosua, hati,

² Popia la va Isareli, huti, Litukuili ovaimbo ovitililo, ana ndo sapuilili lomela wa Mose.

³ Nda omondi yipa omunu umue, puãi eye ka ci pangele ndaño oku ci sima, oco omo a tilila. Ovaimbo aco o lingili ovitililo kukuakufetuluinya osonde.

⁴ Omondi yi tilile kimbo limue liocitililo. A talame kepandavelo liombundi yimbo. A lomboluile akulu vimbo liaco ondaka yaye. Ovo va wiñisa vimbo, loku wiha ocitumalo ha tumala pokati kavo.

⁵ Nda ukuakufetuluinya osonde u landula, ka va ka ece omondi povaka aye. Momo ka ipaile ukuavo locipango, kuenda tete ko suvukile ale.

⁶ O tumala vimbo liaco, toke a talama kovaso yohongele ha yu tetuluila, kuenda toke kokufa kuocitunda cinene cokoloneke viaco. Oco noke omondi yi tiukile kimbo liaye lokonjo yaye, kimbo kuna a tilile.

⁷ Oco va tumbika Kedesi ko Galilea, kolomunda via Nafitali, la Sekeme, kolomunda via Efarimi, la Kiriyata Ariba, hailio Hevrone, kolomunda via Yuda.

⁸ Kesinya lia Yordão, kutundilo wa Yeriko, va tukulako Becere liokepata lia Ruvene, vekalasoko liovetapi. Kepata lia Gadi va tukulako Ramote ko Gileada, lokepata lia Manase va tukulako Golana ko Basiane.

⁹ Alo o ovaimbo a tukuilua va Isareli locingendeleyi ci kasi pokati kavo, oco nda umue ipa omunu puãi eye ka ci pangele, o tililamo, oco ka ka fe leka liukuakufetuluinya osonde, osimbu ka talamele handi kovaso yohongele.