VA ROMA 13 - Embimbiliya - Bíblia Sagrada em Umbundu

¹ Omanu vosi, omunu, omunu, va pokole kolombiali, momo ka kuli uviali te wa tunda ku Suku, la-a a kasi a kapiwa la Suku.

² Oco, u o patãla ombiali, o patãla eci ca kapiwa la Suku. Ava va patãla va likokela episo.

³ Momo olombiali ka vi lingi usumba ku vakuavilinga viwa, te ku vakuavilinga vĩvi. Ove hẽ, o yongola okuti ku yokokela ombiali? Nda oco, linga eci ciwa kuenje o sivayiwa laye,

⁴ momo eye ukuenje wa Suku wa kapiwila oku ku kuatisa. Puãi, nda o linga eci cĩvi, yokoka, momo omoko yoku viala a kasi layo hayesandako. Eye ukuenje wa Suku, haeye o kasilili oku muisa u wa linga cĩvi onyeño ya Suku.

⁵ Oco, ca sesamela omunu oku pokola, ha mekonda lioku yuvulako lika onyeño, te mekonda liutima u livela oku linga esunga.

⁶ Haicovo vu fetela alisimu momo ovo akuenje va Suku kuenje owo upange wavo.

⁷ Eci komanu vosi eci ca va sesamela, ulambu ku wa sesamela ulambu; ocivanda ku wa sesamela ocivanda; usumba ku wa sesamela usumba; esumbilo ku wa sesamela esumbilo.

⁸ Ko ka kali lolofuka, te ofuka yoku lisola pokati, momo u o sole ukuavo wa tẽlisa ovihandeleko.

⁹ Ovihandeleko viokuti, Ku ka pekelise, Ku ka linge omondi, Ku ka ive, Ku ka livele, kuenda ovihandeleko vikuavo, viosi vi likongela vondaka yimosi yokuti, Sola ukuẽle ndeci o lisole ove muẽle.

¹⁰ Ocisola ka ci lingi cĩvi ukuavo, oco ocisola ci tẽlisa ovihandeleko.

¹¹ Kuenda vali, wa kũlĩhi otembo, okuti yilo oyo ola yoku pasuka kotulo. Momo epopelo lietu cilo li kasi ocipepi, cina tua tava ci sule.

¹² Uteke wa pita kuenje utanya u kasi ocipepi. Oco tu si ovilinga viowelema, tu wali ovimaleho viocinyi.

¹³ Tu endaendi lesunga nda vutanya, ha lonjuela ko loku kolua, ha loku pekela ko lakãi, pamue lusavili, pamue lovama lesuvu.

¹⁴ Puãi wali Ñala Yesu Kristu. Ko ka eci ketimba evelo lioku linga oloñeyi vialio.