VA ROMA 16 - Embimbiliya - Bíblia Sagrada em Umbundu

¹ Ndu kundiki Febe mukãi wetu, u wa kala oñuatisi yekongelo li kasi ko Kengerai,

² okuti vu u tambuila vonduko ya Ñala, ndeci ca sesamela olosandu, loku u kuatisa ndeci a sukila, momo eye oñuatisi ya va lua, lame le wa ñuatisa.

³ Lamipo Priska la Akuila, vakuetu vupange wa Kristu Yesu,

⁴ haivo ka va liwekele oku ñuatisa, ndaño olonjanja ca koka ohele yovimuenyo viavo. Hameko lika nda va pandula, puãi akongelo osi a vakualofeka a va pandulavo.

⁵ Lamipo ekongelo li kasi vonjo yavo. Lamipo Epeneto, ukuacisola cange, haeye ondonge yatete ya Kristu va Asia.

⁶ Lamipo Maria, una wo lingili upange wa lua.

⁷ Lamipo Androniko la Juniasi, vangandiange, haivo va kala olomandekua kumue lame. Va kemala pokati kovapostolo, haivo va netekela oku tava ku Kristu.

⁸ Lamipo Ampliato, ukuacisola cange ku Ñala.

⁹ Lamipo Urbanu, ukuetu kupange wa Kristu, la Staku, ukuacisola cange.

¹⁰ Lamipo Apele ukua Kristu wocili. Lami vakuepata li Aristobolo.

¹¹ Lamipo Herodiana, ngandiange. Lami vakuepata lia Markiso, ava va kasi vu Ñala.

¹² Lamipo Trufaina la Trufosa, vakuopange wa Ñala. Lamipo Persi wa soliwa, una wa linga upange wa lua ku Ñala.

¹³ Lamipo Rufu, u wa noliwila vu Ñala, la inaye haeye mai.

¹⁴ Lamipo Asungrito, la Flegone, la Herme, kuenda Patroba, la Herma la vakuetu va kasi lavo.

¹⁵ Lamipo Filologo la Julia, kuenda Nereu la mukãi waye, kuenda Olumpa lolosandu viosi vi kasi lavo.

¹⁶ Lilami pokati lesipulo li kola. Akongelo a Kristu o lami.

¹⁷ A vamanji, ndu peyi, limbuki ava va linga olonepele latatamiso a patãla ovilongua wa longisiwi. Litepi lavo.

¹⁸ Momo ava va linga ndava hakuenje va Ñala Kristuko, puãi apika vovaimo avo muẽle. Va tamba ovitima viomãla vamãle lolondaka viavo viusosele lombambe.

¹⁹ Momo ndaño okupokola kuene kua yevala komanu vosi, okuti ndu sanjukili, haimo njongola okuti vu linga olonoño vieci ciwa ho lingi omãla vamãle kovina vĩvi.

²⁰ Suku yombembua ndopo o kosela Satana vemehi liolomãi viene. Ocali ca Ñala yetu Yesu Kristu ci kale lene.

²¹ Timoteo, ukuetu kupange, wo lami, kuenda Lukio la Yasone la Sosipatero, vangandiange.

²² Lame ndi Tertiu, ñasi loku soneha ukanda u, ndu lameli vu Ñala.

²³ Gaio, ondaleki yange, haeye ondaleki yekongelo liosi, wo lami. Erasto, ukuambango yimbo, wo lami, kuenda Kowartu manjetu.

²⁴ Ocali ca Ñala yetu Yesu Kristu ci kale lene vosi. Amene.

²⁵ Kaliye, ku o tẽla oku u kolisi ndondaka yiwa ñunda ñunda haiyo Yesu Kristu a nena, ndesituluilo lielumbu lia sitikiwile tunde ka ku ci,

²⁶ yu cilo lia situluka, kuenje, lia sapuiwa lovisonehua viovaprofeto ndocihandeleko ca Suku ka pui kolofeka viosi ha va pokola ketavo, okuti,

²⁷ kukualondunge viosi, eye lika Suku, ku kale ulamba ko pui la Mitakati yaco Yesu Kristu. Amene.