VA HEVERU 5 - Embimbiliya - Bíblia Sagrada em Umbundu

¹ Momo ocitunda cinene cosi ca noliwa pokati komanu ci tukuiwila oku linga mitakati pokati komanu la Suku, loku lumbila akandu ovilumba vioku yoka levi vioku pia elisi.

² Ci tẽla oku livala evando la vakuanumbi, lava va lueya, momo eye muẽle wa hongua loku leñela.

³ Oco o kuete ocikundi coku lumbila akandu aye muẽle ndeci o lumbila akandu omanu.

⁴ Kuenje lomue o likapa esumbilo liaco eye muẽle, te o tukuiwa la Suku, ndeci Arone a tukuiwa.

⁵ Haico Kristu layevo ka lipandiyile okuti o linga ocitunda cinene, puãi wa noliwa lu wa popia laye hati, Ove vumõlange, etaili nda ku cita.

⁶ Ndeci a popiavo kuiñi hati, Vucitunda ka ci pui, Ove o linga ño-o hũ ocitunda ndocisoko ca Melikicedeke.

⁷ Yesu, koloneke a kala letimba, wa lomba lomba, loku likutalaila, loku liyula lasuelela ku wa tẽla oku u popela kokufa, kuenje wa yeviwa momo wa sumbila Suku.

⁸ Ndaño eye Omõla, haimo, kohali yaye, wa lilongisa epokolo.

⁹ Eci a kanguisua wa linga ono yeyovo ka li pui lia vosi vo pokola.

¹⁰ Suku wo tukula hati, Eye ocitunda cinene ndocisoko ca Melikicedeke.

¹¹ Kondaka eyi tu kuete ca lua coku popia, puãi ca tĩla oku ci lombolola, momo ene wa lingi ovisitatui.

¹² Momo, ndaño otembo yilo nda wa sesameleli oku linga alongisi, haimo vu sukila umue o vu longisa ovina viefetikilo liolondaka via Suku. Vu sukila asenjele, hakulia kua kolako.

¹³ Momo wosi o lia lia asenjele ka kũlĩhile ondaka yesunga, momo oñaña.

¹⁴ Puãi okulia kua kola kuakulu, okuti kuava va tẽla oku tepisa pokati keci ciwa leci cĩvi, omo olondunge viavo via pindisua.