VA ROMA 11 - Embimbiliya - Bíblia Sagrada em Umbundu

¹ Oco ndi pula siti, Suku hẽ, wa pukula omanu vaye? Ka pukuile. Momo lamevo ndu Isareli, ndimbuto ya Avirahama, ndukuepata lia Benjamini.

² Suku ka pukuile omanu vaye a kũlĩha ale. Ka wa kũlĩhili hẽ, ndeci ocisonehua ca popia eci ca lombolola ndomo Eliya a sapula va Isareli ku Suku?

³ Eye wa popia hati, A Ñala, va ipa ovaprofeto vove. Volumũla itala viove. Nda supapo lika liange kuenje va yongola oku njupa omuenyo wange.

⁴ Puãi Suku wo kumbulula ndati? Wo kumbulula hati, Nda lisilapo olohũlũkãi epanduvali komanu ka va kekamelele Baale kolongolo.

⁵ Haico oloneke vilo, pa siala ocisupe ca noliwa locali.

⁶ Puãi, nda ca noliwa locali, ca lomboloka okuti ka ca noliwilile ovilinga. Momo, nda hacoko, nda ocali hacaliko vali.

⁷ Nye vali? Eci Isareli a sanda ka ci sangele, te ava va noliwa ovo va ci sanga, vakuavo puãi va tindila.

⁸ Ndeci ca sonehiwa okuti Suku wa va iha ovitima via vulua, lovaso ka a lete, lovatui ka a yevite, toke etaili lilo.

⁹ Kuenda vali, Daviti wa popia hati, Omesa yavo yi va lingile onjanjo kuenda ulivi, yi va lingilevo ocilondokua kuenda efetuluinyo.

¹⁰ Ovaso avo a vuvale okuti ka va tẽla oku mola. Oviongo viavo vi petame ño-o hũ.

¹¹ Oco mula siti, Oco hẽ, va lilondoka okuti va kupuka? Hacoko. Puãi, omo ovo va lueya, oco epopelo li eya ku vakualofeka ha li pinduila ukuse mu va Isareli.

¹² Cilo, nda okulueya kuavo kua nenela oluali ukuasi, lokukonyoha kuavo kua nenela vakualofeka ukuasi, siti, okutambuiwa kuavo vosi ku laika oku kuatisa vali enene?

¹³ Cilo mopia lene, ene wakualofeka. Omo ndupostolo wa vakualofeka ñemainya upange wange,

¹⁴ okuti ci kokela vakuetu va Yudea ocipululu, kuenje ci popela vamue.

¹⁵ Momo, nda okupukuiwa kuavo ku inalisa oluali, siti okutambuiwa kuavo nda ku kuatisa ca piãla vali enene okuti ku soka loku pinduiwa kokufa?

¹⁶ Nda ombu yatete yi kola, eci ca sialapo lacovo ci kolavo. Nda olumbombo lu kola, ovianja laviovo vi kolavo.

¹⁷ Puãi nda ovianja vimue vi teyiwako, kuenje ove, vucanja coliveira yovusenge, o tokekiwako, okuti o tambula kolumbombo onepa yove yongusu yoliveira,

¹⁸ ku ka lipandele ovianja. Nda o lipanda, ivaluka okuti haveko weca ongusu kolumbombo, puãi olumbombo lu eca ongusu kokuove.

¹⁹ Ove o popia huti, Ovianja via tetiwila okuti ame nokekisuako.

²⁰ Ondaka yaco yocili. Ovo va tetiwa omo ka va kaile lekolelo, ove puãi, eci cu ku talamisa ngo cimosi lika cokuti, ekolelo liove. Oco ku ka lipande, puãi ci kuatela usumba.

²¹ Momo Suku, nda ka kuatelele ohenda ovianja viocili, ndaño ove, ka ku kuatela ohenda.

²² Oco, limbuka ciwa ohenda ya Suku kuenda okukãla kuaye. Okukãla kuaye kuiyilila ava va kupuka. Ohenda ya Suku puãi, yi ku lingiwila nda o kuamelela vohenda yaye. Nda hacoko, lovevo o tetiwako.

²³ Lava va tetiwa, lavovo, nda ka va kuamelela lolukonyo luavo, va tokekisuakovo, momo Suku o kuete unene woku va tokekisako vali.

²⁴ Momo, nda ove wa tetiwa koliveira yovusenge, kuenje wa tokekiwa koliveira yocili, ovianja violiveira yocili muẽle, oku tokekiwa vali koliveira yavio muẽle, siti, ci leluka vali enene.

²⁵ A vamanji, kuli elumbu limue kuenje njongola okuti elumbu liaco liu lomboloki sanga vu lilungukila ene muẽle. Elumbu liaco lieli, va Isareli vamue va tĩlisa ovitima viavo, puãi okutĩla kuaco ku kala lika toke vakualofeka va popeliwa la Suku va suapo.

²⁶ Kotembo yaco va Isareli vosi va popeliwa, ndeci ca sonehiwa okuti, Ko Siono ku tunda Onjovoli. O tundisa ku Yakoba okutomba Suku.

²⁷ Eci oco ci linga ocisila cange kokuavo eci ndi vopa akandu avo.

²⁸ Kondaka yiwa, va Isareli va linga ovanyali va Suku, kuenje ci vu kuatisa ene wakualofeka. Puãi kondaka yoku noliwa, va soliwa mekonda liolosekulu viavo.

²⁹ Momo oviali via Suku lekovongo liaye ka li pongoloka.

³⁰ Ndeci ene wakualofeka, ale ka wa taveli ku Suku, puãi kaliye wa sangi ohenda mekonda liokusina kua va Isareli,

³¹ cilo ovo va sinila okuti kohenda yo lingiwi lavovo va muilako ohenda.

³² Momo Suku wa tukuila omanu vosi oku sina okuti o linga omanu vosi ohenda.

³³ Wa longa nye! ukuasi lolondunge lukũlĩhiso wa Suku! Okutetulula kuaye ka ku kũlĩhisua, kuenda olonjila viaye ka vi moñoluiwa.

³⁴ Momo u wa kũlĩha ovisimilo via Ñala elie? Pamue helie wa kala ondunguli yaye?

³⁵ Pamue helie wa eca ombanjaile ku Suku kuenje o lavoka okuti Suku u tiuwilako?

³⁶ Momo ovina viosi vi tunda kokuaye. Kokuaye oko ku kasilili ovina viosi, kuenje ovina viosi vi sulila kokuaye. Ulamba weciwe kokuaye oloneke vi enda ño-o hũ. Amene.