YEHOSUA 1 - Embimbiliya - Bíblia Sagrada em Umbundu

¹ Kovaso yokufa kua Mose, ukuenje wa Yehova, Yehova wa popia la Yehosua, omõla a Nune, ukuenje wa Mose, hati,

² Ukuenje wange Mose wa fa. Oco kaliye katuka, yoka olui olu Yordão, ove kumue lomanu ava vosi, ha vu iñila vofeka ngeca ku va Isareli.

³ Kuosi ku liatela olomai viene, nda wihiko, ndomo nda popele la Mose.

⁴ Tunde kekalasoko loko Levanone oyo toke kolui lunene, olui Ferati, lofeka yosi ya va Hiti toke kokalunga kanene kutakelo, ovio ovililo viene.

⁵ Oloneke viosi viomuenyo wove, ka ku kala umue o tẽla oku tamalala love. Ndeci nda kala la Mose, haico ñala love. Si ku tokoka ndaño oku ku yanduluka.

⁶ Kolisako, kuata utoi, momo ove o piñalisa omanu ava ofeka nda lisilile lolosekulu viavo oku va yiha.

⁷ Kolisako ño, linga muẽle ukuotoi, linga lutate ndovihandeleko viosi ukuenje wange Mose a ku handelekele. Ku ka pambukile kondio pamue kepĩli, oco o sumuluhe kuosi wenda.

⁸ Elivulu eli liovihandeleko ka li ka tunde komela wove, puãi li sokolola utanya luteke, hu lingi lutate cosi ca sonehiwamo. Momo oco onjila yove yi sumuluha, leci o linga ci ku enda ciwa.

⁹ Sia ku handelekele hẽ, siti, Kolisako, kuata utõi? Ku ka saluke, ndaño oku yokoka, momo Yehova Suku yove o kasi kumue love kuosi wenda.

¹⁰ Oco Yehosua wa handeleka vakesongo komanu hati,

¹¹ Ñuali vocilombo. Sapuili omanu hoti, Angiliyi olohuta, momo kovaso yoloneke vitatu vu yoka olui olu Yordaõ, oco wendi oku kuata ofeka yina Yehova Suku yene a wihi ha yi lingi yene.

¹² Yehosua wa popia la va Ruvene la va Gadi lonepa yepata lia Manase, hati,

¹³ Ivaluki ondaka yina Mose, ukuenje wa Yehova, o handelekeli, hati, Yehova Suku yene u muisi epuyuko kuenda o wihi ofeka yilo.

¹⁴ Akãi vene lomala vene loviunda viene va siale vofeka Mose a wihĩli sinya lilo lia Yordão. Puãi alume vosi va pama vakuotõi pokati kene, va malehe, kuenje va pite kovaso a vangandiene ha va va kuatisa,

¹⁵ toke Yehova a muisa vakuene epuyuko ndeci o muisi ene, toke va kuatavo ofeka Yehova Suku yene a va ĩha. Oco noke vu tiuka vofeka, wa tambuli kuenje yi linga yene, yina Mose ukuenje wa Yehova a wihĩli sinya lilo lia Yordão, kutundilo.

¹⁶ Va kumbulula Yehosua, vati, Cosi wa tu handeleka tu ci linga. Kuosi o tu tuma tu enda.

¹⁷ Ndomo tua pokola Mose kovina viosi, haico tu ku pokolavo ove. Cinene Yehova Suku yove a kale love, ndeci a kala la Mose.

¹⁸ Wosi o sinila ocihandeleko cove, kuenda ka pokola kolondaka viove viosi u handeleka, ipaiwa. Kolisako ño, kuata utõi.