VA ROMA 12 - Embimbiliya - Bíblia Sagrada em Umbundu

¹ A vamanji, ndu pingi lohenda ya Suku okuti weci atimba ene ndocilumba ci kasi lomuenyo, haico ci kola, kuenje ci sanjuisa Suku. Oco efendelo liene liocili.

² Kuenje ko ka lisetahaisi loluali lulo, puãi kuati ovitima viokaliye okuti ovimuenyo vi pongoluiwa, kuenje vu limbuka ndeci ci kasi ocipango ca Suku, okuti ciwa, ca sunguluka, ca pua eko.

³ Momo, locali ca nyihiwa, ndu lunguli omunu omunu, siti, Ko ka lisokololi ene muẽle loku lituna ka kua sungulukile, puãi omunu omunu a likũlĩhise lolondunge vi tunda kekolelo Suku a wiha.

⁴ Momo, ndeci tu kasi lovimatamata via lua vetimba limuamue, lovimatamata viaco ka vi kuete upange umuamue,

⁵ haico, ndaño tu va lua, haimo tutimba limuamue vu Kristu, kuenje tuvimatamata vi likuatisa pokati.

⁶ Olongavelo via tu ihiwa omunu omunu via litepa, ndeci ocali ca eciwa komunu omunu ca litepa, oco tu talavayi longavelo tu kuete. Nda uloño wetu oku imba owanji, tu imbi muẽle owanji ndeci ca soka lekolelo lietu.

⁷ Nda uloño wetu oku kuatisa, tu kuatisi. Nda uloño womunu oku longisa, a longise,

⁸ nda oku lungula, a lungule, nda oku lumba vombango, ka ka lumbe ndofufi, nda oku songuila vakuavo, a songuile lombili, nda oku linga ohenda, a yi linge lesanju.

⁹ Ocisola ci kale cocili. Nyehuli eci cĩvi. Kakateli eci ciwa.

¹⁰ Lisoli pokati ndomunu la manjaye. Koku sumbila, velisipo vakuẽle.

¹¹ Kombili ko ka lendi. Kuati owuya we Espiritu. Vumbi Ñala.

¹² Osimbu vu lavoka sanjuki. Pandikisi vohali. Tuwi oku likutilila.

¹³ Lumbi vombango yoku kuatisa olosandu. Poki akombe.

¹⁴ Likutilili ava vo siliñinya, ko ka va siñali, te oku va likutilila.

¹⁵ Yoleli lava va yolela, lili lava va lila.

¹⁶ Lisimili cimuamue. Ko ka simi ovina viunene, puãi loñi koku vumba. Ko ka lipandi.

¹⁷ Ko ka fetuluinyi umue cĩvi leci cĩvi. Sandi ovina viwa kovaso omanu vosi.

¹⁸ Ndeci ca soka locikele cene, kali lombembua lomanu vosi nda ci tẽliwa.

¹⁹ Akuetu wa soliwi, ko ka lifetuluinyi. Efetuluinyo li kale konyeño ya Suku, momo ca sonehiwa citi, Efetuluinyo, liange. Ame fetuluinya. Oco ca popia Ñala.

²⁰ Puãi nda unyali wove o kasi lonjala, u lisa, nda o kasi lenyona, u nyuisa, momo oku linga ndoco o lundika akãla ondalu ponumbutue yaye.

²¹ Ku ka yuliwe leci cĩvi, puãi eci cĩvi ci yula leci ciwa.