VA FILIPOI 3 - Embimbiliya - Bíblia Sagrada em Umbundu

¹ A vamanji, oku sulila, ndinga siti, sanjukili vu Ñala. Ame oku vu pituluila ño-o olondaka vimosi ño-o ka ku ñavisa, lene, olondaka viaco viu kuatisi.

² Lunguki lolombua. Lunguki la vakuakulinga cĩvi. Lunguki lava va liteta ño.

³ Momo etu tu fendaela Suku lespiritu loku lipandela Kristu Yesu okuti ka tu kolela ovina vietimba, etu, etu muẽle tuakuevamba liocili.

⁴ Ndaño ame muẽle, kovina vietimba, ñuete evi okuti nẽla oku lipanda lavio. Nda kuli ukuavo wa sima okuti o kuete ovina vietimba okuti vi tava oku lipanda lavio, ame mbelapo.

⁵ Ndukuevamba lieteke liecẽlãla. Ndimbuto ya Isareli. Ndukuepata lia Benjamini. Ndu Heveru wa va Heveru. Kovihandeleko ndu Fariseo.

⁶ Kondaka yombili nda talisa ekongelo lia Kristu ohali. Kondaka yesunga liovihandeleko nda pua evelo.

⁷ Puãi, ovina nda tendele ndonganyu, nda vi tenda ndepese eci nda litumbika ku Kristu.

⁸ Cilo, oku popia ocili, omo kokuange oku kũlĩha Kristu Yesu, Ñala yange, okuo kua velapo, haikuo ka ku pitahãliwa, oco cosi cikuavo ndi ci tenda ño ndepese. Ndo pesila ovina viosi. Ovina viosi ndi vi tenda ño ndovipelekese hã si nganyala Kristu,

⁹ loku sangiwa vokuaye. Cilo, nda ñasi lesunga limue, esunga liaco ka lia tundile kovihandeleko, puãi lieyilila poku kolela Kristu, hailio lia tunda ku Suku, kuenje lia sevetiwa vekolelo.

¹⁰ Cilo, eci ndi livela ceci okuti, ñulĩha ocili Kristu, loku kũlĩha unene wepinduko liaye. Ndi livelavo oku yevela kumuamue laye olongembia viotokua yaye, okuti vokufa kuange ndinga ndomo eye a linga vokufa kuaye,

¹¹ kuenje, nda ci tava, minduiwa kumue lava va fa.

¹² Ka ci kasi okuti, eci nda livela nda ci kuata ale, pamue nda kanguka ale. Oco hacoko. Puãi, omo Kristu Yesu wa ñuata, kuenje wa nukula hati, Wange, oco njoloka hã si ci kuata.

¹³ A vamanji, sia simile siti, nda ci kuata ale, puãi cimuamue ndinga cokuti, njivala ovina viokonyima loku yolokela eci ci kasi kovaso.

¹⁴ Njolokela kocimãho hã si tambula onima. Onima yaco yeyi, Ekovongo li kola lia Suku vu Kristu Yesu.

¹⁵ Etu vosi tumanu vendamba vekolelo oco muẽle ca tu sesamela oku sokolola. Nda kocina cimue wa sokololi ciñi lacovo Suku u ci situluili.

¹⁶ Cimosi lika okuti, eci cocili tu kasi ale laco tu pandikisi laco.

¹⁷ A vamanji, setukuli ame. Kũlĩhisi ava va kuete omuenyo ndowu wetu, momo kokuavo ci tava oku upako ongangu.

¹⁸ Momo, ndeci ndo sapuili olonjanja, kuenje ndeci ndu sapuili vali cilo loku lila, va lua kovimuenyo viavo va linga ovanyali vekulusu lia Kristu.

¹⁹ Efulilo liavo oku nyõleha. Suku yavo imo. Ulamba wavo akutisasõi. Va sokolola lika ovina via palo posi.

²⁰ Puãi ofeka yetu yi kasi kilu, oko tu lavokaila Upopeli, Ñala Yesu Kristu.

²¹ Eye o pongolola etimba lietu liesepu ha li lingi ndetimba liaye liulamba. O ci linga lunene waye una wa wiha olohõlo vioku pokuisila ovina viosi kokuaye.