VA HEVERU 9 - Embimbiliya - Bíblia Sagrada em Umbundu

¹ Puãi, ndaño ocisila catete ca kala lovihandeleko viefendelo, kuenda ocitumalo ci kola voluali lulo.

² Momo va angiliya ombalaka. Vohondo yayo yatete mua kala ondiyelo lomesa lolombolo vioku taliwa. Va ci tukula vati, Ocitumalo ci kola.

³ Konyima yongumbo yavali kua kala ohondo yovokati, va yi tukola vati, Ohondo yi kola koku kola.

⁴ Vohondo yaco yovokati mua kala ociyukilo culu cinsensu locikasa covisila ca lañiwa lulu kolonele viosi. Vokati kaco mua kala ombia yulu omu mua kapiwa mana, kuenda ombueti ya Arone yina ya yova, lovawe ocisila.

⁵ Kilu liaco, va Keruvi vulamba va vindikiya omangu yohenda. Ovina evi oku vi vangula handi, cimosi cimosi, ka tu ci tẽla.

⁶ Oco, eci ovina evi via angiliyiwa ale, oco ovitunda vi iñaila vohondo yatete oku tẽlisa ovikele viavo viefendelo.

⁷ Puãi, vohondo yovokati, ocitunda cinene lika ci tẽla oku iñilamo, kuenje ndaño eye, iñila onjanja yimosi lika kunyamo. Puãi, ndaño eye, ka tẽlele oku iñilamo te ambata osonde yoku lilumbila eye muẽle, leyi yoku lumbila olohole viomanu vina via lingiwa lonumbi.

⁸ Oco Espiritu Sandu li lekisa okuti onjila yokohondo yi kola koku kola ka yi yikuluiwa osimbu ohondo yatete yi tãi.

⁹ Oco ocilayi cotembo yilo. Oku sokiya ndomo ca lomboloka okuti ovilumba vioku yoka levi vioku pia elisi, vina ka vi tẽla oku puisa ukuefendelo eko kutima waye, ovio vi lumbiwa.

¹⁰ Ovihõlo viaco vi tiama lika kovilia lovinyua lokuyua kuiñi kuiñi, haivio ovihõlo vietimba via handelekua toke keteke lietumbuluko.

¹¹ Puãi Kristu, eci eya kuenje wa linga Ocitunda cinene covina viwa vi laika oku iya, oco eye wa pita vombalaka yimue ya velapo, ya piãla enene, haiyo ka ya tungiwile lovaka, kuenje ka ya tiamele kovilulikilo vilo,

¹² kuenje wa iñila olumue vohondo yi kola koku kola. Kambatele osonde yolohombo pamue yolonale, wambata puãi osonde yaye muẽle, kuenje wa sanga eyovo ka li pui.

¹³ Momo, nda oku nyila omanu va vĩhisua osonde yolohombo lolonale, pamue etiko lionema, ku va kuatisa okuti va yelisua katimba,

¹⁴ siti, ca piãla vali enene, osonde ya Kristu yi yelisa ovitima viene, okuti vi pua ovilinga viokufa ene ho vumbi Suku o kasi lomuenyo? Espiritu ka li pui lia linga Mitakati eci Kristu a lilumba ku Suku, kuenje wa lilumba tupu wa pua eko.

¹⁵ Oco Kristu wa linga Kapitiya kocisila cokaliye. Kuenje, omo kueya okufa kumue ku yovola ava va kovongiwa, oku va yovola kakandu ana a tiamela kocisola catete, oco, vaco va kovongiwa va tambula ocipiñalo ka ci pui, ndeci ca likuminyiwa.

¹⁶ Momo, eci kali ukanda woku tepisa ovikuata vi piñaliwa, ukanda waco ka u silivila te ci lekisiwa ocili okuti u wo soneha wa fa.

¹⁷ Momo ukanda woku tepisa ovikuata vi piñaliwa u kola lika eci muẽle a fa, ko koli osimbu u wo soneha a kasi lomuenyo.

¹⁸ Oco, ndaño ocisila catete ka ca kolisiwile ño, te losonde.

¹⁹ Momo, eci ovihandeleko viosi via sapuiwa komanu vosi la Mose, ndeci via handelekua, oco Mose wa nyañula osonde yolonale, leyi yolohombo, kuenda ovava, lovonya omeme a kusuka, kuenda ovisapa, kuenje wa nyila kelivulu liaco kuenda komanu vosi.

²⁰ Wa linga hati, Eyi osonde yocisila co handelekeli Suku.

²¹ Haico, wa nyilavo kombalaka lo kovikuata viosi viefendelo.

²² Ci tava oku popia okuti, kovihandeleko ovina viosi vi yelisua losonde. Nda osonde ka ya peseliwile nda ka kuli ongecelo.

²³ Oco ca sesamela okuti ovisetahãi viovina viokilu vi yelaisua lovihõlo evi, ovina viokilu puãi, ovio muẽle vi yelaisua lovilumba via velapo evi ndeti.

²⁴ Momo Kristu ka iñilile vocitumalo ci kola ca tungiwa lovaka, haico ca setahala eci cocili, puãi wa iñila kilu muẽle, cilo o tu molehela kovaso a Suku.

²⁵ Puãi, ka iñaila okuti o lilumba olonjanja via lua, ndeci ocitunda cinene ci iñaila vocitumalo ci kola unyamo kunyamo losonde hayacoko.

²⁶ Nda oco, nda co sesamela oku tala ohali yokufa olonjanja via lua, tunde koku seveta oluali. Puãi cilo, kesulilo liolotembo, eye wa moleha olumue oku imula akandu poku lilumba eye muẽle.

²⁷ Kuenje, ndeci omanu vosi va fa onjanja yimuamue, noke kuli ekanga,

²⁸ haicovo Kristu, omo a lumbiwa olumue oku ambata akandu a va lua, oco o moleha onjanja yavali, haku sokiyako akandu, puãi oku popela ava vo felevela.