VA HEVERU 3 - Embimbiliya - Bíblia Sagrada em Umbundu

¹ Oco a vamanji va kola, haene wa tukuiwi velaleko li kola lia tunda kilu, sokololi Yesu, eye Upostolo, haeye Ocitunda cinene cetavo lietu.

² Eye wa vumba lesunguluko una wo nola, ndeci Mose a vumba lesunguluko vonjo yosi ya Suku.

³ Haimo, ca sokiyiwila Yesu oku velapo Mose kulamba, ndeci u o tunga onjo o kuete esumbilo lia lua, okuti onjo yaco ci sule.

⁴ Momo onjo yosi yi tungiwa lomunu, puãi, u wa tunga ovina viosi, Suku.

⁵ Mose wa vumba lesunguluko onjo yosi ya Suku ndukuenje, hã ha lingi ombangi yovina via laika oku sapuiwa noke.

⁶ Puãi Kristu wa vumba locili onjo ya Suku ndomõlonjo. Etu muẽle tunjo yaco nda tu kuatelela kekolelo lietu, kuenda koku sanjukila elavoko lietu.

⁷ Oco, ndeci ca popia Espiritu Sandu, hati, Etaili, eci vu yeva ondaka yaye,

⁸ ko ka tĩlisi ovitima viene ndeci va linga eci vo ñualelapo, pamue ndeci keteke lieyonjo vekalasoko,

⁹ muna olosekulu viene via njonjele loku seteka, haimo via mola ovilinga viange akui akuãla kanyamo.

¹⁰ Oco nda temelele ocitumbulukila caco. Nda popia siti, Va lueya lueya ño lovitima viavo. Ka va kũlĩhile olonjila viange.

¹¹ Ndeci nda lisinga lonyeño yange, siti, Lalimue eteke va iñila vowusa wange, haico ci kala.

¹² Lunguki a vamanji, sanga pokati kene pa kala umue ukuotima ũvi, haiwo ka u kuete ekolelo, kuenje omunu waco o vu songuila oku tinduka ku Suku o kasi lomuenyo.

¹³ Puãi lilunguli pokati eteke keteke osimbu ci tava oku tukula eteke hoti, etaili, sanga umue pokati kene o tĩlisua leliaño liekandu.

¹⁴ Momo etu tu kuete onepa yetu vu Kristu nda tu kolisako oku kuamelela vekolelo lietu lia tete toke kesulilo,

¹⁵ osimbu ca popiwa citi, Etaili, eci vu yeva ondaka yaye, ko ka tĩlisi ovitima viene ndeci wa lingi eci wo ñualelipo.

¹⁶ Ava va yeva puãi haimo va ñualelapo, velie? Havosiko hẽ, vana va tundile ke Egito lusongui wavo Mose?

¹⁷ Ava a temelele akui akuãla kanyamo velie? Havanako hẽ, va lingile akandu, latimba avo a kupukila vekalasoko?

¹⁸ Kuenda vali, velie a lisingile lavo okuti ka va iñila vepuyuko liaye? Havanako hẽ va sina?

¹⁹ Oco tu limbuka okuti ka va tẽlele oku iñilamo, momo ka va kaile lekolelo.