YEHOSUA 13 - Embimbiliya - Bíblia Sagrada em Umbundu

¹ Kaliye Yehosua wa kuka, haeye ekongo. Yehova wa popia laye, hati, Ove wa kuka, kuenda wa linga ekongo, puãi kua siala handi ofeka yalua ya kambela oku yi kuata ha yi lingi yene.

² Ofeka ya sialako handi yeyi: Ovisenge viosi via va Filisiti, levi viosi via va Gesiuri,

³ tunde ko Sihore kutundilo wEgito, toke ko Norte kongave ya Ekirone, ofeka ya tukuiwa vati, Ya va Kanana, haiyo yolombuale vitãlo via va Filisiti, ndokuti ombuale yoko Gasa leyi yo kAsidode, leyi ko kAsekelone, leyi yoko Gati, leyi yo kEkirone; kuenda va Awimi,

⁴ ko Sul, lofeka yosi ya va Kanana, la Meara ya va Sitono, toke kAfeke, toke kongave ya va Amori;

⁵ lofeka yosi ya va Gevala, lomunda yosi ya Levanone, konele yutundilo, tunde ko Baale Gade vemi liomunda Herimone, toke koku panda ko Hamati;

⁶ lolonungi viosi viokolomunda, tunde ko Levanone toke ko Misirefoti Mayimi, va Sitono vosi muẽle. Ame muẽle ndi va tundisa kovaso a va Isareli. Ove tepela ño va Isareli ofeka loku imba ocela, ha yi lingi ocipiñalo cavo, ndeci nda ku sapuila.

⁷ Oco kaliye, tepela ofeka eyi apata ecea lonepa yepata ya Manase, ha yi lingi ocipiñalo cavo.

⁸ Va Ruvene la va Gadi kumue lonepa yikuavo yepata lia Manase, va tambula ocipiñalo cavo, cina Mose a va ihile, kesinya lia Yordão, kutundilo, ndeci Mose, ukuẽnje wa Yehova, a va cihile. Ceci:

⁹ Tunde kAroere, konele yolui Arinone, tunde kimbo li kasi pokati kocimbota, letapi liosi lia Medeva toke ko Divone;

¹⁰ lovaimbo osi a Sihoni, Soma ya va Amori, una wa vialele ko Hesibone, toke kongave yomala va Amoni,

¹¹ la Gileada, lofeka yosi ya va Gesiuri la va Maakati, lomunda yosi ya Herimone, lofeka yosi ya Basiane, toke ko Saleka;

¹² lusoma wosi wa Oge ko Basiane, una wa vialele kAsitarote lo kEdirei, haeye wa supile pova Refayimi. Mose wa yula olosoma viaco, kuenje wa vi tundisa.

¹³ Haimo lumue va Isareli ka va tundisile va Gesiuri, ndaño va Maakati. Puãi va Gesiuri la va Maakati va tunga pokati ka Isareli toke etaili lilo.

¹⁴ Epata lie Lewi olio lika Mose ka ihile ocipiñalo. Ovilumba vioku yokela kovaso a Yehova Suku ya Isareli, ovio ocipiñalo caye, ndeci o ci popele.

¹⁵ Mose wa ecele ocipiñalo kepata liombuto ya Ruvene, ca soka ndapata avo.

¹⁶ Ofeka yavo ya kala tunde kAroere, konele yolui Arinone, tunde kimbo li kasi pokati kocimbota, letapi liosi lisungue la Medeva;

¹⁷ la Hesibone kumue lovaimbo aco osi ovetapi; la Divone, la Bamote Baale, la Bete Baale Meone,

¹⁸ la Yahasa, la Kedemoti, la Mefaata,

¹⁹ la Kiriyatayi, la Sivima, la Serete Siahare komunda yocimbota;

²⁰ la Bete Peore, lepato liomunda Pisiga, la Bete Yesimoti;

²¹ lovaimbo osi ovetapi, lusoma wosi wa Sihoni, Soma ya va Amori, una wa vialele ko Hesibone, haeye Mose a yula kumue lolombuale via Midiane, Ewi la Rekeme la Curu la Huri la Reva, olombuale via Sihoni, vina via tungile vofeka.

²² Balama, omõla a Beore, ukuakutaha, va Isareli va wipavo losipata kumue lavakuavo va ipaiwa.

²³ Olui Yordão, oluo lua linga ongave yofeka ya va ruvene. Eci oco ocipiñalo ca va Ruvene, ndapata avo, ndokuti ovaimbo avo kumue lovikanjo viao.

²⁴ Mose wa ecelevo ocipiñalo kepata lia Gadi, ku va Gadi, ndapata avo.

²⁵ Ofeka yavo Yasere, lovaimbo osi a Gileada, lonepa yofeka ya va Amoni, toke kAroere, kutundilo wa Rava;

²⁶ kuenda tunde ko Hesibone toke ko Ramati Misipe la Betoni, tunde ko Mahanayi toke kongave ya Deviri;

²⁷ vetapi va tambulamo Bete Harama, la Bete Nimira, la Sukote, la Safono, onepa yikuavo yusoma wa Sihoni, Soma ya Hesibone. Yordão, oyo ongave yaco, toke kombuelo yokalunga Kineroti, kesinya lia Yordão, konele yutundilo.

²⁸ Eci oco ocipiñalo ca va Gadi, ndapata avo, ndokuti ovaimbo avo kumue lovikanjo viao.

²⁹ Mose wa ecele ocipiñalo konepa yepata lia Manase. Ca eciwa konepa yepata lia va Manase, ndapata avo.

³⁰ Ofeka yavo ya kala tunde ko Mahanayi, lofeka yosi ya Basiane, lusoma wosi wa Oge, Soma ya Basiane, lovaimbo osi a yairi, a kasi ko Basiane, ndokuti akui epandu kovaimbo.

³¹ Onepa ya Gileada la Asitarote la Edirei, ovaimbo ovusoma wa Oge ko Basiane, a tiamela komala va Makiri, omola a Manase, ndokuti konepa yomala va Makiri, ndapata avo.

³² Evi ovio ovipiñalo Mose a eca vatapi a Moavi, kesinya lia Yordão kutundilo, oku lisuñama la Yeriko.

³³ Puãi epata lia Lewi, Mose ka lihile ocipiñalo. Yehova Suku ya Isareli, eye ocipiñalo cavo, ndomo a va ci popele.