VA ROMA 9 - Embimbiliya - Bíblia Sagrada em Umbundu

¹ Ñasi loku popia ocili vu Kristu, si kembi. Utima wange u njimbilavo uvangi ve Espiritu Sandu

² okuti nda sumua enene, kuenje vutima nda sakalala olonjanja viosi.

³ Momo, nda ca tavele, kuenda nda ci kuatisa vamanjange haivo vangandiange vetimba, nda ndi livela oku siñaliwa ame muẽle loku tepiwa ku Kristu.

⁴ Ovo va Isareli, omangu yumõla, yayo; lulamba, wavo; lovisila, viavo; lokueciwa kuovihandeleko, kuavo; lokuvumba Suku, kuavo; lolohuminyo, viavo;

⁵ vakukululu, vavo; kuenje vepata liavo lietimba mua citiwila Mesiya. Suku, u o viala ovina viosi, a pandiyiwe oloneke vi enda ño-o hu. Amene.

⁶ Puãi, ka ci kasi okuti ondaka ya Suku ya ponya. Momo havosiko vakuambuto ya Isareli okuti va Isareli vocili.

⁷ Ndaño vakuambuto ya Avirahama, havosiko omãla vaye vocili. Puãi, ndeci ca sonehiwa, haico ci kasi, okuti, Ombuto yove yi lukuluiwa la Isake,

⁸ momo oku citiwa letimba hacoko ci lingisa omanu omãla va Suku, puãi omala vu wa citiwa lohuminyo ovo va tendiwa ndombuto.

⁹ Momo ohuminyo ya popia yiti, Enyamuali, koloneke nda vilo, niuka, kuenje Sara o kala lomõla ulume.

¹⁰ Kuenje hacoko lika, puãi, eci Rebeca a mina olonjamba la kukululu yetu Isake,

¹¹ leci omãla ka va citiwile handi, okuti ka va lingile handi ndaño ciwa, ndaño cĩvi, oco

¹² vo sapuila vati, Ukulu o vumba umalehe. Ca lingiwila oku tẽlisa ocipango ca Suku coku nola, lokunola kuaco ka kuiyilila ovilinga te okukovonga kuaye.

¹³ Ndeci ca sonehiwa citi, Yakoba ndu sole, Esau puãi, ndu suvuka.

¹⁴ Oco he, tu popia vali nye? Ku Suku hẽ, kuli eci ka ca sungulukile? Ka kuli.

¹⁵ Momo wa popia la Mose hati, Ndinga ohenda u ndu linga ohenda, ñuatela ocikembe u ñuetele ocikembe.

¹⁶ Eci cosi ci lingiwila ohenda ya Suku, ocipango comunu, pamue upange waye, hawoko.

¹⁷ Momo ocisonehua ca popia la Fareo citi, Oku lekisila vokuove unene wange, okuti onduko yange yi tukuiwa voluali luosi, oco muẽle nda ku katuila.

¹⁸ Oco, o linga ohenda ku wa panga, kuenje u wa panga u sivisa utima.

¹⁹ Oco o mula huti, Nda oco, Suku o tẽla vali ndati oku veta evelo? Momo helie o tẽla oku tamalala locipango caye?

²⁰ Puãi, ove amunu, ove elie okuti o kumbulula Suku? Cimue ca luvikiyiwa hẽ, ci pula u wa ci luvikiya, citi, Nye wa nduvikiyila ndomo?

²¹ Ukuakutunga olombia hẽ, ka kuete omoko yoku linga cosi a panga lotuma? Lombunge yimosi he, ka tẽla oku tunga ombia yimue ya posoka, yikuavo yaño?

²² Mbi Suku, omo a yongola oku lekisa onyeño yaye loku limbukisa unene waye, oco wa likandangiya lepandi lia lua oku nyõla olombia via tungiwila onyeño, vina vi sesamela okunyõleha.

²³ Eci mbi, wa ci lingila olombia via tungiwila ohenda, vina via noliwila ale oku muisua ulamba, okuti o vi muisa muẽle ukuasi wulamba waye.

²⁴ Evi via noliwa ca lomboloka etu, kuenje tuopiwa, ha ku va Yudeako lika, puãi lo ku vakualofeka le.

²⁵ Ndeci a popia velivulu lia Hosea, hati, Mopia la Hamanuvangeko, siti, Vumanu vange. Lu ka soliwile ndu tukula, siti, Wange wa soliwa.

²⁶ Kuenda vali hati, Kuna va sapuililue hati, Hamanuvangeko, haiko va sapuilua, hati, Vumãla va Suku yomuenyo.

²⁷ Isaya layevo oco a tukuila Isareli lolukandi hati, A Isareli, ndaño omanu vove va soka ndeseke liokalunga, ocisupe cavo lika ci popeliwa.

²⁸ Momo Ñala o tẽlisa ondaka yaye kilu lieve kuenje o yi linga loku teta onimbu.

²⁹ Ci kala ndeci Isaya a cimbila ale owanji, wokuti, Nda Ñala yolohoka ka tu sililepo ombuto, nda tua linga nda Sodoma, kuenda nda tua lisoka la Gomora.

³⁰ Oco hẽ, tu popia vali nye? Tu popia tuti, Vakualofeka ka va sandele esunga ovo va sanga esunga. Va sanga esunga lia tunda kekolelo,

³¹ osimbu va Isareli va sanda esunga poku pokola kovihandeleko ka va la tẽlisa ovihandeleko viaco.

³² Nye ca va tateka oku li sanga? Momo okusanda kuavo ka kua tundile kekolelo, puãi va sima vati, Esunga li tunda kovilinga. Va lilondoka vewe liocilondokua,

³³ ndeci ca sonehiwa okuti, Ota, vo Siono omo ñapa ewe liocilondokua, hailio ewe lietatamiso. Kuenje u o li kolela, osõi ka yu kuti.