VA ROMA 1 - Embimbiliya - Bíblia Sagrada em Umbundu

¹ Ame ndi Paulu, haime ndukuenje wa Yesu Kristu, haime nda kovongiwa oku linga upostolo, kuenje nda tumbikiwila oku kunda ondaka yiwa ya Suku,

² yina a likuminya ale, yu ovaprofeto vaye va yi sapula vovisonehua vi kola,

³ haiyo yi lombolola Omõlaye, una wa citiwa ketimba vepata lia Daviti.

⁴ Eci a pinduiwa ku vakualufa oco Espiritu li kola wo linga Omõla a Suku, kuenje wo wiha unene. Omõlaco, eye Yesu Kristu Ñala yetu.

⁵ Kokuaye tua tambula ocali kuenda omangu yupostolo okuti, tu tavisa vakualofeka viosi mekonda lionduko yaye.

⁶ Lenevo wa kovongiwi oku tiama ku Yesu Kristu.

⁷ Ñasi loku sonehela va Roma vosi va soliwa la Suku, haivo va tukuiwa olosandu. Ocali lombembua ya Suku Isietu leyi ya Ñala Yesu Kristu, yi kale lene.

⁸ Tete ndu panduili omo ekolelo liene lia yevala koluali luosi. Yesu Kristu o pitiya olopandu viange ku Suku.

⁹ Suku una mbumba lutima wange wosi vupange woku sapula ondaka yiwa y'Omõlaye, eye ombangi yange okuti ndu tukoli olonjanja viosi volohutililo viange.

¹⁰ Ndi likutilila okuti, nda ci tava, ocipango ca Suku ci muisa onjila yimue yoku iya kokuene.

¹¹ Momo ndi livela oku u moli okuti ndu muisi ocali cimue ce Espiritu coku vu kolisa.

¹² Ca lomboloka okuti, oku sanga evelo lioku likolisa pokati, okuti ekolelo liene li ñuatisa ame, kuenda ekolelo liange liu kuatisi ene.

¹³ A vamanji, koleli okuti, ndaño lopo nda tatekiwa, haimo olonjanja via lua nda yonguile oku iya kokuene okuti pokati kene sangapovo apako ndeci nda sanga pokati ka vakualofeka vakuavo.

¹⁴ Ñuete ofuka yocikundi ci kola coku kundila va Helasi lolongoya, kuenda vakualondunge lava ka va kuete olondunge.

¹⁵ Oco ndi livelela oku u kundilivo ondaka yiwa ene vu kasi vo Roma.

¹⁶ Momo si kuete osõi yondaka yiwa. Ondaka yaco oyo unene wa Suku u popela vosi va kuete ekolelo, tete va Yudea, noke va Helasi.

¹⁷ Momo, vondaka yaco, omo mua situlukila esunga lia Suku, kuenje, tunde kefetikilo toke kefulilo te lekolelo, ndeci ca sonehiwa okuti, Ukuesunga o muila omuenyo kekolelo.

¹⁸ Momo onyeño ya Suku yi situluiwa tunde kilu, kuenje yi veta etombo liosi, lakandu osi omanu vana va tateka ocili ca Suku lakandu avo.

¹⁹ Momo, eci ca Suku ci tẽla oku kũlĩhiwa va ci kũlĩha, omo Suku muẽle wa va ci situluila.

²⁰ Tunde kokululikiwa kuoluali, unu waye, una ko muiwa muiwa lovaso, okuti unene waye ko pui, kuenda okukola kuaye, u molehela ciwa vovina a lulika. Oco ka va tẽla vali oku tatãla.

²¹ Momo, ndaño va kũlĩha Suku haimo ka vo kemainyaile nda Suku, pamue oku u pandula, puãi va lipanda ño lovisimilo viavo, kuenje ovitima viavo viuveke via vuvala.

²² Osimbu va linga vati, Tuakualondunge, va linga aveke.

²³ Ulamba wa Suku ka fa fa vo pongolola ociñumañuma cesetahãlo liomunu o fa fa, leli liolonjila, leli liovinyama viovolu akuãla, kuenda eli liapuka.

²⁴ Oco, omo va kasi loloñeyi vĩvi vovitima viavo, Suku wa va eca kevĩho liosi, okuti atimba avo a lavisua pokati kavo muẽle,

²⁵ Momo elomboluilo liocili liomo Suku a kasi va li pongolola uhembi, kuenje va fendela loku vumba ocilulikilo, okuti u wa ci lulika hayeko, una okuti o sivayiwa oloneke ka vi pui. Amene.

²⁶ Oco Suku wa va eca koloñeyi vi kutisa osõi. Momo akãi vavo va pongolola ovituwa via sunguluka ha va lingi evi ka via sungulukile.

²⁷ Lovalume le va liweka oku kala lakãi ndeci Suku a panga, kuenje va likuatela pokati oloñeyi vĩvi. Alume va linga akutisasõi lalume, kuenje va limuisa onima ya sesamela okulueya kuavo.

²⁸ Kuenje, omo ka va tavele oku kũlĩha Suku, oco Suku wa va eca kutima wuveke, kuenda koku linga umbondo.

²⁹ Ve yuka evĩho liosi, okuti olohole locipululu lonya, Kuenje, omo ve yuka alivelo ãvi, lumondi, lovama, kuenda uhembi, lesuvu, oco va linga vakualombonde.

³⁰ Va sokola vakuavo. Va suvuka Suku. Va linga vakuemande haivo va lituna loku lipanda. Va sovola ovina vĩvi. Va tomba olonjali viavo.

³¹ Olondunge ka va kuete. Havakuaciliko. Ocisola ka va kuete. Ohenda ka va kuete.

³² Ndaño va kũlĩha ndomo Suku a tetulula lesunga, okuti ava va lingainga ovina viaco va sesamela okufa, haimo, haku vi linga ko lika, puãi va pandulavo ava va vi linga.