VA ROMA 10 - Embimbiliya - Bíblia Sagrada em Umbundu

¹ A vamanji, onjongole ñuetele va Yudea vutima, haiyo ohutililo ndi va likutililila, yeyi, A Suku, va popeliwe.

² Ndi va imbila uvangi okuti va kuetele Suku ombili, puãi ha lukũlĩhiso ko.

³ Momo, omo ka va kũlĩhile esunga li tunda ku Suku, kuenje va yongola oku liluvikiyila esunga liavo muẽle, oco ka va tavelele kesunga lia Suku.

⁴ Momo Kristu eye efulilo liovihandeleko, okuti vosi va kuete ekolelo va tendiwa nda vakuesunga.

⁵ Mose wa sonehavo hati, U o linga esunga li tunda kovihandeleko o muilako omuenyo.

⁶ Puãi esunga li tunda kekolelo li popia ndomo, liti, Ku ka popie vutima huti, Helie o londa kilu?— ca lomboloka oku kopa Kristu,

⁷ pamue, Helie o lokila vonjembo?— ca lomboloka oku kopa Kristu kuava va fa.

⁸ Puãi esunga li popia nye? Li popia liti, Ondaka yi kasi ocipepi love, vomẽla wove muẽle, lo vutima wove. Ondaka yaco oyo ondaka yekolelo tu kasi loku kunda.

⁹ Momo, nda o popia lomẽla wove, huti, Yesu eye Ñala, kuenda o kolela lutima wove okuti Suku wo pindula kuava va fa, o popeliwa.

¹⁰ Momo, eci omunu a kolela lutima waye, oco a tendiwa ndukuesunga, leci a likekembela akandu aye lomẽla, oco a popeliwa.

¹¹ Ovisonehua vi popia viti, Lomue u kolela o kutisua osõi.

¹² U Yudea lu Helasi ka va litepele. Momo Ñala yavo umuamue, haeye amuila ukuasi waye kuava vosi vo vilikiya.

¹³ Momo, ndeci ca sonehiwa okuti, Vosi va vilikiya loku tukula onduko ya Ñala va popeliwa.

¹⁴ Puãi va vilikiya ndati u ka vo kolelele? Va kolela ndati u ka va la yeva? Va yeva ndati nda lu o kunda sio?

¹⁵ Va kunda ndati nda ka va tumiwile? Ndeci ca sonehiwa okuti, Olomãi viava va sapula ondaka yiwa haiyo yombembua, via posoka nye!

¹⁶ Puãi havosiko va pokola kondaka yiwa. Momo Isaya hati, A Ñala, helie wa kolela eci a yeva kokuetu?

¹⁷ Oco ekolelo li tunda kueci ci yeviwa, leci ci yeviwa ci tunda koku kunda Kristu.

¹⁸ Puãi ndi pula siti, Ka va yevele hẽ? Va yeva muẽle, momo, Esapulo liao lia pitila kolofeka viosi, olondaka viao kesulilo lioluali luosi.

¹⁹ Mula vali siti, Isareli hẽ, ka co lombolokele? Tete Mose wa popia hati, Ndi va muisa ukuse wava hamanuko. Ndi va lingisa onyeño lomanu vakuanumbi.

²⁰ Isaya wa toñomala hati, Nda sangiwa lava ka va sandele. Nda litukulula kuava ka va mulile.

²¹ Puãi, oku tukula Isareli, wa popia hati, Eteke liosi ndoluĩla ovoko ange komanu va sina haivo va linga vakualonamalala.