VA HEVERU 7 - Embimbiliya - Bíblia Sagrada em Umbundu

¹ Momo Melikicedeke yaco, u wa kala osoma ya Salemi, haeye ocitunda ca Suku Fu, wa ñualehela la Avirahama eci Avirahama a tiuka koku lundula olosoma, kuenje wo sumũlũisa.

² Avirahama wo wavela onepa yekui yokovina viosi. Haeye Melikicedeke tete wa linga Somayesunga, momo oco ca lomboloka onduko yaye, vali wa linga osoma ya Salemi, okuti Somayombembua.

³ Isia ka kuete, ina ka kuete, epata ka kuete, efetikilo lioloneke ka kuete, pamue esulilo liomuenyo. Puãi omo a setahaisua l'Omõla a Suku, oco o linga ocitunda cenda ño-o hũ, ka ci pui.

⁴ Limbuki Melikicedeke ndomo onene, okuti ndaño Sekulu Avirahama wo lambuila onepa yekui yevi via pundiwa.

⁵ Kuenda va Lewi, ava va tambula utunda, va kasi locisila coku lambuisa omanu onepa yekui, ndeci ca tukula ovihandeleko, okuti va lambuisa ava vasitue lavo, ndaño va tunda koviongo via Avirahama.

⁶ Puãi Melikicedeke, haeye hangandiavoko, wa lambuisa Avirahama onepa yekui, kuenje wa sumũlũisa u wa kala lohuminyo.

⁷ Ka ci patãliwa okuti, u o sule o sumũlũisua lu wa velapo.

⁸ Konele yavo omanu va fa fa ovo va tambola onepa yekui, puãi konele tu kasi loku tukula, u o tambula vo wimbila uvangi okuti o kasi lomuenyo.

⁹ Oco ci tava oku popia okuti, ndaño Lewi wa lambuisa onepa yekui, layevo wa lambula onepa yekui eci Avirahama a lambula,

¹⁰ momo eye wa kala handi voviongo via isiaye eci Melikicedeke a ñualehela laye.

¹¹ Kaliye, nda okukanguka kuiya lutunda wa Lewi, omo omanu va tambula lawo ovihandeleko, nye ci yonguila vali okuti kuiya ocitunda cikuavo ndukuacisoko ca Melikicedeke, okuti, umue ukuacisoko ca Arone, heyeko?

¹² Momo, nda utunda u pongoluiwa, oco ovihandeleko laviovo vi pongoluiwa.

¹³ Momo u tu kasi loku vanguila ovina evi ukuepata liñi. Kepata liaco ka kua la tunda umue wa vumba kutala.

¹⁴ Momo ca kũlĩhiwa okuti Ñala yetu wa tunda ku Yuda, kuenje Mose ka la tukuila epata liaco upange wutunda.

¹⁵ Eci ci moleha ca velapo eci kuiya ocitunda cikuavo ca tuwa nda Melikicedeke,

¹⁶ haico ca linga ocitunda, puãi ha locihandeleko cocisila cetimbako, te lunene womuenyo ko tẽla oku nyõliwa.

¹⁷ Momo uvangi vo wimbila wowu, vati, Vucitunda ka ci pui ndocisoko ca Melikicedeke.

¹⁸ Konele eyi kuli ocisila catete ca imuiwa, momo ca leñela kuenje ka ci silivila vali.

¹⁹ Momo ovihandeleko ka via kanguisile cimue. Konele yikuavo kuli elavoko lia velapo, hailio tu amela lalio ku Suku.

²⁰ Lelavoko liaco lia velapo ka lieyile ño olio muẽle te loku lisinga.

²¹ Ale, ava va noliwile oku linga ovitunda ka va silĩhiwile oku lisinga, Kristu puãi wa kapiwa loku lisinga. Ñala wa lisinga, kuenje ka pongoloka, hati, Vucitunda ka ci pui.

²² Kuenje eci ci lingisa Yesu onjeke yocisila ca velapo.

²³ Ovitunda viosiahũlu via kaile via lua, momo okufa kua va tateka oku kala ño-o hũ.

²⁴ Yesu puãi, omo o tumala ño-o hũ, ka pui, oco utunda waye lawovo ka u pui.

²⁵ Oco, toke koloneke ka vi pui, Yesu o tẽla oku popela olumue ava va kokela ku Suku poku kolela Yesu, momo o kasi hũ lomuenyo oku va livondelelako.

²⁶ Momo tu sukila ocili oku kala locitunda cinene ndoco okuti, cimue ci kola, haico ka ci kuete etondelo, ce lipua, haico ca tepiwa ku vakuakandu, kuenje ci kasi vekemalo kilu liovailu.

²⁷ Eye ka sukila oku lumba ovilumba eteke keteke, ndovitunda viaco vinene, tete, oku lumbila akandu aye, vali, oku lumbila akandu omanu, momo wa ci lingila olumue eci a lilumba eye muẽle.

²⁸ Momo ovihandeleko vi tukula alume va leñela oku linga ovitunda vinene. Puãi ondaka yoku lisinga, yina ya kuama ovihandeleko, yi tukula Omõla wa kanguisua otembo ka yi pui.