VA HEVERU 11 - Embimbiliya - Bíblia Sagrada em Umbundu

¹ Momo ekolelo olio ociseveto covina vi lavokaiwa, hailio ombangi yovina ka vi molaiha.

² Olosekulu via mola lalio oku panduiwa la Suku.

³ Lekolelo tu limbuka okuti oluali lua lulikiwa londaka ya Suku, ndokuti, eci ci muiwa, oku tungiwa, ca tunda kueci ka ci muiwa.

⁴ Abel, omo a kala lekolelo, oco wa lumbila Suku ocilumba ca velapo, okuti ca Kaini ci sule, kuenje wa ci tambuila uvangi wokuti ukuesunga. Suku wa imbila ocilumba caye uvangi poku ci tambula. Eye wa fa, puãi haimo lumue, mekonda liekolelo liaye, lopo o popia popia.

⁵ Enoke wa sondoluiwa lekolelo, okuti ka moli okufa, kuenje ka sangiwile vali, momo Suku wo sondolola. Osimbu ka sondolokele, wa imbilua uvangi okuti wa sunguluka ku Suku.

⁶ Okusunguluka ku Suku ka ku tẽliwa te lekolelo. Momo wosi o yongola oku kokela ku Suku, co sesamela oku kolela okuti kuli Suku, kuenda okuti Suku eca onima kuava vo sanda.

⁷ Noha, omo a kala lekolelo, oco eci a lunguiwila ovina ka via molehele handi, wa kuata ohele, yu wa angiliya ocimbaluku oku popela onjo yaye; oco wa pisa oluali kuenje wa linga kapiñala kesunga lina liya lekolelo.

⁸ Avirahama, omo a kala lekolelo, oco wa pokola eci a kovongiwa oku tunda ha endi kocitumalo wa laika oku piñala. Wa tunda kuenje ka kũlĩhile oko enda.

⁹ Omo a kala lekolelo, wa linga ocingendeleyi vofeka yohuminyo, huti ño vofeka yamale. Wa tumala volombalaka kumue la Isake kuenda Yakoba, ovo vakapiñala kumuamue laye kohuminyo yimuamue.

¹⁰ Momo eye wa imbila ovaso kimbo li kuete ociseveto, omesele yalio lutungi walio, Suku.

¹¹ Sara, omo a kala lekolelo, oco wa kuata ongusu yoku cita, ndaño wa pitahãla anyamo aco, momo wa soka hati, U wa ci likuminya ukuacili.

¹² Oco komunu umuamue, haeye wa soka ndu wa fa, kua tunda ombuto ndolombungululu via lua, ndeseke liopalaya yokalunga ka ci tava oku li tenda.

¹³ Ava vosi va fa lekolelo. Ka va tambuile ovina via likuminyiwa, puãi va vi muila ocipãla loku vi yolela, kuenje va tava okuti va kala akombe, haivo ovingendeleyi, kilu lieve.

¹⁴ Momo ava va popia ndomo va lekisa okuti va kasi loku sanda ofeka yoku tumala.

¹⁵ Nda va ivalukile oko va tunda nda va sangele evelo lioku tiukila.

¹⁶ Cilo puãi, va yongola ofeka ya velapo ndokuti yokilu. Oco Suku ka kuatele osõi oku tukuiwa Suku yavo, momo wa va angiliyila imbo.

¹⁷ Avirahama, omo a kala lekolelo, oco, eci a nyikiwa, wa lumba Isake, okuti, u wa tambula olohuminyo wa tava oku lumba omõlaye wongunga.

¹⁸ Omõlaco eye una co popiwila citi, Ombuto yove yi lukuluiwa ku Isake.

¹⁹ Avirahama wa kolela okuti Suku o tẽla oku pindula omanu ndaño kokufa. Oco, oku popia ndocisetahãi, kokufa haiko wo tambula.

²⁰ Isake, omo a kala lekolelo, oco wa sumũlũisa Yakoba le Esau lasumũlũho a laika oku iya noke.

²¹ Yakoba, omo a kala lekolelo, oco eci a kala lokufa, wa sumũlũisa omãla va Yosefe, omõla omõla, kuenje wa fendela loku kũlãmela kombueti yaye.

²² Yosefe, omo a kala lekolelo, oco, kesulilo liomuenyo waye, wa vangula okutunda kuomãla va Isareli ke Egito, kuenje wa vosika ndomo vo kenda.

²³ Olonjali via Mose, omo via kala lekolelo, oco, eci Mose a citiwa, vio soleka olosãi vitatu, momo via limbuka okuti omõlaco wa posoka, kuenje ka via kaile lusumba wocihandeleko cosoma.

²⁴ Mose, omo a kala lekolelo, oco, eci a kula, ka tavele oku tukuiwa omõla womõla a Fareo ukãi.

²⁵ Wa nolapo oku tala ohali kumue lomanu va Suku, oku sanjukila asanju akandu, hao asanju a pua pua, hacoko.

²⁶ Wa soka okuti oku lavisiwila Kristu oco ukuasi wa lua, ukuasi wosi wo ke Egito u sule, momo wa lavoka onima.

²⁷ Omo a kala lekolelo, wa tunda ke Egito, yu ka kuatele usumba wonyeño yosoma, momo wa pandikisa ndu o lete una ka muiwa lovaso ositu.

²⁸ Omo a kala lekolelo wa sovola o Pascoa, kuenje wa nyila osonde okuti unyõli wolonuñulu ka vi lambi.

²⁹ Omo omanu va kala lekolelo, oco va yoka o Kalunga Kakusuka ndokongongo ya kukuta. Eci va Egito va ci seteka va enda lovava.

³⁰ Ovimbaka via Yeriko via leñuha lekolelo eci via ñualiwa oloneke epanduvali.

³¹ Rahava, ukuakahokolo, omo a kala lekolelo, oco ka nyõlehelele kumue lava va sina, momo wa laleka olondavululi lombembua.

³² Mopia nye vali? Momo si moli otembo yoku ivaluka Gideone, la Baraka, la Samisone, kuenda Yefita, la Daviti, la Samuele, kuenda ovaprofeto.

³³ Omo va kala lekolelo, oco va yula ovosoma, va lingainga esunga, va tambula olohuminyo, va munihisa ovimẽla violohosi,

³⁴ va ima ongusu yondalu, va puluka komẽla wosipata, va leñela tupu haimo va kuata ongusu, kovita va linga olonõi, va lundula olohoka via vakualofeka.

³⁵ Akãi vamue va tambula vavo va file yu va pinduka. Vakuavo va tipuiwa enene, ndoku sika ocingufu, puãi ka va tavele oku puluka, vati, Tu sanga epuluko lia velapo eci tu pinduka.

³⁶ Vakuavo va setekiwa lasuangulo, va tipuiwa, va kapiwa kalienge kuenje va yikiwa.

³⁷ Va asiwa ovawe, va tetiwa pokati loloselalo, va setekiwa layonjo, va ipaiwa lolosipata, va ñuala ñuala loku wala ovipa violomeme lovipa violohombo, va fũkĩlisua, va tala ohali, va lingisua cĩvi cĩvi.

³⁸ Oluali ka lua va posokelele. Va tungayala vakalasoko, lo volomunda, lo valeva, lo valungi.

³⁹ Ava vosi, ndaño va imbiwila uvangi wekolelo liavo, haimo ka va tambuile evi via va likuminyiwa.

⁴⁰ Momo Suku wa tu pongiyila cimue ca velapo okuti, ovo ka va kanguisua lika liavo, te kumue letu.