VA ROMA 7 - Embimbiliya - Bíblia Sagrada em Umbundu

¹ A vamanji, ka wa kũlĩhili,— momo ñasi loku popia lava va kũlĩha ovihandeleko,— ka wa kũlĩhili okuti ovihandeleko vi viala lika omunu osimbu a kasi lomuenyo?

² Ndeci ukãi, ovihandeleko viu kutila ku veyaye osimbu veyaye a kasi lomuenyo. Puãi, nda ulume o fa, ukãi o kutuluiwa kovihandeleko vio kutilile ku veyaye.

³ Oco, nda enda kulume ukuavo osimbu veyaye a kasi lomuenyo, o tukuiwa okahonga, puãi, nda veyaye o fa, o kutuluiwa kovihandeleko viaco, kuenje ka tukuiwa vali okahonga nda o kuela ulume ukuavo.

⁴ Haico ene, a vamanji, omo etimba lia Kristu lia fa, oco ene wa fi kovihandeleko, kuenje cilo ci tava oku enda kukuavo, okuti ku-u wa pinduiwa kuava va fa, haeye wa pinduiwila okuti etu tu imila Suku epako.

⁵ Momo osimbu tua kaile vatimba, oloñeyi vietu viakandu, haivio via kenduiwa lovihandeleko, via talavayele vovimatamata viatimba etu oku imila okufa epako.

⁶ Puãi kaliye tua kutuluiwa kovihandeleko, okuti tua fa kueci ca tu kutile, kuenje oco cilo tu vumba, puãi havovisonehuako vina viale, te vomuenyo wokaliye we Espiritu.

⁷ Oco hẽ, tu popia nye? Ovihandeleko hẽ, ekandu ale? Hacoko. Haimo lumue, nda havihandelekoko, ame nda sia kũlĩhile ekandu, momo nda ocihandeleko ka ca lingile citi, Ku ka livele, ame nda sia kũlĩhile oku livela.

⁸ Puãi ekandu, omo lia likuatisa locihandeleko, oco lia ñokela ovipululu viosi. Momo nda ka kua kaile ovihandeleko nda ekandu lia fa.

⁹ Ame ale, cina sia kaile lovihandeleko, nda kala lomuenyo, puãi, eci ocihandeleko ceya, oco ekandu lia pinduka, lame nda fa.

¹⁰ Ocihandeleko cina ca sokele oku ñokela omuenyo oco muẽle ca ñokela okufa.

¹¹ Momo ekandu lia likuatisa locihandeleko lia ñemba kuenje lia njipa laco.

¹² Oco ovihandeleko vi kola, viosi muẽle vi kola, haivio viesunga, kuenda viwa.

¹³ Oco hẽ, ca lomboloka okuti eci ciwa oco ca nenela okufa ale? Hacoko. Eci ca nenela okufa ekandu, kuenje ca ku nena poku talavaya leci ciwa. Ca lingiwila ndomo okuti ekandu li moleha ocili ndekandu, kuenda okuti ekandu, omo li likuatisa locihandeleko, oco li piãla vali enene.

¹⁴ Tua kũlĩha okuti ovihandeleko viespiritu, puãi ame ndukuetimba, haime ndupika wekandu.

¹⁵ Ndomo ndingainga ame muẽle ka mua ndombolokele. Momo eci manga hacoko ndinga, te eci nyãle oco ndinga.

¹⁶ Momo, nda ndinga eci si yongola oku linga, oco nda tava okuti ovihandeleko vi kuete esunga.

¹⁷ Oco ca lomboloka okuti hameko vali ndi ci linga, te ekandu li kasi vokati kange.

¹⁸ Momo nda kũlĩha okuti vokati kange, okuti vetimba liange, ka muli cimue ciwa. Oku panga oku linga ciwa nda ndi ci tẽla, puãi oku ci linga, oco si tẽla.

¹⁹ Momo, eci ciwa njongola oku linga, si ci lingi, puãi eci cĩvi si yongola oku linga, oco ndinga.

²⁰ Oco, nda ndinga eci si yongola oku linga, hameko ndi ci linga, te ekandu li kasi vokati kange olio li ci linga.

²¹ Oco nda sanga ocihandeleko vokati kange okuti eci njongola oku linga ciwa, cĩvi ceci.

²² Momo, vokati kange muẽle, sanjukila ovihandeleko via Suku,

²³ puãi vovimatamata vietimba liange, ndetemo ovihandeleko vikuavo vi liyaka lovihandeleko vi kasi vutima wange, oco nda pandekelua lovihandeleko viaco viekandu, vina vi kasi vovimatamata vietimba liange.

²⁴ Ndukuelamba we! Helie o mopela ketimba liokufa oku?

²⁵ Mitakati Yesu Kristu, haeye Ñala yetu, a pitiye olopandu ku Suku. Ame muẽle, lutima wange, mbumba ovihandeleko via Suku, puãi letimba, mbumba ovihandeleko viekandu.