VA FILIPOI 1 - Embimbiliya - Bíblia Sagrada em Umbundu

¹ Ame ndi Paulu kuenda Timoteo, haetu tuakuenje va Kristu Yesu, Tu sonehela olosandu viosi vu Kristu Yesu vi kasi ko Filipoi, kumue lolosungu viaco kuenda oloñuatisi.

² Ocali lombembua yina yi tunda ku Suku Tate kuenda ku Ñala Yesu Kristu, yi kale lene.

³ Njimba olopandu ku Suku yange olonjanja viosi eci ndu wivaluki.

⁴ Olonjanja viosi eci ndu likutililili ene vosi ndi ci linga lesanju.

⁵ Njimba olopandu, omo tunde keteke lia tete toke cilo, wa litumbiki oku kuatisa upange wondaka yiwa.

⁶ Ndi ci okuti u wa fetika upange uwa vokati kene, amamako oku u malusula toke keteke lia Yesu Kristu.

⁷ Ca sunguluka ame oku vu wivaloka ndomo, momo vu kasi vutima wange. Momo, kovina viosi, tua tambuila pamosi ocali ca Suku, ci kale eci nda kala vokayike, ci kale eci nda kala loku yakela kuenda oku imbila uvangi ondaka yiwa.

⁸ Momo Suku ombangi okuti ndu kueteli vosi ongeva, ongeva yaco yiyilila omo ndu soli locisola ca Kristu Yesu.

⁹ Eci ndi likutilila ceci okuti, ocisola cene ci lue, lokulua kuaco kuendele pamosi lukũlĩhiso luloño wosi.

¹⁰ Ndi likutililavo okuti, poku kala lukũlĩhiso luloño, oco vu kuata olondunge vioku limbuka ovina via velapo, kuenje keteke lia Kristu, vu sunguluka loku pua atondelo.

¹¹ Ndi likutililavo okuti ovimuenyo viene vi yuka apako esunga, ana a imisiwa lekuatiso lia Yesu Kristu, oku imisiwila ulamba wa Suku kuenda esivayo.

¹² A vamanji, njongola okuti vu kũlĩha okuti eci ca pita lame camisako ocili ondaka yiwa,

¹³ Cilo, akuenje velombe vosi la vakuavo vosi va kũlĩha okuti nda yikiwila Kristu.

¹⁴ Kuenda vali, okuyikiwa kuange ku kasi oku kolisa ekolelo lia vakuetu va lua lioku kolela Suku, pa kamba naito nda vosi. Cilo, utõi wavo woku kunda ondaka ya Suku, wa lua, ndomo va kaile, ci sule ca lua. Usumba wa va pua.

¹⁵ Ocili, vamue va kunda Kristu omo va kasi lonya luyaki, vakuavo puãi vo kunda omo ovitima viavo vie yuka onjongole yaco.

¹⁶ Ovo va ci linga locisola. Va kũlĩha okuti nda kapiwa mulo oku yakela ondaka yiwa.

¹⁷ Vakuavo, okuti vana va kunda Kristu omo ve yuka onya luyaki, vo kunda puãi lalomboluilo avo muẽle, halociliko. Va yongola oku vokiya kohali yokuyikiwa kuange.

¹⁸ Oco hẽ, ci linga cimue? Ka ci lingi cimue. Cinene okuti Kristu o kasi loku kundiwa kuosi, ci kale la vakuacili, ci kale la vakuelimbi. Cosi nda ci sanjukila. Mopia vali siti, Nda ci sanjukila kuenje ñala ño lesanju liaco.

¹⁹ Momo ñulĩha okuti, omo vu kasi loku liñutilila, lomo Espiritu lia Yesu Kristu li kasi oku ñuatisa, oco ovina evi vi kasi loku lingiwa vi sulila vokuyovoka kuange.

²⁰ Onjongole yange lelavoko liange lieli okuti, lacimue ka ci ka ñutise osõi! Ndi livela okuti utõi wange u suapo ndeci colonjanja viosi. Ndi livela vo okuti Kristu o kemalela vetimba liange, ci kale vomuenyo, ci kale vokufa.

²¹ Momo kokuange, okukala lomuenyo okuo Kristu, okufa okuo onganyu.

²² Nda va netela onimbu okuti ñala lomuenyo palo posi, ca lomboloka okuti lopo ñuete upange u tẽla oku ima epako. Haimo lumue eci nolapo si ci.

²³ Pokati kovina viaco vivali nda saka oku nola. Ndi livela oku tunda loku kala la Kristu, omo oco ca velapo ca lua.

²⁴ Puãi, oku vu sokolola ene, ca velapo nda ñala lomuenyo.

²⁵ Omo oco nda kolela, oco nda kũlĩha okuti ñala, kuenje numala vali lene vosi, oku vu kuatisa oku amamako lesanju vekolelo.

²⁶ Oco, omo njiya vali kokuene, ene vu sanga vomuenyo wange eci vu kemainya laco Kristu Yesu.

²⁷ Ndu kisiki ca lua okuti ovimuenyo viene vi soka londaka yiwa ya Kristu, okuti ndaño njiya kuenje ndu moli, ndaño siya, haimo njeva okuti wa kolipo v'Espiritu limuamue, kuenje njevavo okuti vu kuete utima umosi oku yakela ekolelo lioku kolela ondaka yiwa.

²⁸ Ko ka yokokeli ovanyali vene ndaño naito. Kokuavo, utõi wene u linga ocitumasuku ci va sapuila okuti ovo, Suku o va nyõla, puãi ene, Suku o vu popela.

²⁹ Momo okukolela Kristu hakuoko lika kua eciwa kokuene. Kokuene kua eciwavo oku u talela ohali.

³⁰ Vu kasi vuyaki una wa muili kokuange, kuenda cilo haiwo u njevitili.