YEHOSUA 18 - Embimbiliya - Bíblia Sagrada em Umbundu

¹ Va Isareli vosi va liongoluila ko Silo, kuenje oko va tamuluila ombalaka yoku ñualehela la Yehova. Ofeka ya pokola kokuavo.

² Pu va Isareli, pa siaile apata epanduvali ka a tepelelue handi ocipiñalo cao.

³ Yehosua wa popia la va Isareli, hati, Eteke li pi wimbipo eselula liene, ha wendi oku tambula ofeka, yina Yehova Suku yolosekulu viene a wĩhi?

⁴ Kepata lepata noliko alume vatatu. Ndi va tuma, kuenje va katuka ha va nyula ofeka, oco va sonehe ndomo yi kasi, lomo ya sesamela oku tepaiwa. Noke va tiuke kokuange.

⁵ Noke va yi tepe kolonepa epanduvali. Yuda a kale ño volongave viaye, ko Sul, lepata lia Yosefe li kale volongave vialio ko Norte.

⁶ Eci vu tepi ofeka kolonepa epanduvali, loku soneha ndomo yi kasi, neneli eci wa sonehi, kuenje ndu wimbili ocela kovaso a Yehova Suku yetu.

⁷ Puãi va Lewi pokati kene ka va kuetepo onepa. Momo utunda wa Yehova, owo ocipiñalo cavo. Gadi la Ruvene lonepa yepata lia Manase va tambula ale ocipiñalo cavo kesinya lia Yordão, kutundilo, cina Mose ukuenje wa Yehova a va ĩha.

⁸ Oco alume va katuka, kuenje va enda. Yehosua wa kundika ava va enda oku soneha ofeka, hati, Kuendi, ka nyuli ofeka, yi sonehi ndomo yi kasi, noke tiuki vali kokuange, kuenje ndu wimbili ocela kovaso a Yehova, ko Silo.

⁹ Oco alume vaco va enda, yu va ñuala ofeka, kuenje va yi soneha velivulu imbo limbo loku yi tepa kolonepa epanduvali. Noke va tiukila ku Yehosua kocilombo ko Silo.

¹⁰ Yehosua wa va imbila ocela kovaso a Yehova, ko Silo. Haiko Yehosua a tepaila va Isareli ofeka, epata lepata onepa yalio.

¹¹ Ocela ca veta va Benjamini, ndapata avo. Olongave viofeka yavo via kala pokati ka va Yuda la va Yosefe.

¹² Ko Norte, ongave yavo yopisa ko Yordão. Noke ongave yaco ya lamanela konele yo Norte ya Yeriko, kuenje ya kandulukila kolomunda loku loña kutakelo, yu ya sulila vekalasoko lia Betavene.

¹³ Oku tundako, ongave ya pita ko Lusi, ko Sul ya Lusi, hailio Betele. Noke ya pita komunda yi kasi ko Sul ya Bete Horone yokombuelo, kuenje ya lokila kAtaroti Adara.

¹⁴ Konele yutakelo, ongave yaco ya ñualela ko Sul, tunde komunda yoko Sul haiyo ya lisuñama la Bete Horone, kuenje ya sulila ko Kiriyata Baale, hailio Kiriyata Yeari, imbo lia va Yuda. Eyi oyo ongave yokutakelo.

¹⁵ Ongave yoko Sul yopisa kesukiyo lia Kiriyata Yeari. Oku tundako ya loña kutundilo, toke kono yovava a Nefitoa.

¹⁶ Noke ongave yaco ya lokila konele yomunda ya lisuñama locimbota comola a Hinoma, haiyo yi kasi ko Norte yocimbota ca Refaimi. Ya lokila kocimbota ca Hinoma, ko Sul ya va Yevusi, toke kEnrogele.

¹⁷ Ya ñualela ko Norte, ya pita kEnisiemese, toke ko Gelilote, lia lisuñama lowulu wa Adumi. Noke ya lokila kewe lia Bohana, omola a Ruvene.

¹⁸ Ya pita konele ya lisuñama la Araba, ko Norte, yu ya lokila kAraba.

¹⁹ Ongave yaco ya vambala konele yo Norte ya Bete Hogila, yu ya sulila kocihondoloka coko Norte yokalunga komongua, haiko kasango a Yordão, ko Sul yaluo. Eyi oyo ongave yoko Sul.

²⁰ Olui Yordão, oluo ongave yavo yokutundilo. Eci oco ocipiñalo ca va Benjamini, ndapata avo volongave viavo vina via va ñuala.

²¹ Ovaimbo a va Benjamini ndapata avo, ya: Yeriko, Bete Hogila, Emeke Kesisi;

²² Betarava, Semarayi, Betele;

²³ Awimi, Para, Ofira;

²⁴ Kefaramoni, Ofini, Geva. Ovaimbo ekui la avali kumue lovikanjo viao.

²⁵ Giveone, Rama, Berote;

²⁶ Misipa, Kefira, Mosa;

²⁷ Rekeme, Iripele, Tarala;

²⁸ Cela, Elefe, Yevusi, hailio Yerusalãi, Givea, Kiriyata. Ovaimbo ekui la akuãla kumue lovikanjo viao. Eci oco ocipiñalo ca va Benjamini ndapata avo.