VA HEVERU 8 - Embimbiliya - Bíblia Sagrada em Umbundu

¹ Kaliye, esĩla lieci tu kasi loku popia lieli, Tu kuete ocitunda cinene ca lisoka leci tu kasi loku vangula. Ocitunda cetu ca tumala kondio yocalo ca Tõlo kilu.

² Ci vumba vumba vocitumalo ci kola kuenda vombalaka yocili, yina Ñala a tunga, omunu hayeko.

³ Momo ocitunda cinene cosi ci kapiwila oku lumba ovilumba vioku yoka levi vioku pia elisi. Oco, ca sesamela ocitunda cetu cinene oku kuata cimue coku lumba.

⁴ Kaliye, nda wa kaile kilu lieve, nda ka lingile ocitunda, momo kuli ovitunda vi lumba lumba ovilumba, ndeci ca tukuiwa vovihandeleko.

⁵ Va fendaila ociñumañuma loku vumba undembo wocituimalo ci kola co kilu. Momo, eci Mose a soka oku tunga ombalaka, Suku wo longisa hati, Lunguka okuti o tunga ovina viosi ndoseteko va ku lekisa komunda.

⁶ Puãi cilo ceya okuti Kristu wa sanga onjila ya velapo yoku vumba. Kuenda onjila yaco ya velapo okuti olonjila viale vi sule, ndeci ocisila a lingila kapitiya ca velapo, okuti ovisila viale vi sule, momo onjila yaye ya sevetiwila kolohuminyo via velapo.

⁷ Momo ocisila catete nda ca puile okukamba, ocisila cavali nda ka ca sukiliwile.

⁸ Momo Suku wa va vetisa evelo eci a popia hati, Ñala wa linga hati, Tala, oloneke viya okuti, ndi lisila ocisila cokaliye lonjo ya Isareli, kuenda onjo ya Yuda.

⁹ Ocisila caco ka ci lisoki locisila nda lisilile lolosekulu viavo keteke nda va kuata peka loku vopa vofeka ye Egito. Momo, omo ka va tumalele vocisila cange, oco nda va ekelela. Oco ca popia Ñala.

¹⁰ Ñala wa popia hati, Ocisila ndi lisila lonjo ya Isareli kovaso yoloneke viaco, ceci, Ñapa ovihandeleko viange volonulo viavo. Ndi vi soneha kovitima viavo. Ame ndinga Suku yavo, lovo va linga omanu vange.

¹¹ Kuenje ka va longisa vali okuti, omunu omunu o longisa u a lisungue laye, pamue o longisa manjaye, hati, Kũlĩha Yehova,— momo wosi va ñulĩha, tunde ku o sule pokati kavo toke ku wa velapo.

¹² Momo ngecela olohole viawo lohenda, lakandu avo si a ivaluka vali.

¹³ Eci Suku a tukula ocisila cokaliye, wa lekisa okuti catete ci kasi loku pita. Kuenje cimue ci kasi loku kukuta loku kuka ca kamba naito oku takata.