VA HEVERU 13 - Embimbiliya - Bíblia Sagrada em Umbundu

¹ Ocisola coku lisola pokati nda vamanji camameko.

² Ko ka ekeleli oku hindikisa akombe, momo vamue, eci va ci linga, va yekisa ovangelo kuenje ka va ci kũlĩhile.

³ Ivaluki ava va kasi vokayike ndu wa kutiwi kumue lavo. Ivaluki ava va kasi loku kangisua, momo lenevo vu kasi latimba.

⁴ Olohuela vi sumbiwe lomanu vosi, lula waco ka u ka kale levĩho, momo Suku o tetuluila vakahonga la vakahokolo.

⁵ Ko ka kali locipululu colombongo. Tẽli lovina vu kuete, momo eye muẽle wa linga hati, Ame lalimue eteke hu yanduluka ndaño oku ku sia.

⁶ Oco tu tẽlela oku popia lutõi, tuti, Yehova eye oñuatisi yange, si kuata usumba. Omunu hẽ, o ndinga nye?

⁷ Ivaloki asongui vene, ava vo sapuilili ondaka ya Suku. Sokololi esulilo liomuenyo wavo. Setukuli ekolelo liavo.

⁸ Yesu Kristu ka pongoloka. Ndeci a kala hẽla haico a kala etali, kuenda haico a kala oloneke vi enda ño-o hũ, ka vi pui.

⁹ Ko ka lueyisui lovilongua viñi viñi, haivio vi tunda kuiñi kuiñi. Momo ca sunguluka okuti utima u kolisua locali ca Suku, haloviliako, evi ka via kuatisile ava va pindamua lavio.

¹⁰ Etu tu kuete utala umue wokuti, ava va lava otavernakulo ka va kuete omoko yoku liako.

¹¹ Momo ovinyama vina ocitunda cinene ci nenela osonde yavio akandu vocitumalo ci kola, atimba avio a timihiwila konele yocilombo.

¹² Haico Yesu layevo wa tala ohali konele yocilombo okuti omanu vaye va kolisiwa losonde yaye muẽle.

¹³ Oco tu tundili kokuaye konele yocilombo ha tu u lavisiwila.

¹⁴ Momo kulo ka tu kuete imbo li tumala osimbu, puãi tu sanda limue li laika loku iya.

¹⁵ Oco tu lumbi lumbi ku Suku ocilumba cesivayo haico epako liovimela via tava konduko yaye. Yesu o linga Mitakati o ci pitiya ku Suku.

¹⁶ Ko ka ivaliko oku lingainga ciwa, loku lia vela pokati, momo Suku o sanjukila ovilumba ndevi.

¹⁷ Pokoli kasongui vene loku linga eci va tuma, momo va kasi loku lavulula ovimuenyo viene ndava va lombolola noke ndomo va vi tata. Pokoli kokuavo okuti va ci linga lesanju, haloku lisiõsiõlako, momo nda va ci linga loku lisiõsiõla nda ka cu kuatisi.

¹⁸ Tu pinga okuti vu tu likutilila momo tua soka tuti, Tu kasi lutima wa pua episo, omo tu yongola oku linga esunga lovina viosi.

¹⁹ Kuenje ndu vetiyi ca lua oku ci linga ndokuti niuwiwa kokuene lombili.

²⁰ Kaliye Suku yombembua, u wopa kuava va fa ungombo unene wolomeme, Ñala yetu Yesu Kristu, losonde yocisila ka ci pui,

²¹ eye a vu malehise ovina viosi viwa ho lingi ocipango caye, haiye a talavaye vovitima viene la Mitakati Yesu Kristu oku linga eci co sungulukila. Kokuaye ku kale ulamba toke koloneke ka vi pui. Amene.

²² A vamanji, ndu pingi okuti vu kolisako londaka yange yelungulo, momo ndo soneheli olondaka ka via luile.

²³ Limbuki okuti manjetu Timoteo vo weca. Nda iya ndopo tu vu muila kumuamue.

²⁴ Lamipo asongui vene vosi lolosandu viosi. Va Italia vo lamipo.

²⁵ Ohenda yi kale lene vosi. Amene.