VA HEVERU 4 - Embimbiliya - Bíblia Sagrada em Umbundu

¹ Oco, osimbu tu kasi lohuminyo yoku iñila vepuyuko liaye, lunguki, sanga umue pokati kene o moleha okuti wa li lipumbisa.

² Momo etu tua kundiwila ondaka yiwa ndovo, puãi ovo, ondaka va yeva ka ya va kuatisile momo ka ya sangele ekolelo vovitima viava va yi yeva.

³ Momo etu tua tava tu iñila vepuyuko liaco, ndomo a popele hati, Ndeci nda lisinga lonyeño yange, siti, Ka va iñila vepuyuko liange, ndaño ovopange aye a malusuiwa tunde kokusevetiwa kuoluali.

⁴ Momo kuli kumue a tukula eteke liepanduvali ndomo, hati, Suku wa puyuka kupange waye wosi keteke liepanduvali.

⁵ Haiko vali a lingila hati, Ka va iñila vepuyuko liange.

⁶ Oco, omo pa siala okuti vamue va iñilamo, kuenda ava va kundiwila ondaka yiwa tete ka va iñilamo omo va sina,

⁷ oco, wa tukula vali eteke limue hati, Etaili. Wa ci popia lomẽla wa Daviti eci pa pita osimbu ya lua. Wa ci popia lolondaka via popiwa ale, hati, Etaili, eci vu yeva ondaka yaye, ko ka tĩlisa ovitima viene.

⁸ Momo Yehosua, nda wa va muisile epuyuko, Suku nda ka popele vali noke, hati, Eteke likuavo.

⁹ Oco pa sialela omanu va Suku epuyuko liesambata.

¹⁰ Momo wosi iñila vepuyuko lia Suku o puyukavo kovopange aye ndeci Suku a puyuka kovopange aye.

¹¹ Oco, tu likapeli oku iñila vepuyuko liaco, okuti lomue o konyoha loku sina ndovo.

¹² Momo ondaka ya Suku yi kasi lomuenyo, haiyo yi kasi loku talavaya, haiyo ya tua enene, omoko ya tua nelembali yi sule. Ondaka yaco yi toma toke yi tepa omuenyo locilelembia, kuenda asokoluilo lupuma, haiyo yi limbuka ovisimilo lovipango viutima.

¹³ Ku Suku ka kuli ociluvo ca salamisua, puãi viosi vi situluiwa, kuenje vi moleha kovaso ona o laika oku tu tetuluila.

¹⁴ Oco, omo tu kasi locitunda cinene ca piãla, haico ca iñila vilu, okuti Yesu Omõla a Suku, oco tu kuateleli ketavo lietu.

¹⁵ Ka tu kuete ocitunda cinene okuti okuleñela kuetu ka ku u yevala, puãi tu kuete ocitunda ca yonjaiwa kovina viosi ndetu, haimo ka ca la linga ekandu.

¹⁶ Oco, tu kokeli lutõi kocalo cocali, okuti tu mola ohenda loku sanga ocali ci tu kuatisa eci tu sukila oku kuatisiwa.