YEHOSUA 10 - Embimbiliya - Bíblia Sagrada em Umbundu

¹ Adonisedeke, Soma ya Yerusalãi, wa yeva ndomo Yehosua a kuata Hai loku li kundula pe, loku linga la Hai losoma yalio ndomo a lingile la Yeriko losoma yalio. Wa yevavo okuti olonungi via Giveone via linala la va Isareli kuenda va kala pokati kavo.

² Oco wa kuata usumba walua, momo Giveone imbo linene, ndombala yosoma, kuenda lia velelepo okuti Hai li sule, lalume vaco vosi va pama.

³ Oco Adonisedeke, Soma ya Yerusalãi, wa tuma ku Hohama, Soma ya Hevrone, kuenda ku Pirama, Soma ya Yarimuti, la Yaviya, Soma ya Lakisi, la Daviri, Soma ya Egilone, hati,

⁴ Enjui kokuange, ndo ñuatisiko, ha tu nyõli Giveone. Momo lia linala la Yehosua la va Isareli.

⁵ Oco olosoma viaco vitãlo via va Amori, ndokuti Soma ya Yerusalãi, la Soma ya Hevrone, la Soma ya Yarimuti, la Soma ya Lakisi, kuenda Soma ya Egilone va liongoluila pamosi. Ovo kumue lolohoka viavo viosi va enda, va tunga ocilombo kovaso ya Giveone, kuenje va yaka lalio.

⁶ Omanu voko Giveone va tuma ku Yehosua kocilombo ko Giligali, vati, Eka liove ka li ka ekelele akuenje vove. Lamanela lombili kulo, tu popele, tu kuatise. Momo olosoma viosi via va Amori, vana va tunga kolomunda, va liongolola ha va yaki letu.

⁷ Oco Yehosua kumue lalume vosi vakuavita, lalume vosi va pama vakuotõi, va tunda ko Giligali ha va lamanelako.

⁸ Yehova wa popia la Yehosua, hati, Ku ka va yokokele, momo nda va eca povaka ove. Lomue pokati kavo o tamalala love.

⁹ Yehosua weya kokuavo ocitukulukila, momo wa tunda ko Giligali, yu wa lale loku enda.

¹⁰ Yehova wa va wilisa onguele kovaso a va Isareli, wa va muisa ekundu linene ko Giveone. Va Isareli va va landula konjila yowulu wa Bete Horone, yu va va lundula toke kAseka loko Makeda.

¹¹ Eci va kala loku tila va Isareli, osimbu va kala kociloka ca Bete Horone, Yehova wa va lowila ovawe anene a tunda kilu, toke kAseka, kuenje va fa. Va fa lociwe ovo valua, va ipaiwa losipata ya va Isareli, va sule.

¹² Eteke Yehova a eca va Amori ku va Isareli, Yehosua wa popia la Yehova. Wa popela kovaso a Isareli, hati, Ekumbi, talama kilu lia Giveone. Love, asãi, talama kocimbota ca Ayalone.

¹³ Oco ekumbi lia talama, enda osãi ya talama, toke omanu va fetuluinya ovanyali vavo. Eci ka ca sonehelue hẽ velivulu lia Yasiare? Ekumbi lia talama vokati kilu. Ca soka ndeteke liosi ekumbi ka lia yayuileko oku iñila.

¹⁴ Ndaño konyima ndaño kovaso, ka kua la kala eteke ndeli, okuti Yehova wa yevelela kondaka yomunu. Momo Yehova wa yakelako va Isareli.

¹⁵ Kuenje Yehosua kumue la va Isareli vosi, va tiukila kocilombo ko Giligali.

¹⁶ Olosoma viaco vitãlo via tila, kuenje via salama veleva ko Makeda.

¹⁷ Va ci sapuila Yehosua, vati, Olosoma vitãlo va vi sanga, via salama veleva ko Makeda.

¹⁸ Yehosua hati, Tiñuluili puvelo weleva ovawe anene. Kapipo alume ha va va lavi.

¹⁹ Puãi ene muẽle ko ka kaliko. Landuli ovanyali vene. Undumuhili ava va kuãi vonyima yavo. Ka va ka iñile vovaimbo avo, momo Yehova Suku yene wa va eca peka liene.

²⁰ Eci Yehosua kumue la va Isareli va mala oku va kundula lekundu linene, toke va puapo, leci ava va supapo va iñila vovaimbo a pama,

²¹ oco omanu vosi va tiukila lombembua ku Yehosua, kocilombo coko Makeda. Lomue wa menula komela ha popi va Isareli.

²² Oco Yehosua wa popia hati, Situluli puvelo weleva, nundisili veleva olosoma viaco vitãlo.

²³ Oco va ci linga, va tundisa veleva olosoma viaco vitãlo, Soma ya Yerusalãi, la Soma ya Hevrone, la Soma ya Yarimuti, la Soma ya Lakisi kuenda Soma ya Egilone.

²⁴ Eci va nena olosoma viaco ku Yehosua, oco Yehosua wa kovonga alume vosi va Isareli, kuenje wa popia lasongui vakuavita, vana vaile kumue laye, hati, Amiko, kapi olomãi viene kolosingo violosoma evi. Oco vamako, yu va kapa olomãi viavo kolosingo viavo.

²⁵ Yehosua wa popia lavo, hati, Ko ka saluki, ndaño oku yokoka. Kolisiko, kuati utõi, momo eci oco Yehova a laika oku linga lovanyali vene vosi vu liyaka lavo.

²⁶ Noke Yehosua wa va ponda, yu wa va ipa, kuenje wa va nyoñamisa voviti vitalo. Va nyoñamisua voviti viaco toke koñolosi.

²⁷ Pokuiñila kuekumbi, Yehosua wa tumila oku va tulula voviti, yu va va imba veleva muna va salamele. Pomela weleva liaco va sitikapo lovawe anene. Haipo a kasi toke etaili lilo.

²⁸ Eteke liaco Yehosua wa kuata Makeda, wa li nyola lomela wosipata kumue losoma yalio. Omanu vosi va kalamo wa va kundula pe, lomue a supisapo. Wa linga la Soma ya Makeda ndeci a lingile la Soma ya Yeriko.

²⁹ Yehosua kumue la va Isareli vosi, va tunda ko Makeda, va enda ko Livina, kuenje va liyaka la Livina.

³⁰ Yehova wa li ecavo peka lia va Isareli, kumue losoma yalio. Wa li kundula lomela wosipata lava vosi va kalamo. Lomue a supisamo. Wa linga la Soma yaco ndeci a lingile la Soma ya Yeriko.

³¹ Yehosua kumue la va Isareli vosi, va tunda ko Livina, va enda ko Lakisi. Va tungako ocilombo kuenje va liyaka lalio.

³² Yehova wa eca Lakisi peka lia va Isareli, kuenje keteke liavali wa li kuata. Wa li kundula lomela wosipata, lava vosi va kalamo, ndeci a lingile la Livina.

³³ Oco Horama, Soma ya Gesere, weya oku kuatisa Lakisi. Yehosua wo yula kumue lomanu vaye, toke lomue o supisilapo.

³⁴ Yehosua kumue la va Isareli vosi, va tunda ko Lakisi, va enda kEgilone. Va tungako ocilombo kuenje va liyaka lalio.

³⁵ Eteke liaco hailio va li kuata. Va li kundula lomela wosipata. Eteke liaco, ava vosi va kalamo wa va kundula pe, ndeci a lingile la Lakisi.

³⁶ Yehosua kumue la va Isareli vosi, va tunda kEgilone, va enda ko Hevrone, Yu va liyaka lalio.

³⁷ Va li kuata yu va li kundula lomela wosipata, kumue la Soma yalio, lovikanjo vialio viosi lava vosi va kalamo. Lomue a supisapo, wa linga ndeci a lingile la Egilone. Wa li kundula pe, lava vosi va kalamo.

³⁸ Yehosua kumue la va Isareli vosi, va ñualela ko Deviri, kuenje va liyaka lalio.

³⁹ Wa li kuata kumue la Soma yalio lovikanjo vialio viosi. Va va kundula lomela wosipata. Ava vosi va kalamo va va kundula pe. Lomue va supisapo. Ndeci a lingile la Hevrone, kuenda ndeci a lingile la Livina la Soma yalio, haico a linga la Deviri la Soma yalio.

⁴⁰ Oco Yehosua wa yula ofeka yosi, eyi yolomunda leyi yoko Sul, leyi yovatapi, leyi yovapato olomunda, lolosoma viavio viosi. Lomue a supisapo. Vosi va fuima wa va kundula pe, ndeci Yehova Suku ya Isareli a handelekele.

⁴¹ Yehosua wa va yula tunde ko Kadesi Barnea toke ko Gasa, lofeka yosi ya Gosene toke ko Giveone.

⁴² Yehosua wa kuata olosoma evi viosi kumue lolofeka viavio vonjanja yimuamue, momo Yehova Suku ya Isareli wa yakelako va Isareli.

⁴³ Yehosua wa tiukila kumue la va Isareli vosi kocilombo coko Giligali.