YEHOSUA 2 - Embimbiliya - Bíblia Sagrada em Umbundu

¹ Yehosua, omõla a Nune, wa katula alume vavali ko Sitimi, wa va tuma uyombeki ndolondavululi, hati, Kuendi, kũlĩhisi ofeka kuenda Yeriko. Oco va enda, veya konjo yocipuepue cimue, onduko yaco Rahava, haiko va sikĩla.

² Soma ya Yeriko vo sapuila, vati, Tala, uteke ulo, mulo mua iñila alume vamue va Isareli, ha va kũlĩhisa ofeka.

³ Soma ya Yeriko wa tuma ku Rahava, hati, Tundisila posamua alume veya kokuove, vana va iñila vonjo yove, momo veya oku kũlĩhisa ofeka yosi.

⁴ Ukãi wa enda lalume vaco vavali, wa va vundisa. Kuenje wa popia hati, Ocili kokuange kueyile alume, puãi sia kũlĩhile oko va tunda.

⁵ Eci kua tekava, kowola yoku yika ombundi, oco alume va tunda. Oko alume vaco va endela, siko. Va landuli lombili, vu va sanga muẽle.

⁶ Eye puãi wa va londisa kolusoka luonjo, yu wa va sikĩlĩla lovisĩla violinyu a nyalehele kolusoka.

⁷ Omanu vaco va va landula vonjila yoko Yordão, toke kolonjiva viaco. Eci vakuakalandula va tunda, haico ombundi ya yikiwa.

⁸ Osimbu alume ka va pekelele handi, Rahava weya kokuavo kolusoka.

⁹ Wa popia lalume vaco hati, Nda kũlĩha okuti Yehova wa wihi ofeka. Vosi yetu tu vu kuetele onguele, kuenda vosi vakuafeka va soyela kovaso ene.

¹⁰ Momo tua yeva ndomo Yehova a takatisila kovaso ene ovava o Kalunga Kakusuka, cina wa tundi Egito, leci wa lingi lolosoma vivali via va Amori, Sihoni la Oge, kesinya lia Yordão, vana wa kunduli pe.

¹¹ Eci tua ci yeva, haico ovitima vietu via soya. Oku yeva oluhimo luene lomue vali pokati ketu wa kala lutõi. Momo Yehova Suku yene, eye Suku kilu liovailu la palo posi.

¹² Kaliye ndu pingi, lisili lame vonduko ya Yehova, okuti ndeci ame ndo lingi ohenda, haico vu lingilavo epata lia tate ohenda. Kuenda nyihi ondimbukiso yocili,

¹³ yokuti vu popela omuenyo wa tate la mai, lavamume vange, lavamanjange vakãi, lava vosi va kasi lavo, ho popela ovimuenyo vietu kokufa.

¹⁴ Alume va kumbulula ukãi vati, Tua lisila lovimuenyo vietu okuti nda ove ku sapula eci tu kasi oku endela tu ku muisa ohenda locili eci Yehova a tu ĩha ofeka.

¹⁵ Oco wa va lowisila ponjanela lukolo, momo onjo yaye ya kunamele kocimbaka cimbo; wa tungile kocimbaka.

¹⁶ Wa popia lavo hati, Kuendi komunda, sanga vakuakulandula vo sangi. Salamiko oloneke vitatu, toke vakuakulandula va tiukila. Oco wendi noke lonjila yene.

¹⁷ Alume va popia lukãi vati, Tu yongola oku yovoka kesingo liove eli wa tu lisingisa lalio.

¹⁸ Oco tala, eci tuiya vofeka, kutila ukolo u u kusuka ponjanela apa wa tu lowisila. Ongoluila vonjo yove so la nyoho lavamanjove locikumba cosi ca so.

¹⁹ Nda umue o tundila pombundi yonjo yove ha endi voluwa, osonde yaye yu wila eye muẽle, letu tu pua eko. Puãi nda umue imba eka omunu o kasi kumue love vonjo, osonde yaye yi tu wila etu.

²⁰ Nda ove o sapula ondaka eyi yetu, oco tu yovoka kesingo liove wa tu lisingisa lalio.

²¹ Rahava hati, Ci lingiwe ndolondaka viene. Oco wa va eca, yu va enda. Kuenje ukãi wa kutila ukolo u kusuka ponjanela.

²² Oco va enda, va pitila komunda kuenje va tumalako oloneke vitatu, toke vakuakulandula va tiukila. Vakuakulandula va va sandiliya vonjila yosi, puãi ka va va sangele.

²³ Oco alume vaco vavali va tiukila. Va loka komunda, yu va yoka, kuenje veya ku Yehosua, omõla a Nune. Vo sapuila cosi ca va sanga.

²⁴ Va popia la Yehosua vati, Ocili, Yehova wa eca ofeka yosi povaka etu, ndaño muẽle vakuafeka yaco, vosi va tu soyela.