YEHOSUA 11 - Embimbiliya - Bíblia Sagrada em Umbundu

¹ Yavini, Soma ya Hasore, eci a yeva ovina viaco, wa tuma olomunga ku Yovave, Soma ya Madone, lokosoma ya Simironi, lokosoma ya Akisafe,

² lokolosoma via kala ko Norte, kofeka yolomunda, lokatapi oko Sul ya Kineroti, lokocimbota, lokolomunda via Dori, kutakelo.

³ Wa tumavo ku va Kanana vokutundilo lokutakelo, loko va Amori, la va Hiti, la va Perisi, la va Yevusi vofeka yolomunda, loko va Hiwi vemi liomunda ya Herimone, vofeka ya Misipa.

⁴ Va katuka, ovo kumue lolohoka viavo viosi. Owiñi walua, wakahandangala, ndeseke liokopalaya, kumue lotuvalu lakãlu akahandangala.

⁵ Olosoma evi viosi via likonga. Vieya yu via tunga pamosi ocilombo kovava a Meroma, ha va yaki la va Isareli.

⁶ Yehova wa popia la yehosua, hati, Ku ka va yokokele, momo hela, owola ndoyo, ndi va eca ha va fila kovaso a va Isareli. Love o lakola akanja otuvalu tuavo, loku yoka akãlu avo londalu.

⁷ Oco Yehosua kumue lavakuavita vaye vosi, va veyilila ocitukulukila, kuenje va vondumuhila kovava a Meroma.

⁸ Yehova wa va eca peka lia va Isareli. Va va yula, yu va va lundula toke ko Sitono yinene loko Misirefoti Mayimi, lokocimbota ca Misipa, kutundilo. Va va kundula, toke lomue va supisapo.

⁹ Yehosua wa linga lavo ndeci Yehova o sapuilile. Wa lakola akanja otuvalu tuavo, yu wa yoka akãlu avo londalu.

¹⁰ Koloneke viaco, Yehosua wa ñualela ko Hasore, yu wa li kuata, kuenje wa ipa Soma yalio losipata. Momo kosimbu, imbo lia Hasore olio lia tulamelele ovosoma aco osi.

¹¹ Vosi va kalamo, va va ipa lomela wosipata, va va kundula pe. Lomue wa fuima wa supapo. Kuenda wa yoka Hasore londalu.

¹² Yehosua wa kuata olombala viosi kumue lolosoma viaco viosi. Wa va ipa lomela wosipata, wa va kundula pe, ndeci Mose ukuenje wa Yehova a handelekele.

¹³ Puãi ovaimbo okovivulu, va Isareli ka va a yokele. Te lika Hasore, olio Yehosua a yoka.

¹⁴ Ovikuata viosi viovaimbo aco, kumue lolongombe, va Isareli va vi punda ha vi lingi viavo. Puãi omanu vosi, va va ipa lomela wosipata, toke va va kundula. Ka va supisilepo ndaño umuamue o fuima.

¹⁵ Ndeci Yehova a handelekele ukuenje waye Mose, haico Mose a handeleka Yehosua, kuenje haico ca linga Yehosua. Kovina viosi Yehova a handelekele Mose, lacimue ka suisilepo.

¹⁶ Oco Yehosua wa kuata ofeka yaco yosi, ofeka yolomunda, lofeka yosi yoko Sul, lofeka yosi ya Gosene, locimbota, latapi, lolomunda via Isareli lovimbota viaco,

¹⁷ tunde komunda Halaka ocipepi la Seire, toke ko Baale Gade vocimbota ca Levanone, vemi liomunda Herimone. Olosoma viaco viosi wa vi kuata, wa vi ponda, yu wa vipa.

¹⁸ Yehosua wa yaka osimbu yalua lolosoma viaco viosi.

¹⁹ Ka kua kaile imbo limue lia linala la va Isareli, te lika va Hiwi, olonungi via Giveone. Osi akuavo va a kuata loku yaka.

²⁰ Momo Yehova wa ci panga okuti va tĩlise ovitima viavo, oco va katukile va Isareli loku liyaka lavo, hã ha va va kundula pe, ohenda lakamue, puãi va va kundule ndeci Yehova a handelekele Mose.

²¹ Koloneke viaco Yehosua wa katuka, yu wa nyola va Anaki kolomunda via Hevrone, la Deviri la Anava, lokolomunda viosi via Yuda, lokolomunda viosi via Isareli. Yehosua wa va kundula pe kumue lovaimbo avo.

²² Vofeka ya va Isareli, lomue u Anaki wa supamo, te lika ko Gasa loko Gati lo kAsidode, oko kua siala vamue.

²³ Oco Yehosua wa kuata ofeka yosi, ndeci cosi Yehova a popele la Mose. Yehosua wa yeca ndocipiñalo ku va Isareli, epata lepata lonepa yalio. Kuenje ofeka ya pola, ka mua kaile vali ovita.