VA KOLOSAI 3 - Embimbiliya - Bíblia Sagrada em Umbundu

¹ Oco nda wa pinduiwi ocili kumue la Kristu, sandi ovina vi kasi kilu, kuna Kristu a kasi loku tumala kondio ya Suku.

² Sokololi ovina viokilu, vioposi havioko.

³ Momo wa fi, kuenje ovimuenyo viene via solekiwila vu Suku kumue la Kristu.

⁴ Eci Kristu, haeye omuenyo wetu, a tukuluka, oco ene, lenevo, vu tukulukavo kumue laye vulamba.

⁵ Oco, ipayi ovituwa vĩvi vi tiama koluali, viokuti ukahonga, levĩho, lokanyaima, kuenda oñeyi yĩvi, locipululu ca lomboloka efendelo lioviteka.

⁶ Omo omãla vesino va kasi lovituwa viaco, oco onyeño ya Suku yi veyilila.

⁷ Eci ovimuenyo viene via kaile lovituwa viaco wa endaendaili lavio.

⁸ Cilo puãi, vimbipo viosi. Imbipo muẽle onyeño, lekaka, lukuse, kuenda oku lundila, lolombangulo vi linga osõi.

⁹ Ko ka likembi pokati, momo wa luli omunu wale lovilinga viaye vĩvi,

¹⁰ kuenje wa wali omunu wokaliye. Omunu waco wokaliye o kasi lokutumbuluiwa lukũlĩhiso wokaliye okuti o setahala usovoli waye.

¹¹ Oco, ka kuli vali u Helasi, lu Yudea, pamue yu wa tetiwa evamba, lu ka tetiwile, pamue ukualofeka, lu Skutia, pamue upika lomãmãle. Puãi Kristu eye cosi, haeye o kasi vokati ka vosi.

¹² Kuenje omo wa noliwi la Suku, haene wa soliwi, kuenje wa lingi vaye va kola, oco wali ohenda kuenda ocikembe lumbombe loku unjuka kuenda epandi.

¹³ Kuati utima woku kuamelela loku lisola pokati. Kuenda, nda vu likuetele olondaka, lieceli pokati. Ndeci Kristu o weceli ene, haico ene eceli.

¹⁴ Puãi ca piãla enene, wali ocisola, momo ocisola oco ci kutila cosi pamosi vomunga ya kanguka.

¹⁵ Kuenda vali, tavi okuti ombembua ya Kristu yi viala vovitima viene, momo oco wa kovongiwili, okuti vu linga ovimatamata vietimba limosi. Lingi vakuakuimbaimba olopandu.

¹⁶ Ovilongua via Kristu vi kale vovitima viene ndukuasi. Lilongisi pokati loku lilungula lolondunge viocili. Imbaimbi olosamo lovisungo lasivayo Espiritu. Ovitima vi yuke yuke olopandu ku Suku.

¹⁷ Kuenje cosi vu linga, ci kale ondaka yi popiwa, ci kale ovilinga, ci lingili vonduko ya Ñala Yesu. Kovina viosi Ñala Yesu eye a linge Mitakati yene oku imba olopandu ku Suku Isia.

¹⁸ Ene akãi, vumbi vaveyene ndeci ca sesamela ava va kasi vu Ñala.

¹⁹ Ene alume, soli akãi vene. Ko ka kali lavo loviñali.

²⁰ Ene amãla, pokoli kolonjali viene kovina viosi, momo oco ci sanjuisa Ñala.

²¹ Ene a vaisia, ko ka sanumuli onyeño yomãla vene, sanga ci va kokela olukonyo.

²² Ene apika, pokoli ku vacime cene va palo posi kovina viosi. Ko ka lingi upange wene eci vacime va kasi loku vu vanja lika, ndava va livela oku panduiwa lomanu. Puãi, kupange wene, kuatiko lutima wosi ndava va sumbila ocili Ñala.

²³ Upange wene, nda we, nda we, u lingi ciwa ndava va vumba Ñala Yesu, ndava va vumba omanu hacoko.

²⁴ Koleli okuti ku Ñala vu tambula ocipiñalo ndonima yene. Cime cene vu vumba, Ñala Yesu.

²⁵ Momo ondingaĩvi yi tambula onima yũvi a linga. Ka kuli ocame.