VA HEVERU 2 - Embimbiliya - Bíblia Sagrada em Umbundu

¹ Oco, ca tu sesamela oku lunguka loku yevelela lutate ovina tua yeva sanga tu punguka ha tu vi si.

² Momo ondaka ya sapuiwa lovangelo nda yocili, kuenda esino liosi lahuku osi, nda a sanga efetuluinyo lia a sesamela,

³ etu hẽ, tu puluka ndati nda tu pukula eyovo lia piãla ndeli? Eyovo liaco lia sapuiwa tete la Ñala Yesu, noke, ava vo yeva va tu li imbila uvangi.

⁴ Suku layevo wa li imbila uvangi. Wa ci linga poku eca olondimbukiso lovikomo lovilimbu viñi viñi, kuenda poku tepaila omanu olongavelo vie Espiritu Sandu ndeci a panga.

⁵ Momo oluali lu laika oku iya, lima tu kasi loku vangula, Suku ka lu vialisile ovangelo.

⁶ Puãi umue wa imba owanji, hati, Omunu hẽ nye okuti o wivaluka, pamue omõla omunu okuti o lipasula laye?

⁷ Okasimbu kaño wo kambisa naito lovangelo. Wo futisa ulamba lesumbilo. Wo vialeka kovina wa lulika lovaka ove.

⁸ Ovina viosi wa vi vumbisa vemi liolomãi viaye. Oco, eci a vumbisa ovina viosi kokuaye, ka sile cimue okuti ka co vumbile. Puãi, ndaño oco, ka tu lete handi okuti ovina viosi via vumbisua kokuaye.

⁹ Puãi tu lete Yesu, u, okasimbu kaño, wa kambisiwa naito lovangelo. Tu u lete okuti, omo a tala ohali lokufa, oco wa futisua lulamba lesumbilo, okuti, locali ca Suku, o mahela omanu vosi okufa.

¹⁰ Ovina viosi vi kasilili Suku, haeye usovoli wavio. Kuenje, eci omãla va lua va muisua ulamba, oco co sunguluka okuti Omõlaye, u wa va songuila keyovo, o kanguisua lohali.

¹¹ Momo u o kolisa, lava va kolisiwa, vakuambuto yimosi. Oco eye ka kasilili losõi yoku va tukula vamanjaye,

¹² eci a linga hati, Sapula onduko yove ku vamanjange. Pokati kekongelo hu imbila esivayo.

¹³ Kuenda vali, hati, Ndu kolela. Kuenda vali, hati, Ame ulo, lomãla Suku a nyiha.

¹⁴ Oco, omo omãla va kuete ositu losonde, eye layevo haivio a wala, okuti o yula lokufa u o kasi longusu yokufa, okuti eliapu,

¹⁵ loku yovola ava va kala apika omuenyo wavo wosi mekonda liusumba wokufa.

¹⁶ Momo ka sakalaele oku kuatisa ovangelo, puãi wa sakalala oku kuatisa ombuto ya Avirahama.

¹⁷ Oco co sesamela oku lisetahala la vamanjaye kovina viosi, okuti o linga ocitunda cinene cohenda, haico ca kolelua vupange woku vumba Suku ha ci tuvika akandu omanu.

¹⁸ Momo, omo eye muẽle a tala ohali loku yonjiwa, oco o tẽla oku kuatisa ava va yonjiwa.