VA KOLOSAI 2 - Embimbiliya - Bíblia Sagrada em Umbundu

¹ Momo njongola okuti vu kũlĩha ndomo ndo sakalaleli ca lua, loku sakalalela va Laodokea la vosi ka va la mola ocipala cange.

² Ndi livela nda ovitima viavo vi kolisua omo via pandekiwila pamosi locisola. Ndi livela nda ukuasi wosi wukũlĩhiso, una ka u tatãliwa, u linga wavo. Ndi livelavo nda ukũlĩhiso welumbu lia Suku u linga wavo. Elumbu liaco Kristu.

³ Vu Kristu mua solekiwila ovokuasi osi olondunge luloño.

⁴ Eci ndi ci popela okuti lomue u kembi lolondaka viusõsẽle.

⁵ Momo, ndaño si kasi lene vetimba, haimo vutima ñasi lene. Nda sanjuka ca lua oku mola ndomo wa lisokiyi ciwa, loku mola ndomo ekolelo liene lioku kolela Kristu lia pama ocili.

⁶ Oco, ndeci wa tambuli Kristu Yesu, haeye Ñala, haico cilo kolisiko oku endaenda laye.

⁷ Olombombo viene vi tuamele vokuaye. Amamiko oku kula vokuaye loku pamisua vekolelo ndeci wa longisiwi. Olopandu viene vi lue.

⁸ Lunguki sanga umue o nyõla etavo liene lovilongua viesanda liaño. Va sole oku tõlisa ño ovisila viomanu lovihõlo violuali, vina ka via tundile ku Kristu.

⁹ Momo okuyuka kuosi kua Suku ku kasi vu Kristu.

¹⁰ Vu Kristu, haeye tete kuviali lunene, omo wa limuisili omuenyo wa suapo.

¹¹ Vu Kristu wa tetiwi evamba, evamba liaco puãi haliovaka osituko. Evamba liaco, hailio evamba lia tetiwa la Kristu, lio wupi akandu ositu.

¹² Eci wa papatisui wa kendiwi kumue laye, kuenje wa pinduiwivo kumue laye. Wa pinduiwi omo wa koleli unene wa Suku una wa pindula Yesu kuava va fa.

¹³ Kuenje ene wa fili lolohõle viene luyamba wene wetimba, haene Suku wo muisi omuenyo kumue la Kristu. Wa tu ecela akandu etu osi.

¹⁴ Wa imula ovisonehua via tu kuta ño lovihandeleko viavio. Wa vi nyõla poku vi valela kekulusu.

¹⁵ Wopa ovimaleho viovonene lovoviali, kuenje wa a lekisa ndomo a kasi ocili. Wa a yula lekulusu.

¹⁶ Oco, lomue ka ko pisili ovisila viokulia levi viokunyua levi violofesta, pamue vievi violosai viokaliye, levi viesambata.

¹⁷ Ovina evi ulembo ño weci ci laika oku iya. Puãi eci ci koka ulembo waco, Kristu.

¹⁸ Lomue ka ko pumbisi onima yene poku u kisiki okulikandangiya kuaño loku fendela ovangelo. Omunu waco wa kolela ovinjoinjoi, kuenje wa likolela esanda, omo utima waye we yuka vietimba.

¹⁹ Ka tokekele k'Utue. Kuenje k'Utue oko ku tunda okukula kuetimba liosi, hailio li tekuiwa loku tokekisua ciwa lasokoluilo alio lasipa alio. Okukula kualio ku tunda ku Suku.

²⁰ Nda kovina viaño violuali wa fili la Kristu, ci kasi ndati okuti lopo vu kasi ño ndava va sanjukila oluali? Nye vu pokuila ño ocikukui kovihandeleko viaño,

²¹ viti, Ku ka kuate congandi pamue ku ka lie congandi, pamue ku ka lambe congandi.

²² Ovihandeleko viaco viosi vi tukula ovina vi nyõleha tuli vi kuatiwa. Ovisila viaco lovihõlo viaco via kapiwa lomanu.

²³ Vi moleha okuti vi kuete olondunge omo vi kisika efendelo lia tĩla loku likandangiya, loku pokuisa etimba lukãlu. Puãi eci ci kuatisa ocili ka vi ci kuete. Vi silivila lika oku sanjuisa etimba.