YEHOSUA 14 - Embimbiliya - Bíblia Sagrada em Umbundu

¹ Ovipiñalo va Isareli va tambula vofeka ya Manana, vina via va tepela ocitunda Eleasara la Yehosua, omõla a Nune, lakulu vapata a va Isareli, via kala ndomo:

² Apata ecea kumue lonepa yepata a tambula ovipiñalo viao loku imba ocela, ndeci Yehova a handelekele lomela wa Mose.

³ Momo Mose wa ihĩle apata avali lonepa yepata ocipiñalo kesinya lia Yordão. Puãi va Lewi ka va ihile ocipiñalo pokati kavo.

⁴ Omala va Yosefe, Manase la Efarimi va linga apata avali. Va Lewi ka va va ihile onele vofeka, te lika ovaimo oku tumalamo, kumue lovisenge viao, muna mua kala oviunda viavo levi va fuka.

⁵ Va Isareli va linga ndeci Yehova a sapuilile Mose, kuenje va tepa tepa ofeka.

⁶ Oco va Yuda veya ku Yehosua ko Giligali. Kuenje Kalembe, omõla a Yefune, u Kenesi, wa popia laye, hati, Wa kũlĩha eci Yehova a tu tukuilile ame love, cina a popele la Mose, omunu wa Suku, ko Kadesi Barnea.

⁷ Nda kala lanyamo akui akuãla eci Mose, ukuenje wa Yehova, a ñatuile ko Kadesi Barnea, si kũlĩhisa ofeka, kuenje ndo sapuila ndeci ci kala vutima wange.

⁸ Puãi vakuetu ndaile lavo, va kokela ovitima viomanu ekonyoho. Ame puãi nda kuama Yehova Suku yange lutima wosi.

⁹ Eteke liaco, Mose wa lisilile hati, Ocili, ofeka ya ka liatelele omãi yove, yi linga ocipiñalo cove lomala vove, otembo ka yi pui, momo wa kuama Yehova Suku yange lutima wove wosi.

¹⁰ Kaliye, tunde apa Yehova a popele ondaka eyi la Mose, cina va Isareli va ñuala ñuala vekalasoko, tala, Yehova wa ñalisa lomuenyo anyamo aco akuĩ akuãla la atãlo, ndeci a popele. Cilo etaili nda telisa anyamo akuĩ ecẽlãla la atãlo.

¹¹ Etaili lopo, momo nda pamela haimo, ndeteke Mose a ñatuile. Ongusu nda kaile layo kotembo yaco, haiyo ñasi layo etaili, nda kovita, nda poku tunda tunda lopoku iñaila.

¹² Cilo ngavele omunda eyi, ya tukuile Yehova eteke liaco. Momo eteke liaco ove wa yeva okuti oko kua tunga va Anaki kuenda kuli ovaimbo anene, a pama. Yehova mbi o kala lame, kuenje ndi va tundisa, ndeci ca popia Yehova.

¹³ Yehosua wo sumuluisa, kuenje wa eca omunda Hevrone ku kalembe, omõla a Yefune, ha yi lingi ocipiñalo caye.

¹⁴ Oco omunda Hevrone ya linga ocipiñalo ca Kalembe, omõla a Yefune, u Kenesi, toke etaili lilo. Momo wa kuama Yehova Suku ya Isareli lutima waye wosi.

¹⁵ Osimbu ale omunda Hevrone ya tukuiwile Kiriyata Ariba. Pokati ka va Anaki, Ariba eye wa velelepo. Kuenje ofeka ya pola, ka mua kaile vali ovita.