VA HEVERU 1 - Embimbiliya - Bíblia Sagrada em Umbundu

¹ Kosiahulu Suku wa popia olonjanja via lua lolosekulu vietu lovimẽla viovaprofeto. Wa nola olonjila viñi viñi vioku sapula ondaka yaye.

² Koloneke vilo via sulako puãi, wa popia letu l'Omõlaye, una a nola ha lingi kapiñala kovina viosi, haeye a lulika laye oluali.

³ Omõlaco o tuisa ocinyi culamba wa Suku. Ovituwa viaye haivio ovituwa via Suku. O tata ovailu loluali londaka yunene waye. Eci a mala oku yelisa akandu, oco a tumala kondio ya Tõlo kilu.

⁴ Wa tumala tupu wa velapo ovangelo ndeci onduko a piñala ya velapo olonduko viavo.

⁵ Momo Suku hẽ, wa la popia lungelo umue, hati, Ove vumõlange, etaili nda ku cita? pamue vali, hati, Ndi linga Isiaye leye o linga Omõlange.

⁶ Kuenda vali, eci o nena vali koluali nuñulu, o linga hati, Ovangelo vosi va Suku vo fendele.

⁷ Oku tukula ovangelo wa popia hati, Ovangelo vaye wa va lingisa olofela, loloñuatisi viaye wa vi lingisa ilienge viondalu.

⁸ Puãi, oku tukula Omõlaye, wa popia hati, Ocalo cove, a Suku, coloneke ka vi pui. Epangati liesunga olio epangati liusoma wove.

⁹ Ove wa sola esunga, wa suvuka esino, oco Suku, Suku yove, wa ku waveka lulela wesanju, vakuẽle ci sule.

¹⁰ Kuenda vali, hati, Ove, a Ñala, kefetikilo wa seveta ociseveto congongo. Kuenda ovailu upange wovaka ove.

¹¹ Ovio vi nyõleha, ove puãi o kala ño-o hũ. Ovio viosi vi kuka ndolonanga.

¹² Ove o vi vunga ndonanga, kuenje vi pongoloka, Ove puãi, ku pongoloka. Anyamo ove ka a pui.

¹³ Puãi wa la popia hẽ, lungelo umue, hati, Tumala kondio yange toke ndinga ovanyali vove ociliatelo colomãi viove?

¹⁴ Havosiko hẽ, aspiritu vakuakuvumba va tumiwila oku vumba ava va piñala eyovo?