VA FILIPOI 2 - Embimbiliya - Bíblia Sagrada em Umbundu

¹ Nda vu Kristu muli ekoliso, pamue ocisola ci livela oku kuatisa, pamue ongongela y'Espiritu, pamue ohenda kuenda ocikembe,

² oco suisipo esanju liange. Kali lutima umosi locisola cimosi. Likapeli ocimãho cimosi, kuenje ci litumbikili lovisimilo vimuamue.

³ Cosi vu linga, ko ka ci lingili omo vu yongola oku limuisa pamue oku lipanda, puãi, loku liketisa, tendi vakuẽle hoti, Ovo va velapo, etu tu sule.

⁴ Lomue ka ka sokolole ovina viaye lika, puãi omunu omunu a sokolole ovina via vakuavo.

⁵ Upi ongangu ku Kristu Yesu. Kali lutima ndowu eye a kala lawo.

⁶ Momo Kristu Yesu, ndaño wa kaile nda Suku, haimo ka sandele ulamba woku lisokisa la Suku.

⁷ Puãi wa lipesela eye muẽle, wa linga ndupika, wa citiwa lesetahãlo liomunu.

⁸ Kuenje, omo a citiwa ndomunu, oco wa liketisa, kuenje wa pokola toke kokufa, ndaño okufa kuokekulusu.

⁹ Oco Suku wo kemainya kuenje wo luka onduko ya piãla olonduko vikuavo viosi.

¹⁰ Wa ci lingila okuti, konduko ya Yesu ku kekamela olongolo viosi viava vokilu lo posi levi viovemẽhi liongongo,

¹¹ kuenda okuti alimi osi a tava okuti Yesu Kristu eye Ñala, loku muisa Suku Tate ulamba.

¹² Oco, a vakuacisola cange, ndeci ale wa pokowaili, okuti eci nda kaile lene hacoko lika, haico cilo, ndaño si kasi lene, kolisiko oku linga eci ci koka epopelo liene. Kolisiko muẽle laco lusumba loku luluma.

¹³ Momo Suku o kasi loku linga upange waye vokati kene, kuenje haeye o tu iha ongusu kuenda utima woku linga ocipango caye.

¹⁴ Cosi vu linga ci lingi loku yuvula oku lisiõsiõla kuenda olonatoma,

¹⁵ okuti vu linga omãla va Suku ve lipua, haene vu pua etondelo, kuenje vu kala pokati kocitumbulukila cilo cevĩho loku tatama ndomanu va pua eko. Voluali lulo luowelema vu tua ndolombungululu.

¹⁶ Kuati ondaka yomuenyo povaka ene, okuti veteke lia Kristu, njimba olopandu omo sia likavisile ño oku lupuka, kuenje upange nda linga ka wa kaile wolivova.

¹⁷ Ndaño ame muẽle meselua hã si itiliwila kocilumba ci kola cupange wekolelo liene, haimo sanjuka, kuenje njolelela kumosi lene vosi.

¹⁸ Lenevo sanjuki, loku yolelela kumosi lame.

¹⁹ Nda Ñala Yesu wa panga, ndavoka oku u tumisi ndopo Timoteo, okuti utima wange u petuiwa poku yeva ndomo vu kasi.

²⁰ Kongeva o vu kuetele, si kuete ukuavo wa lisoka laye.

²¹ Vakuavo vosi va sakalalaela ovina viavo muẽle, ovina via Kristu Yesu havioko.

²² Puãi Timoteo wa lilekisa okuti o likasilili. Wa kũlĩhi ale ndomo vupange woku kunda ondaka yiwa eye wa ñuataisa ndeci omõla a kuatisa isiaye.

²³ Oco, ndavoka oku u tuma tuli njeva ndomo va netuluila.

²⁴ Kuenje nda kolela Ñala okuti lamevo ndopo njiya.

²⁵ Cilo nda sima siti, Esunga oku tuma ndopo manjange Epafrodito, haeye ukuetu kupange, haeye esualali kumue lame. Eye weyile ndomunga yene oku ñuatisa kusuke wange.

²⁶ Cilo o vu kuetele vosi ongeva ya lua, kuenje wa sakalala vutima omo ene wa yevi okuvela kuaye.

²⁷ Ocili, wa velele muẽle cina cocili, wa si oku fa, puãi Suku wo linga ohenda. Heyeko lika a linga ohenda, wa ndingavo ame ohenda, sanga asumuo ange a lilundika ño-o.

²⁸ Oco ndu tumila lonjanga, okuti ene vu sanjukila oku u mola vali, lame ohele yange yi tepuluka.

²⁹ Oco, u tambuli vu Ñala lesanju lia lua. Ava va linga ndeye va sesamela ekemainyo.

³⁰ Momo, pa kambele ño naito, nda wa fila upange wa Kristu. Wa likolisila oku tẽlisa onjongole yene yoku ñuatisa, ndaño wa enda lomuenyo waye peka.