VA ROMA 8 - Embimbiliya - Bíblia Sagrada em Umbundu

¹ Oco kaliye, ka kuli episo kuava va kasi vu Kristu Yesu.

² Momo ovihandeleko vi'Espiritu liomuenyo vu Kristu Yesu via njovola kovihandeleko viekandu haivio viokufa.

³ Momo, eci ka ca tẽliwile lovihandeleko, momo via honguisua letimba, oco Suku a linga. Wa tuma Omõlaye lesetahãlo lietimba liekandu. Wo tuma oku yaka lekandu loku pisa ekandu vetimba.

⁴ Wa ci lingila okuti vovimuenyo vietu, etu tu endaenda le Espiritu ha letimbako, omo mu molehela okutẽlisua kuocili kuovihandeleko.

⁵ Momo ava va tiamela ketimba va sokolola ovina vietimba, puãi ava va tiamela ke Espiritu va sokolola ovina vie Espiritu.

⁶ Momo, oku tiamisa ovisimilo viutima koloñeyi vietimba oko okufa, puãi oku tiamisa ovisimilo viutima kovina vie Espiritu, oko omuenyo, haiko ombembua.

⁷ Momo utima wa tiamisua koloñeyi vietimba u tamalala la Suku, ka u pokola kovihandeleko via Suku, kuenje ko ci tẽla.

⁸ Kuenda vali, ava va sakalala ño-o letimba ka va tẽla oku sanjuisa Suku.

⁹ Ene puãi, ka vu kasi vetimba, te ve Espiritu, nda Espiritu lia Suku li tunga ocili vovitima viene. U ka kuete Espiritu lia Kristu ka tiamela ku Kristu.

¹⁰ Puãi, nda Kristu o kasi vovitima viene, oco, ndaño atimba ene a fa mekonda liekandu, haimo aspiritu ene a kala lomuenyo mekonda liesunga.

¹¹ Puãi, nda Espiritu liu wa pindula Yesu kuava va fa li tunga vovitima viene, oco, u wa pindula Kristu kuava va fa o muisavo omuenyo atimba ene a fa fa. O ci linga loku talavaya le Espiritu liaye lina li kasi vovitima viene.

¹² Oco a vamanji, ca lomboloka okuti tu kasi locikele ci kola. Ocikele caco puãi ha coketimba ko, okuti tu kuama ño olonjongole vietimba.

¹³ Momo, nda vu kuama ño olonjongole vietimba, vu fa. Puãi, nda, le Espiritu, wipayi ovilinga vietimba, vu mola omuenyo.

¹⁴ Momo vosi va songuilua le Espiritu lia Suku ovo omãla va Suku.

¹⁵ Momo ka wa tambuili espiritu liupika okuti vu kala vali lusumba, puãi wa tambuli espiritu liomangu yomõla, lina tu vilikiya lalio tuti, Aba, A Tate,

¹⁶ Oco Espiritu, eye muẽle o kasi loku imba uvangi kumosi lespiritu lietu okuti tumãla va Suku.

¹⁷ Oco, nda tumãla, nda tuvakapiñala, okuti vakapiñala ka Suku, kuenje tu piñalẽla kumue la Kristu, nda tu talela ohali kumue laye, okuti tu muilavo Ulamba kumue laye.

¹⁸ Ame nda kolela okuti ohali yoloneke vilo ka ci tava oku yi sokisa lulamba u laika oku tu tukulukila.

¹⁹ Momo ovilulikilo viosi vi tailili oku mola etukuluko liomãla va Suku.

²⁰ Momo ovina via lulikiwa via tiamisua kuveke, ha locipango cavio ko, te locipango cu wa vi tiamisako.

²¹ Wa ci linga lelavoko liokuti, eteke limue ovina via lulikiwa vi panduluiwa kupika wenyõleho ha vi moli eyovo liulamba womãla va Suku.

²² Momo tua kũlĩha okuti, toke cilo, ovina viosi via lulikiwa vi yavalela kumuamue olongembia vioku cita.

²³ Havioko lika, puãi letu le, haetu tua maha kapako atete Espiritu, ndaño etu muẽle tu leña leña vovitima osimbu tu talamela lelavoko liokutambuiwa ndomãla. Okutambuiwa ndomãla kuendela kumosi leyovo lietimba.

²⁴ Momo velavoko liaco omo tua popeliwila. Elavoko li moleha helavokoko, momo helie o lavoka eci a lete ale?

²⁵ Puãi, eci tu lavoka cimue ka tu lete, tu ci talamela lepandi.

²⁶ Haico Espiritu a tu kuatisa pokati kokuleñela kuetu, momo ka tua kũlĩhile oku likutilila ndeci ca tu sesamela, puãi Espiritu eye muẽle o tu livondelelako laleñoleño ka a popaiwa.

²⁷ U o seteka ovitima viomanu wa kũlĩha ovisimilo vi Espiritu, momo Espiritu o livondelelako olosandu ndeci Suku a panga.

²⁸ Tua kũlĩha okuti ava va sole Suku, haivo va kovongiwa ndeci Suku a panga, Suku o talavaya lavo vovina viosi oku va sumũlũisa.

²⁹ Momo ava a limbuka ale, ovo a tukulavo oku kala lesetahalo li'Omõlaye, okuti o linga uveli wa vamanjaye va lua.

³⁰ Kuenje ava a tukula ale ovo a kovongavo, lava a kovonga wa va tenda nda vakuesunga, lava a tenda nda vakuesunga ovo a muisavo ulamba.

³¹ Ovina evi tu vi popela nye? Nda Suku o kasi letu helie o tu katukila?

³² U ka kuatelele Omõlaye ohenda, puãi wo tu wavela etu vosi, ka tu ihilevo hẽ ovina viosi kumue laye?

³³ Helie o vetela evelo ava va noliwa la Suku? Suku, eye o tenda ava va kuete ekolelo okuti ovo vakuesunga, oco,

³⁴ u o pisa elie? Kristu Yesu hẽ, u wa fa haeye wa pinduiwa kuava va fa, kuenje o kasi kondio ya Suku oku tu livondelelako, eye nga o pisa?

³⁵ Helie o tẽla oku tu tepa kocisola ca Kristu? Ohali hẽ pamue ongongo, pamue eyambulo, pamue onjala, pamue epẽle, pamue ohele, pamue osipata, yi ci tẽla?

³⁶ Ndeci ca sonehiwa okuti, Ove muẽle tu ku pondiwila ño-o eteke liosi, haive tu ku tendiwila ndolomeme via loña kepondelo.

³⁷ Ka ci tẽliwa. Omo tu kasi lu o tu sole, oco, vovina viaco viosi, tu piãla vali kokuyula.

³⁸ Momo nda kolela okuti ndaño okufa, ndaño omuenyo, ndaño ovangelo, ndaño olombiali, ndaño ovina viacilo, ndaño ovina vi laika oku iya, ndaño ovonene,

³⁹ ndaño ovina viokilu, ndaño ovina viokalunga, ndaño ociluvo cikuavo, lacimue ci tẽla oku tu tepa kocisola ca Suku ci kasi vu Kristu Yesu, Ñala yetu.