YEHOSUA 16 - Embimbiliya - Bíblia Sagrada em Umbundu

¹ Ocela ca va Yosefe copisa ko Yordão, ocipepi la yeriko, kutundilo wovava a Yeriko. Ongave yaco ya pita vekalasoko liopisila ko Yeriko toke kolomunda vi lisungue la Betele.

² Oku tunda ko Betele, ya enda ko Lusi, yu ya vambala kAtaroti, kongave ya va Ariki.

³ Ya lokila kutakelo kongave ya va Yafeleti, toke kongave ya Bete Horone yokombuelo, toke ko Gesere. Kuenje ya sulila vokalunga.

⁴ Oco va Yosefe, okuti va Manase la va Efarimi, va tambula ocipiñalo cavo.

⁵ Olongave via va Efarimi, ndapata avo, vievi: Ataroti Adara oyo ongave yocipiñalo cavo, kutundilo, toke ko Bete Horone yokonano.

⁶ Noke ya loña kutakelo ko Mikimeta, ko Norte. Kutundilo ongave yaco ya ñualela ko Taanata Silo, yu ya vambala kutundilo wa Yanoha.

⁷ Oku tunda ko Yanoha, ya lokila kAtaroti loko Naara, ya pitila ko Yeriko, yu ya sulila vo Yordão.

⁸ Oku tunda ko Tapuha, ongave ya loña kutakelo, toke kolui Kana, yu ya sulila vokalunga. Eci oco ocipiñalo ca va Efarimi, ndapata avo.

⁹ Va Efarimi va kalavo lovaimbo a va tepelua vocipiñalo ca va Manase, ovaimbo aco osi kumue lovikanjo viao.

¹⁰ Haimo lumue ka va tundisile va Kanana va kala vo Gesere. Oco va Kanana va tumãla pokati ka va Efarimi toke etaili lilo, puãi va linga apika voku linga upange wocikisika.