VA ROMA 2 - Embimbiliya - Bíblia Sagrada em Umbundu

¹ Oco amunu o vela ukuẽle, ku kuete ondaka, momo eci o vela ukuẽle o lipisa ove muẽle, momo ove vukuakuvela evi o lingaingavo ove muẽle.

² Tua kũlĩha okuti okutetulula kua Suku ku pisa locili ava va linga ovina evi.

³ Amunu, eci o vela ava va linga ovina evi, kuenje ove muẽle haivio o lingaingavo, wa soka huti, Muluka episo lia Suku?

⁴ Ale wa lavisa ño ukuasi wohenda ya Suku lepandi liaye lokutoñomala kuaye? Kua kũlĩhile nga okuti ohenda ya Suku yi lingiwila oku ku tuala koku likekembela akandu?

⁵ Puãi, omo o kasi lutima we yuka umbinde haiwo wa siva, oco o kasi loku lisolekela onyeño, kuenje onyeño yaco o yi sanga eteke lionyeño, eci okutetulula kua Suku kuesunga ku situluiwa.

⁶ Momo eye o muisa omanu vosi, omunu ndovilinga viaye, omunu ndovilinga viaye.

⁷ Ava va pandakaisa kovopange awa oku sanda ulamba lekemainyo lomuenyo ko pui, o va muisa omuenyo ko pui.

⁸ Puãi ava va tamalala kuenje ka va pokola kocili, puãi va pokola kevĩho, ovo a tetuluila lonyeño locikumbiti.

⁹ Omunu wosi o linga ekandu o sanga ohali longongo, tete u Yudea, noke u Helasi.

¹⁰ Puãi wosi o lingainga eci ciwa o sanga ulamba lesumbilo lombembua, tete u Yudea, noke u Helasi.

¹¹ Momo ku Suku ka kuli ocame comanu.

¹² Pokati kava ka va kuete ovihandeleko, vosi va linga akandu va nyoleha, ndaño ka va kuete ovihandeleko. Vosi va kasi lovihandeleko kuenje va linga akandu va tetuluiwa lovihandeleko.

¹³ Momo vakuakuyeva lika ovihandeleko havoko vakuesunga kovaso a Suku, te ava va pokola kovihandeleko ovo va tendiwa nda vakuesunga.

¹⁴ Vakualofeka, ava ka va kuete ovihandeleko, nda va pokola kovihandeleko ndocituwa cavo, va likapela ovo muẽle ovihandeleko, ndaño ka va kuete ovihandeleko.

¹⁵ Va lekisa okuti eci ci sĩliha ovihandeleko ca sonehiwa vovitima viavo. Owanji wovitima viavo lawovo u va imbila uvangi, kuenda ovisimilo viavo vi likuatisa pokati, pamue oku pisa, pamue oku yovuisa,

¹⁶ keteke Suku a tetuluila ku Kristu Yesu ovina viomanu viuyombeki ndondaka yiwa ñunda ñunda.

¹⁷ Puãi, nda o litukula huti, Ndu Yudea, kuenje o kolela ovihandeleko loku lipandela Suku,—

¹⁸ nda wa kũlĩha ocipango caye, loku limbuka ovina via velapo, momo wa longisiwa lovihandeleko,—

¹⁹ nda wa likolela okuti vusongui wolomeke, haive vucinyi cava va kasi vowelema,

²⁰ haive vukuakupindisa ava ka va kuete olondunge, haive vulongisi womãla, omo vovihandeleko o kuete cosi ci tiama kukũlĩhiso kuenda kocili,—

²¹ oco hẽ, ove o longisa ukuẽle, ove muẽle ku lilongisa? Osimbu o kunda huti, Ku ka ive, ove muẽle wiva?

²² Ove o popia huti, Ku ka pekelise, ove muẽle o pekelisa? Ove o nyehũla oviteka haimo o punda olonembele?

²³ Ove vukuakulipanda lovihandeleko, o tomba Suku loku sama ovihandeleko?

²⁴ Momo onduko ya Suku ya tombiwa pokati ka vakualofeka mekonda liene, ndomo ca sonehiwa.

²⁵ Ocili evamba li kuatisa, nda vu pokola kovihandeleko, puãi nda vu sama ovihandeleko, evamba liove hevambako.

²⁶ Oco, nda ociyamba ci linga ovisila viovihandeleko, uyamba waye hẽ, ko tendiwa ndevamba?

²⁷ Ociyamba nda ci linga ovihandeleko, ka ci ku pisa hẽ nda ove o sama ovihandeleko, haive o kuete ovisonehua levamba?

²⁸ U o moleha ño kilu lika ndu Yudea, ho Yudeako, ndaño evamba li moleha ño lika ketimba hevambako.

²⁹ U o kuete ovituwa viu Yudea vutima waye eye u Yudea wocili, kuenje evamba liocili lieli liutima lespiritu, haliovisonehuako. Omunu ndo-o; hamanuko vo sivaya, te Suku.