VA ROMA 5 - Embimbiliya - Bíblia Sagrada em Umbundu

¹ Oco, omo, eci tu kuete ekolelo tu tendiwa nda vakuesunga, oco tu kuete ombembua la Suku, Mitakati yaco Ñala yetu Yesu Kristu.

² Omo eye wa linga Mitakati oco tua pitisua lekolelo vocali caco omu tu tailili ndeti, kuenje tu yolela elavoko lioku iñila vulamba wa Suku.

³ Eci hacoko lika, puãi ndaño vohali haimo tu yolela, momo tua kũlĩha okuti ohali yi koka epandi,

⁴ kuenje epandi li koka unu, lunu u koka elavoko,

⁵ lelavoko ka li tu kutisa osõi, momo ocisola ca Suku ca sukumuhila vitima vietu le Espiritu Sandu una wa tu ihiwa.

⁶ Momo, eci ka tua kaile longusu, otembo yaco haiyo, Kristu a fila vakuakandu.

⁷ Katihe nda umue o tava naito oku fila ukuesunga, puãi mbi umue o kuete utõi o tava oku fila u wa pua eko.

⁸ Puãi Suku wa tu muisa ocisola caye okuti, osimbu tua kala vakuakandu oco Kristu a tu fila.

⁹ Oco, omo cilo tua tendiwa nda vakuesunga losonde yaye, ca piãla vali tu popeliwa laye konyeño ya Suku.

¹⁰ Momo, nda osimbu tua kaile ovanyali va Suku, tua inalisua kokuaye lokufa ku'Omõlaye, siti, cilo, omo tua inalisua ale, ci piãla vali oku popelua lomuenyo w'Omõlaco.

¹¹ Hacoko lika, puãi tu pandiyi Suku, kuenje Ñala yetu Yesu Kristu, u wa linga Mitakati oku tu muisa okulinala kuaco, o lingavo Mitakati oku pitiya okupandiya kuaco ku Suku.

¹² Oco, ndeci ekandu lia iñila voluali lomunu umuamue, kuenda okufa kueya lekandu, haico okufa kua sambukila omanu vosi, momo vosi va linga ekandu.

¹³ Momo ekandu lia kala voluali osimbu ovihandeleko ka via eciwile handi, puãi ekandu ka li tendiwa osimbu ka kuli ovihandeleko.

¹⁴ Haimo, okufa kua viala tunde ku Adama toke ku Mose, kua viala ndaño ava okuti okulueya kuavo ka kua setahalele okulueya kua Adama, una wa linga ocisetahãi cu wa laika oku iya.

¹⁵ Puãi ocali ca eciwa halondandoko ka ca lisokele lokulueya kuaco. Momo, nda va lua va fila ekandu liomunu umuamue, ca piãla vali ocali ca Suku, haico ocali ca molehela komunu umuamue, okuti Yesu Kristu, ca supokaila va lua.

¹⁶ Ocali caco ka ca sokele lonima yi kuama ekandu liomunu umuamue. Momo okutetulula kuna kueyilila ekandu limosi kua nena episo, puãi ocali ceyilila akandu a lua ci nena oku tendiwa ndukuesunga.

¹⁷ Momo, nda mekonda liekandu liomunu umuamue okufa kua viala, mekonda liomunu waco, ca piãla vali enene, ava va tambula ocali ca supoka kuenda esunga lia eciwa ocali, va viala vomuenyo mekonda liomunu umuamue, Yesu Kristu.

¹⁸ Oco, ndeci okulueya kuomunu umuamue kua nenela omanu vosi episo, haico elinga liesunga liomunu umuamue li nenela vosi eyovo kuenda omuenyo.

¹⁹ Momo, ndeci va lua va lingisua vakuakandu lesino liomunu umuamue, haico va lua va lingisua vakuesunga lepokolo liomunu umuamue.

²⁰ Ovihandeleko via iñila oku luisa akandu. Puãi, oku akandu a luisua haiko ocali ca supoka vali enene,

²¹ okuti, ndeci ekandu lia viala vuviali wokufa, haico ocali ci viala vuviali wesunga lina li fulila vomuenyo ko pui, una Yesu Kristu Ñala yetu a tu nenela.