VA ROMA 4 - Embimbiliya - Bíblia Sagrada em Umbundu

¹ Puãi Avirahama, sekulu yetu ketimba, wa limuisa nye?

² Momo, nda Avirahama wa tendiwa ukuesunga mekonda liovilinga viaye, eye o kuete eci a lipanda laco, puãi ku Suku hakoko.

³ Momo ovisonehua via popia ndati? Via popia viti, Avirahama Wa kolela Suku, kuenje co tendelua ndesunga.

⁴ Kaliye u o talavaya, ofeto yaye yi tendiwa ndombanjaile, te ndonima yupange waye, haiyo yo sesamela.

⁵ Haicovo u ka lingi upange puãi o kolela Suku, u o tenda ukuetombo ndeci a tenda ukuesunga, ekolelo liaye li tendiwa ndesunga.

⁶ Haico Daviti a tukula esumũlũho liomunu Suku a tendela esunga, ndaño omunu waco ka kuete ovilinga, hati,

⁷ Ava okuti olohõle viavo via ecelua, lakanda avo a tuvikiwa, ovo va sumũlũha.

⁸ Omunu Ñala ko veta eko wa sumũlũha.

⁹ Esumũlũho eli hẽ, lia tukuiwila vakuevamba lika, ele loviyamba le? Tu kasi loku popia tuti, Avirahama, ekolelo liaye lio tendiwila ndesunga.

¹⁰ Oco he, lio tendiwila ndati? ceci a kala ukuevamba ale? ele ceci a kala ociyamba? Hakevamba ko, te kuyamba.

¹¹ Wa sevisiwila evamba okuti ci linga ondimbukiso yesunga lia tunda kekolelo a kala lalio osimbu ka sevisiwile. Wa lisevisila okuti o linga isia ya vosi va kolela, ndaño ka va sevisiwile, haivo, omo va kolela, va tendiwa nda vakuesunga,

¹² loku lingavo isia yava va sevisua, okuti oku lisevisa lika hakoko, puãi vopa ongangu kekolelo isietu Avirahama a kala lalio osimbu ka sevisiwile.

¹³ Momo ohuminyo yina yeya ku Avirahama lo kombuto yaye yokuti o linga kapiñala koluali, ka yeyililile oku pokola kovihandeleko, puãi yeyilila esunga li tunda kekolelo.

¹⁴ Momo, nda vakuavihandeleko lika va linga vakapiñala, ekolelo ka li silivila, lohuminyo ya imuha.

¹⁵ Momo ovihandeleko vi koka onyeño, puãi, oku ka kuli ovihandeleko, haiko ka kuli oku sina.

¹⁶ Oco ci lombolola ndomo ohuminyo yiyilila ekolelo, okuti yi tẽlisua locali ca Suku, kuenje yi tukula ombuto yosi ya Avirahama, okuti ava va pokola kovihandeleko ovo lika, hacoko, te vosi va kuete ekolelo ndeli liaye, momo eye isietu vosi,

¹⁷ ndeci ca sonehiwa okuti, Nda ku lingisa isia yolofeka via lua. O linga muẽle isia ya vosi kovaso a Suku, una Avirahama a kolela, eye Suku o muisa omuenyo ava va fa, kuenda o vilikiya komuenyo ovina ka via lulikiwile handi.

¹⁸ Momo Avirahama, ndaño co tĩlila, haimo wa pandikisa ño-o lekolelo liaye liokuti o linga isia yolofeka via lua, ndeci co sapuilua okuti, Haico ci kala ombuto yove.

¹⁹ Oco ka tepulukile kekolelo, ndaño wa kũlĩha okuti etimba liaye lia fa ale, momo ndopo o tẽlisa ocita canyamo, ka konyohele ndaño wa kũlĩha okuti imo lia Sara laliovo lia kuka.

²⁰ Ka kua kaile cimue ca tepulula ekolelo liaye liokuti Suku o tẽlisa olohuminyo viaye. Kuenda vali ekolelo liaye liamamako kongusu eci a muisa muisa Suku ulamba,

²¹ kuenje wa kolela ocili okuti eci Suku a likuminya o tẽla oku ci linga.

²² Oco ekolelo liaye lio tendiwilila ndesunga.

²³ Puãi olondaka viaco, Lio tendiwila, heyeko lika via sonehiwila,

²⁴ puãi letu le via tu sonehiwila, etu tu kolela U wa pindula kuava va fa Yesu, Ñala yetu,

²⁵ una wa pondiwila okulueya kuetu, haiye wa pinduiwilua oku tu muisa esunga, etu muẽle ekolelo lietu li tu tendiwila ndesunga.