VA HEVERU 6 - Embimbiliya - Bíblia Sagrada em Umbundu

¹ Oco tu si ovina viefetikilo liovilongua via Kristu loku amela kovina via sesamela akulu. Ka tu ka sakalali ño-o hũ lovina viociseveto, okuti oku kisika ño-o hũ oku likekembela akandu, loku sia ovilinga vi koka okufa, kuenda oku kolela Suku.

² Ka tu ka lilongisi ño-o hũ ovipama vi lombolola ovisila vioku yelisa, levi vioku kapa ovaka, levi vi lombolola epinduko liava va fa, kuenda ekanga ka li pui.

³ Eci tu ci linga nda Suku wa panga.

⁴ Momo, ava va kaile ale vocinyi, haivo va mahako ale kocali cokilu loku kũlĩha ale Espiritu Sandu,

⁵ haivo va tekuiwa ale londaka ya Suku lovonene anyamo okovaso,

⁶ nda va konyoha, ka ci tẽliwa oku va tiula vali koku likekembela akandu avo. Momo vovitima viavo va valela Omõla a Suku kekulusu onjanja yavali, kuenje vo pembuisa.

⁷ Momo osi ya nyua nyua ombela yi loka lokako olonjanja via lua, kuenje yima ovikũla vi kuatisa ava va vi lima, oyo yi sumũlũisua la Suku.

⁸ Puãi, nda yi tunda olosongo lososo, yi linga ocipembe, kuenje yi kamba naito oku siñaliwa. Esulilo liayo oku pia londalu.

⁹ A vakuacisola, ndaño tu popia ndomo, haimo oku vu sokolola, tua kolela okuti ovina via velapo, vina vi tiama keyovo, ovio viya kokuene.

¹⁰ Momo Suku hokuanyako okuti ivalako upange wene kuenda ocisola wa lekisi loku vumba olosandu vonduko yaye, ndeci vu kasi loku linga toke opo.

¹¹ Oco, tu yongola okuti ene vosi, omunu omunu, vu lekisa ombili yaco oku suisapo elavoko liaco toke kesulilo,

¹² okuti, ka vu lingi vakuawesi, puãi vu setukula ava va piñala olohuminyo omo va kasi lekolelo lepandi.

¹³ Momo, eci Suku a likuminya la Avirahama, oku lisinga, wa litukula eye muẽle, omo ka kaile lumue wo velapo okuti nda o lisinga laye.

¹⁴ Wa likuminya hati, Oku ku sumũlũisa, hu sumũlũisa muẽle, oku ku luisa, hu luisa.

¹⁵ Oco Avirahama, omo wa talamela lepandi, wa tambula ohuminyo.

¹⁶ Momo omanu oku lisinga va lisingasinga lumue wa va velapo, kuenje, kolonamalala viavo viosi, okulisinga oko ku teta onimbu.

¹⁷ Oco Suku, eci a yongola oku lekisa olumue ku vakapiñala kohuminyo okuti ocipango caye ka ci pongoloka, oco wa lisinga,

¹⁸ lohuminyo yaye lesingo liaye, ovio ovina vivali ka vi pongoloka, haivio Suku ka tẽla oku kemba lavio. Wa ci lingila okuti etu tua tila ha tu puluka, etu tu kolisua oku kuatelela kelavoko lia tu kapiwila kovaso.

¹⁹ Elavoko eli tu li kuete ndonjundo ya kola ngo yutima, hailio elavoko liñila vohondo yi kola yovokati konyima yongumbo.

²⁰ Vohondo yaco Yesu wa tu pitila kovaso nda kesongo, wa linga ocitunda cinene ka ci pui ndocisoko ca Melikicedeke.